Ezai 56:1-12
56 Ndɛ nga Zoova kan’n yɛ:“An kpli sa nuan su sɛsɛ yolɛ’n i ti,+ amun yo sa ng’ɔ ti su’n,afin ɔ cɛ kan’n, ń má dé sran mun,yɛ ń má yí min sa nuan su sɛsɛ yolɛ’n i nglo.+
2 Sran ng’ɔ yo sɔ’n i liɛ su ti ye!Sran ng’ɔ tra nun kekle’n,m’ɔ di Wunmiɛn-lolɛ-cɛn’n su’n, m’ɔ yomɛn i finfin’n,+m’ɔ yoman sa tɛ wie fi’n, i liɛ su ti ye!
3 Ɔ fataman kɛ aofuɛ ng’ɔ fɛ i wun mantan Zoova’n+ ɔ se kɛ:‘Saan Zoova yí min i nvlefuɛ’m be nun.’Yɛ ɔ fataman kɛ sran nga be sɛli i’n ɔ se kɛ: ‘An nian! N ti waka kee.’”
4 Afin ndɛ nga Zoova kan’n yɛ: “Be mɔ be sali be’n, mɔ be di min wunmiɛn-lolɛ-cɛn’m be su, mɔ be yo like nga min klun jɔ su’n, mɔ be tra min aenguɛ’n i kekle’n,
5 ń má mán be be wla kpɛnlɛ like kun, ɔ nin dunman kun min sua’n nun, ɔ nin min talɛ’m be afiɛn,like sɔ’n i kpa tra ba yasua mun nin ba bla mun.Ń má mán be dunman kun m’ɔ́ ká lɛ tititi-ɔ,dunman sɔ’n su nunnunman.
6 Aofuɛ nga be fa be wun mantan Zoova naan bésú i’n,naan bé kló Zoova i dunman’n,+naan bé káci i sufuɛ’n,be kwlaa nga be di Wunmiɛn-lolɛ-cɛn’n su mɔ be yomɛn i finfin’n,mɔ be tra min aenguɛ’n i kekle’n,
7 ń má fá be ń bá oka m’ɔ ti min liɛ klonglo’n su,+yɛ ń yó maan bé dí aklunjɔɛ min srɛlɛ sua’n nun’n.Tɛ nga kɛ bé yí’n be yra nnɛn’n i kɔlikɔli’n, ɔ nin tɛ onga nga be yi man min’n, ń sɔ́ be nun min tɛ yiwlɛ’n su.Afin bé wá flɛ́ min sua’n kɛ nvlenvle’m be kwlaa be Ɲanmiɛn srɛlɛ sua.”+
8 E Min Zoova m’ɔ Sie Like Kwlakwla’n, m’ɔ su yiayia Izraɛlifuɛ nga be bo sanndili’n be nuan’n,+ i ndɛ ng’ɔ kan’n yɛ:“M’an dun mmua m’an yiayia wie’m be nuan, yɛ ń má yíayía wie’m be nuan ekun be wun lɛ.”+
9 Fie su lɔ nnɛn mun, amun kwlaa amun bla be wa di,bo’n nun lɔ nnɛn mun, amun kwlaa amun bla be wa di.+
10 I klɔ sasafuɛ’m be ɲin ti siwa,+ b’a sieman like fi nzɔliɛ.+Be kwlaa be ti kɛ alua mɔ be ti bobo’n sa, be kwlá boman.+Be lo wunmiɛn ndɛndɛ, be klo lalɛ, be klo ngwlɛ tɔnlɛ.
11 Be ti kɛ alua mɔ be ti aliɛ safuɛ’n sa.Be ku yiman le.Be ti kɛ nnɛn kankanfuɛ mɔ be wunman sa wlɛ’n sa.+Be kwlaa be yoli be klunklo like.Be kwlaa be kunndɛ kɛ bé dí ndrunmun bé fá kunndɛ like. Be se kɛ:
12 “An bla, maan n ko kunndɛ duvɛn,maan e nɔn nzan m’ɔ bo’n naan ɔ bo e.+Ainman yó kɛ andɛ sa, ɔ́ yó kpa dan trá su bɔbɔ.”
