Ezai 47:1-15
47 Ee, Babilɔnin talua,+ wɔ mɔ a nin-a siman bian’n,jra naan tran ndutre’n nun.Ee, Kaldefuɛ’m be wa bla,tran asiɛ wun lika nga famiɛn bia nunman lɛ’n,+afin sran’m be su flɛman wɔ kɛ klanman kun, yɛ be su flɛman wɔ kɛ sran mɔ be di i ba’n kun.
2 Fa yɔbuɛ nga be fa tin like’n naan fa yi sanmlɛn’n.Yi ɔ ti tannin fɛtɛfɛtɛ’n.Ɲɔnɲɔn ɔ tralɛ tɛnndɛn’n, yiyi ɔ ja’m be su.Kpɛ nzue ba mun.
3 Bé wá yí ɔ wun kplɛn.Like ng’ɔ kun ɔ ɲannzuɛn’n bé wá fá fíte gua su.Ń má tú min klunngbɔ,+ yɛ sran fi su kwlá jranman min ɲrun.*
4 “Sran ng’ɔ kpɔ e ti’n,i dunman’n yɛle Zoova m’ɔ ti sonja’m be su kpɛn’n,yɛle Izraɛli Ɲanmiɛn m’ɔ ti Sanwun’n.”+
5 Ee, Kaldefuɛ’m be wa bla,+tran wa diin, yɛ kɔ aosin tuun’n nun lɔ,sran fi su flɛman wɔ kɛ Famiɛn Diwlɛ’m be Wlengbi Bla* kun.+
6 N fali min nvlefuɛ’m bewun ya.+N yoli min aja like’n i finfin,+yɛ n fali be n wlali ɔ sa nun.+Sanngɛ w’a siman be aunnvɔɛ.+Sran oke mun bɔbɔ’n a fali kɔmin su waka m’ɔ yo nɔnnin’n a sieli be su.+
7 A seli kɛ: “Ń yó Wlengbi Bla tititi.”+W’a buman sa sɔ mun be akunndan kpa,w’a buman wafa nga sa sɔ’n i bo’n gúa’n i akunndan.
8 Ee, wɔ mɔ a klo fɛ dilɛ’n,+ sie ɔ su tie,a tran fɔun nun, a se ɔ klun lɔ kɛ:“Min yɛ n o lɛ-ɔ, sran uflɛ fi nunman lɛ.+N su kaciman angbeti.Min mma’m be su fiman min sa le.”+
9 Sanngɛ sa nɲɔn nga mun bé ká lɛ bé tɔ́ ɔ su kpɛ kunngba, cɛn ba kunngba’n nun:+Ɔ mma’m bé fí ɔ sa, yɛ á káci angbeti,ɔ bae dilɛ dan’n, ɔ nin ɔ sran cicilɛ dan’n ti’n,*+sa sɔ’m bé jú ɔ sukekle kpa.+
10 A fali ɔ wla guali ɔ klunwi’n su.A seli kɛ: “Sran fi wunman min.”Ɔ ngwlɛlɛ’n nin ɔ sa silɛ’n be fali wɔ sieli atin tɛ su,yɛ a seli ɔ klun lɔ kɛ: “Min yɛ n o lɛ-ɔ, sran uflɛ fi nunman lɛ.”
11 Sanngɛ ɲrɛnnɛn wá tɔ́ ɔ su,yɛ ɔ wun sasalɛ ninnge’m be nun wie fi su kwlá jrɛnmɛn i.*Sa kekle wá tɔ́ ɔ su, a su kwlá yimɛn i ɔ su.Bé sáci wɔ kpɛ kunngba, i sɔ sacilɛ liɛ’n a nin-a wunman wie le.+
12 Ɔ maan ɔ sran cicilɛ’n nin ɔ bae dilɛ dan’n+mɔ kɛ ɔ fɛ i ɔ kaan nun’n a mian ɔ ɲin yo’n, yo kɔ ɔ ɲrun titi.Atrɛkpa’n, a kwla ɲan su ye,atrɛkpa’n, a kwla yo maan sran’m be sro wɔ.
13 Wɔ afɔtuɛ manfuɛ kpanngban’m be ti’nw’a fɛ.Be nga be sɔ ɲanmiɛn m’ɔ la nglo lɔ plaii’n,* mɔ be nian nzraama mun’n,+mɔ kɛ anglo’n fi uflɛuflɛ’n,be kan sa nga bé wá jú ɔ su’n be ndɛ’n,maan be jaso naan be de wɔ.
14 An nian! Be ti kɛ ijre kee sa.Sin wá yrá be.Be su kwlá deman be wun sin taaman dan’n i sa nun.Sin taaman sɔ’n ɔ timan kɛ sɛnmlɛn mɔ be fa yo be wun yrɛyrɛ’n sa,yɛ ɔ timan kɛ sin mɔ be kwla trɛn i wun’n sa.
15 Ɔ maan kɛ ɔ baefuɛ’m bé wá yó ɔ ɲrun kɛ ngalɛ’n sa,be mɔ kɛ ɔ fɛ i ɔ kaan nun lele’n a di junman kekle be dunman nun’n.Bé wá wlán sa daan, kun kɔ́ i bɔbɔ i lika liɛ.*Sran fi su deman wɔ.+
Ja ngua lɔ ndɛ mun
^ Be kwla se ekun kɛ “e nin sran fi e su yiaman nun klanman.”
^ Ebr., “Famiɛn Bla.”
^ Be kwla se ekun kɛ “kannzɛ bɔbɔ a di bae dan, yɛ a cici sran mun dan’n.”
^ Annzɛ “a su wunman like nga a yo naan ɔ wun sasalɛ ninnge mun b’a kwla kpalo i’n.”
^ Be kwla se ekun kɛ “Be nga be kpɛkpɛ ɲanmiɛn m’ɔ la nglo lɔ plaii’n nun’n”, “Nzraama kannganfuɛ mun.”
^ Ebr., “kun kɔ i bɔbɔ i lika liɛ’n nun.”
