Ezai 36:1-22
36 Kɛ Ezekiasi kacili famiɛn’n i afuɛ blu-nin-nnan (14) su’n, Sankeribu m’ɔ ti Asiri+ famiɛn’n wa tɔli Zida klɔ kwlaa nga be wun ti sisiwa’n be su, kpɛkun ɔ fali klɔ sɔ mun.+
2 Ɔ maan Asiri famiɛn’n sunmannin Rabusake’n,*+ ɔ nin sonja kpanngban kpa mɔ be o Lakisi+ lɛ’n kɛ be ko wun Famiɛn Ezekiasi wun Zerizalɛmun lɔ. Be ko jranjrannin nzue guawlɛ ng’ɔ o nglo lɔ’n i mmuɛ’n+ i wun lɛ. Ɔ o atin dan ng’ɔ kɔ ninnge kpufuɛ’n i fie’n+ su lɔ’n i wun lɛ.
3 I sin’n, Ilkia i wa Eliakimun+ m’ɔ nian famiɛn’n i awlo’n su’n, nin Sɛbna+ m’ɔ ti fluwa klɛfuɛ’n, ɔ nin Azafu i wa Zoa m’ɔ klɛ nvle’n nun ndɛ mun sie’n, be fite ɔli i wun lɔ.
4 Ɔ maan Rabusake’n seli be kɛ: “Amun yaci, amun se Ezekiasi kɛ: ‘Ndɛ nga famiɛn dan’n kan’n yɛ, Asiri famiɛn’n waan yoo: “?Ngue su li yɛ a fa ɔ wla’n gua-ɔ?+
5 A ko se kɛ: ‘M’an buabua min wun m’an sie, yɛ n le wunmiɛn n kun alɛ.’ Sanngɛ be nuan nun ndɛ kanlɛ ngbɛn yɛle ngalɛ’n. ?Wan su li yɛ a fa ɔ wla’n gua mɔ i ti yɛ a yo ɲin kekle min su’n niɔn?+
6 A fa ɔ wla gua Ezipti m’ɔ ti kɛ ndɛma mɔ w’a bu’n sa’n i su. Nian! Sran ng’ɔ kisɛ i su’n ɔ wɔ i sa klun, ɔ fiti i bo nun lɔ. Be kwlaa nga be fa be wla gua Faraɔn m’ɔ ti Ezipti famiɛn’n i su’n, kɛ i bo’n gua sɔ man be-ɔ.+
7 Wienun-ɔn, á sé min kɛ: ‘E Ɲanmiɛn Zoova su yɛ e fa e wla gua-ɔ.’ ?Nán Ɲanmiɛn sɔ’n yɛ ɔ bɔbɔ Ezekiasi a bubuli i lika nglonglo mun nin i tɛ yiwlɛ mun’n niɔn?+ ?Yɛ w’a seman Zidafuɛ mun nin Zerizalɛmunfuɛ mun kɛ: ‘Ɔ fata kɛ amun koto tɛ yiwlɛ nga ɲrun’?”’+
8 Ɔ maan siɛn’n, maan a nin Asiri+ famiɛn’n m’ɔ ti min min’n be kpɛkpɛ: Ń má mán wɔ nnɛn kpanngɔ akpi nɲɔn (2.000), sɛ a kwla ɲan sran fu be kwlaa be su-o.
9 ?Sɛ Ezipti su yɛ a fa ɔ wla’n gua naan w’a kwla ɲan alɛ kunlɛ kakaklolo nin nnɛn kpanngɔ’n, á yó sɛ naan w’a kwla jran siefuɛ kunngba cɛ m’ɔ ti min min’n i sufuɛ’m be nun kaanfuɛ’n bɔbɔ’n i ɲrun?
10 ?Sɛ Zoova bɔbɔ w’a manman min atin’n, ń bá mɛn nga i nunnunlɛ? Zoova bɔbɔ seli min kɛ: ‘Kɔ ko tɔ mɛn nga su, naan nunnun i.’”
