Ezai 34:1-17
34 Nvlenvle mun, amun mantan wa naanamun tie,nvlenvle’m be nunfuɛ mun, amun sie amun su.Maan asiɛ’n nin i su ninnge mun be tie,maan mɛn’n nin i nun ninnge’m be kwlaa be tie.
2 Afin Zoova w’a fa nvlenvle’m be kwlaa be wun ya,+yɛ w’a fa be sonja’m be kwlaa be wun ya.+Ɔ́ wá yí be mán naan be nunnun be,ɔ́ wá yó maan bé kún be kunlɛ kpa.+
3 Bé tó be nga be kunnin be’n bé gúa be gua su lɔ,yɛ be fuɛn’m bé bɔ́n sa fiaan,+be mmoja’n ti’n, oka’m bé kló.*+
4 Ɲanmiɛn su lɔ sonja’m be kwlaa bé sáci,yɛ bé ɲɔ́nɲɔ́n ɲanmiɛn’n kɛ fluwa wie sa.Yɛ be sonja’m be kwlaa bé glɔ́ kɛviɲin nɲa mɔ w’a glɔ m’ɔ fin viɲin waka’n su tɔ’n sa,kɛ figie mma mɔ w’a wɔnsɔn m’ɔ fin figie waka’n su tɔ’n sa.
5 “Afin min tokofi’n ɔ́ wá lúa pɔtɔɔ ɲanmiɛn su lɔ.+Ɔ́ jrá Edɔmun su, ɔ́ dí i jɔlɛ,+ɔ́ jrá nvlefuɛ mɔ n seli kɛ be nunnun be’n be su.
6 Zoova le tokofi kun, i su wá yó mmoja ngunmin.I su wá yó lui ngunmin,+i su wá yó bua gbanflɛn nin boli mmoja ngunmin,i su wá yó bua aklɛnzia wun lui ngunmin.Afin Zoova su wa yi tɛ Bɔzra lɔ,ɔ́ wá gúa mmoja kpanngban ase Edɔmun+ mɛn’n nun lɔ.
7 Be nin blo nannin mun bé kɔ́,ɔ nin nannin gbanflɛn mun nin be nga be le wunmiɛn kpa’n.Be mɛn’n ɔ́ yó mmoja ngunmin,yɛ be ndutre’n ɔ́ yó lui ngunmin.”
8 Afin Zoova w’a sie i klunngbɔ tulɛ cɛn kun,+w’a sie afuɛ kun mɔ i nun’n, kɛ ɔ́ wá kplí Siɔn i ti jɔlɛ dilɛ nun’n, ɔ́ tú sran’mbe fɔ-ɔ.+
9 I* nzue ba’m bé wá káci gudrɔn,i ndutre’n yó kɛ sufru sa,yɛ i asiɛ’n yó kɛ gudrɔn m’ɔ su yra’n sa.
10 Kɔnguɛ-o, wia nun-o, ɔ su nuanman,i wunsrɛn’n fú kɔ́ nglo tititi,ɔ́ sáci, yɛ ɔ́ ká sɔ blɛ kwlaa nun,sran fi su sinman nunkun le.+
11 Ɔ́ yó nzue su anunman nga be flɛ i kɛ pelikan’n, ɔ nin kpɛnzɛ’n be lika,yɛ akpatue nga i su’n ti tɛnndɛn’n, ɔ nin kɔkɔkuankuan mun bé trán lɔ.Ɔ́* wá tínngɛ like m’ɔ timan like fi’n i sunnzunlɛ ɲanman’n nun i su,yɛ like nunnunlɛ ɲanman mɔ sunmun* o i nuan’n, ɔ́ wá tínngɛ nun i su.
12 I sran dandan wie fi su yoman famiɛn,yɛ i sran dandan’m be kwlaa be su tranman lɛ kun.
13 Owieowie mun bé fífí i sua fleinflein’m be nun,Aɲintɔnman’n nin ijre mɔ be ti owieowie’n bé fífí i sua dandan’m be nun.Ɔ́ káci blo alua’m be lawlɛ,+yɛ ɔ́ káci klɔnsoklo’mbe sua.
14 Aawlɛ flɛnnɛn’n nun nnɛn mun, ɔ nin nnɛn mɔ be kpan kekle kpa’n bé yía lɔ,yɛ blo boli’m* bé kpán flɛ́ be wiengu.Lɔ yɛ apɛlu’n ɔ́ trán-ɔn, lɔ yɛ ɔ́ ɲán lika ló wunmiɛn-ɔn.
15 Lɔ yɛ wuo m’ɔ ti kɛ cua sa’n ɔ́ yó i sua’n niɔn, lɔ yɛ ɔ́ tó-ɔ,kpɛkun ɔ́ lɛ́ i klenzua’m be su, ɔ́ tían be nuan i fɔnvɔ’n i bo.Asa ekun’n, lɔ yɛ kotoklo’m be ti yía-ɔ, bé trán nɲɔnnɲɔn, yasua kun nin bla kun.
16 Amun niannian Zoova i fluwa’n nun, yɛ amun man amun nɛn’n su kanngan nun:Be nun wie fi tuman nun,be nun wie fi i ngunmin su tranman,afin ndɛ’n fin Zoova bɔbɔ i nuan nun yɛ ɔ fiteli-ɔ,yɛ i wawɛ’n yɛ ɔ tiantiannin be nuan likawlɛ-ɔ.
17 I bɔbɔ yɛ ɔ tuli lika’n i wun fɔtɔ fa cɛcɛli be-ɔ,i bɔbɔ i sa’n yɛ ɔ sunnzunnin be lika’n mannin be-ɔ.*Bé fá yó be liɛ tititi,kpɛkun bé trán nun blɛ kwlaa nun.
Ja ngua lɔ ndɛ mun
^ Annzɛ “be mmoja’n fín oka’m be su sónji.”
^ Ɔ ti weiin kɛ Bozra m’ɔ ti Edɔmun i klɔ dan’n i ndɛ yɛ be kan-ɔn.
^ Annzɛ “Ɲanmiɛn.”
^ Ebr., “yɔbuɛ.”
^ Be kwla se ekun kɛ “mmusu mɔ be ti kɛ boli sa’n.”
^ Ebr., “ɔ fali like sunnzunlɛ ɲanman’n fa cɛcɛli nun mannin be.”
