Ezai 38:1-22
38 Blɛ sɔ’n nun’n, Ezekiasi tɔli tukpacɛ kekle kpa, ɔ timan nguan liɛ.+ Amɔzu i wa Ezai m’ɔ ti Ɲanmiɛn nuan ijɔfuɛ’n+ bali wa seli i kɛ: “Ndɛ nga Zoova kan’n yɛ: ‘Siesie ɔ aja’n afin á wú, a su yoman juejue.’”+
2 Kɛ ɔ yoli sɔ’n, ɔ kpɛli i ɲin talɛ’n su lɔ, yɛ ɔ boli Zoova srɛlɛ bo-ɔ. Ɔ seli kɛ:
3 “Ee Zoova, ń srɛ́ wɔ kpa, yaci, maan ɔ wla kpɛn su kɛ+ e nin wɔ e nantili klanman, n fali min awlɛn’n kwlaa n suli wɔ,+ yɛ n yoli sa ng’ɔ ti kpa ɔ ɲrun’n.” Kpɛkun Ezekiasi sunnin sunlɛ kpa.
4 I sin’n Zoova kannin ndɛ kleli Ezai, ɔ seli i kɛ:
5 “Sa ɔ sin naan ko se Ezekiasi kɛ:+ ‘Ndɛ nga Zoova m’ɔ ti ɔ nannan Davidi i Ɲanmiɛn’n kan’n yɛ: “N tili ɔ srɛlɛ’n,+ n wunnin ɔ ɲinmuɛn’n,+ ń má úka ɔ nguan’n* su afuɛ blu-nin-nnun (15).+
6 Ń má dé wɔ, ɔ nin klɔ nga Asiri famiɛn’n i sa nun. Ń má kplí nvle nga i ti.+
7 Nzɔliɛ ng’ɔ fin Zoova m’ɔ kle ɔ kɛ Zoova wá yía ndɛ ng’ɔ kannin’n i nuan’n yɛ:+
8 Ń má yó maan wia’n i fɔnvɔ’n mɔ w’a jra Akazi i asikalie’n su’n, ɔ́ sɛ́ i sin, ɔ́ fú lele jú kan be tiatia lɛ’n i blu su’n su.”’”+ Ɔ maan wia’n i fɔnvɔ mɔ w’a dun mmua w’a jra’n, ɔ sɛli i sin lele juli asikalie’n i lika nga be tiatia lɛ’n i blu su’n su.
9 Kɛ Famiɛn Ezekiasi m’ɔ ti Zida famiɛn’n ɔ tɔli tukpacɛ m’ɔ yoli juejue’n yɛ ɔ kannin ndɛ nga-ɔ.
10 Ɔ seli kɛ: “Kɛ n juli min nguan ɲanman’n i afiɛn’n,ɔ fata kɛ n sin Ndia’n* i anuan’m be nun,n su kwlá diman min afuɛ’m be onga mun.”
11 N seli kɛ: “N su wunman Ya,* n su wunman Ya be nga be ɲin o su’n bemɛn’n nun.+Kɛ ń má trán lika nga be yoman like fi lɔ’n i nunfuɛ’m be nun’n,n su nianman sran mun kun.
12 Be deli min bɔbɔ min tranwlɛ’n, yɛ be fa ɔli mmua,+kɛ nnɛn kankanfuɛ wie i tannin sua’n sa.Kɛ tannin wufuɛ kun fa ɲɔnɲɔn i tannin’n sa’n, n ɲɔnɲɔnnin min nguan’n.Ɔ kpɛli min nun kɛ tannin nun jese sa.Kɛ ɔ fɛ i nglɛmun tutu lele mɔ lika’n fá sán’n, a fa min kɔ min awieliɛ.+
13 N mian min ɲin n tran diin lele lika’n fa cɛn.Kɛ asɔmɔli wie sa’n, ɔ bubu min owie’m be kwlaabe nun.Kɛ ɔ fɛ i nglɛmun tutu lele mɔ lika’n fá sán’n, a fa min kɔ min awieliɛ.+
14 Kɛ alialia annzɛ kɔtɔkɔli sa’n, n kplin blɛ kwlaa nun,+n kplin kɛ auble sa tititi.+M’an nian nglo lɔ lelem’an fɛ:+‘Ee Zoova, min wla w’a bo min wun dan,suan min bo!’+
15 ?Ń sé sɛ ekun?Ɔ kannin ndɛ kleli min, yɛ ɔ yoli i nuan su sa.Min awlabɔɛ dan’n ti’n,blɛ mɔ n wo nguan nun’n ń má kán min wun ase.
16 ‘Ee Zoova, ninnge sɔ’m* be ti yɛ sran’m be o nguan nun-ɔn,yɛ be ti yɛ wunmiɛn o min nun mɔ n wo nguan nun-ɔn.Á wá yó maan ń yó juejue yɛ ń ká nguan nun.+
17 Kɛ ɔ yo naan n ɲan fɔundi’n, min wla boli min wundan kpa.Kɛ mɔ a klo min’n ti’n,a deli min nunnunlɛ kunman’n i sa nun,+a toli min sa tɛ’m be kwlaa guali ɔ sin lɔ,*+
18 Afin Ndia’n* ɔ kwlá yiman wɔ ayɛ,+yɛ wie’n kwlámanmanman wɔ,+be nga be jra kunman’n nun’n be kwlá faman be wla guaman nanwlɛ mɔ a di’n su.+
19 Be nga be ɲin o su’n, be nga be ɲin o su’n, be yɛ be kwla manman wɔ-ɔ,kɛ nga n su yo i andɛ’n sa.Siɛ kun kwla kan ɔ nanwlɛ dilɛ’n i ndɛ kle imma mun.+
20 Ee Zoova, de min.I liɛ’n blɛ mɔ e o nguan nun’n, é fá miziki bolɛ ninnge mɔ be le ɲanman’né tó min jue mun+ Zoova i sua’n nun.’”+
21 I sin’n Ezai seli kɛ: “Amun fa figie mma kee gato kun be bla, yɛ amun fa ta yra’n su naan ɔ yo juejue.”+
22 Ezekiasi dun mmua usali kɛ: “?Nzɔliɛ benin yɛ ɔ́ klé kɛ ń má sá min sin Zoova i sua’n nunlɔ-ɔ?”+
Ja ngua lɔ ndɛ mun
^ Ebr., “ɔ cɛn mun.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ “Ya” ti Zoova i dunman’n i flɛlɛ kpe’n.
^ Yɛle kɛ, ndɛ nga Zoova kan’n ɔ nin ninnge ng’ɔ yo be’n.
^ Annzɛ “a yili min sa tɛ’m be kwlaa min ɲin bo lɛ.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