11 Kɛ ɔ yoli sɔ’n, Eliakimun nin Sɛbna+ nin Zoa be seli Rabusake’n+ kɛ: “Yaci, kan ndɛ’n kle ɔ sufuɛ mun Aramun* aniɛn’n nun,+ afin e ti. Nán kan ndɛ’n kle e Zifu’m be aniɛn’n nun, afin nvlefuɛ nga be o talɛ’n su’n be ti.”+
12 Sanngɛ Rabusake’n seli kɛ: “?Amun bu i kɛ amun nin amun min’n amun ngunmin ti yɛ min min’n sunmannin min kɛ n wa kan ndɛ nga n kle amun-ɔn? Sran nga be o talɛ’n su’n, be liɛ wie ti yɛ n bali-ɔ. Amun nin sran sɔ mun’n, amun sewie’n yɛ amún wá dí-ɔ, yɛ amun mmie’n yɛ amún wá nɔ́n-ɔn!”
13 I sin’n, Rabusake’n kpannin kekle kpa kannin ndɛ’n Zifu’m be aniɛn’n nun.+ Ɔ seli kɛ: “Amun tie ndɛ nga Asiri famiɛn’n+ m’ɔ ti famiɛn dan’n kan’n.
14 Ndɛ nga famiɛn’n kan’n yɛ: ‘Nán amun yaci Ezekiasi lɛ naan ɔ laka amun, afin ɔ su kwlá deman amun.+
15 Nán maan Ezekiasi laka amun naan amun fa amun wla gua Zoova su.+ Ɔ se amun kɛ: “Saan Zoova dé e, klɔ nga su yoman Asiri famiɛn’n i liɛ.”
16 Nán amun tie ndɛ nga Ezekiasi kan’n, afin ndɛ nga Asiri famiɛn’n kan’n yɛ: “Maan e siesie e afiɛn, yɛ amun fa amun wun man min. I liɛ’n, amun tinuntinun amún dí amun bɔbɔ amun viɲin nin amun figie’m be su mma mun, yɛ amún nɔ́n amun bɔbɔ amun gbo’n* i nun nzue’n.
17 I sin’n, ń má bá kpɛkun ń fá amun kɔ́ mɛn kun m’ɔ ti kɛ amun bɔbɔ amun mɛn’n sa’n i nun.+ Ɔ ti mɛn kun mɔ ble nin ɔɔzu be yo ye lɔ kpa-ɔ, duvɛn mɔ b’a yi i uflɛuflɛ’n sɔnnin lɔ kpa, be diman kpanwun yalɛ lɔ, ɔ ti viɲin fie diwlɛ.
18 Nán amun tie ndɛ nga Ezekiasi kan’n, afin ɔ laka amun se kɛ: ‘Zoova wá dé e.’ ?Nvlenvle’m be ɲanmiɛn’m be nun onin cɛ yɛ ɔ deli i mɛn’n Asiri famiɛn’n i sa nun-ɔn?+
19 ?Amati nin Aapadi+ lɔ ɲanmiɛn’m be o nin? ?Sefavaimun+ i ɲanmiɛn’m be o nin? ?Be kwla deli Samari klɔ’n min sa nun?+
20 ?Nvle sɔ’m be ɲanmiɛn’m be kwlaa’n, be nun onin yɛ ɔ kwla deli i nvle’n min sa nun-ɔn? ?Yɛ Zoova yó sɛ yɛ ɔ́ kwlá dé Zerizalɛmun klɔ’n min sa nun-ɔn?”’”+
21 Sanngɛ be guali bliin, b’a tɛmɛn i su, afin famiɛn’n seli be kɛ nán be kan ndɛ fi.+
22 Ɔ maan Ilkia i wa Eliakimun m’ɔ nian famiɛn’n i awlo’n su’n, nin Sɛbna+ m’ɔ ti fluwa klɛfuɛ’n, ɔ nin Azafu i wa Zoa m’ɔ klɛ nvle’n nun ndɛ mun sie’n, be titili be wun tralɛ’m be nun, kpɛkun be ɔli Ezekiasi i wun lɔ, be ko kannin ndɛ nga Rabusake’n kannin’n kleli i.
