Ezai 59:1-21
59 Amun nian! Zoova i sa’n timan tika naan se kɛ ɔ kwlá deman sran,+annzɛ i su’n timan tre* naan se kɛ ɔ kwlá timan sa.+
2 Sanngɛ amun fɔnlɛ’m be ti’n, amun nin amun Ɲanmiɛn’n amun afiɛn w’a ti nun.+Amun sa tɛ’m b’a yo maan w’a fɛ i ɲrun’n w’a fia amun wun,yɛ ɔ kplinman su kɛ ɔ́ síe i su amun nuan bo.+
3 Mmoja’n w’a yo amun sa klun’m be fiɛn,+yɛ amun fɔnlɛ’n w’a yo amun sa mma’m be fiɛn.Amun nuan’m* be bua ato,+ yɛ amun taaman’n ɔ kan sa ng’ɔ timan kpa’n i ndɛ blɛlɛlɛ.
4 Sran fi kpliman sa nuan su sɛsɛ yolɛ’n i ti,+yɛ sran fi diman nanwlɛ jɔlɛ difuɛ’m be ɲrun.Be fa be wla gua ninnge ngbɛnngbɛn’m be su,+ yɛ be kan ndɛ ngbɛnngbɛn mun.Be wunnzɛ ɲrɛnnɛn’n, kpɛkun be wu sa tɛtɛ yolɛ’n.+
5 Be yo maan wuo mɔ be le bɔyre kpa’n be bobo,kpɛkun be to ndɛnndɛn kɛ akɛndɛwa sa.+Sran kwlaa ng’ɔ́ dí be klenzua’n ɔ́ wú,kpɛkun klenzua nga bé bóbó i’n, ɔnda kun yɛ ɔ́ fín nun fíte-ɔ.
6 Be akɛndɛwa sua’n, ɔ su kwlá yoman kɛ tralɛ sa,like nga be yoli’n be su kwlá fa kataman be su.+Sa nga be yo’n ɔ ti tɛ,nzaje sa yolɛ’n w’a yi be sa’n piɛ.+
7 Be ja’n wanndi ko yo sa tɛ,be kɔ ndɛndɛ be ko gua sran mɔ w’a yoman sa’n i mmoja ase.+Akunndan nga be bu’n ɔ ti tɛ,lika kwlaa nga be sin’n, ɔ ti afɛ nin ɲrɛnnɛn.+
8 Be siman fɔundiatin’n,yɛ sa nuan su sɛsɛ yolɛ’n ɔ nunman be atin’m be su.+Be atin’m be ti klɛklɛ,sran kwlaa ng’ɔ sin be su’n, ɔ su ɲanman fɔundi.+
9 I sɔ’n ti yɛ e nin sa nuan su sɛsɛ yolɛ’n e afiɛn’n ti nun’n niɔn,sa kpa yolɛ’n ɔ juman e wun wa.E kunndɛ kɛ lika’n kpaja, sanngɛ amun nian, lika’n lu!E kunndɛ kɛ lika’n kpaja weiin, sanngɛ aosin tuun’n nun yɛ e nanti-ɔ.+
10 E fuafua e sa e kunndɛ talɛ’n kɛ aɲinsifuɛ wie sa,e fuafua e sa titi kɛ sran m’ɔ leman ɲinma’n sa.+Wia klengle kpa nun’n, e ja’n kpla kɛ nnɔsua nun mɔ lika’n w’a lu’n sa.Kɛ e wo be mɔ be le wunmiɛn’n be afiɛn’n e ti kɛ y’a wu sa.
11 E kpan kɛ nnɛn ngble nga be flɛ i kɛ ursu’n sa titi,e kpan aunnvɔɛ su kɛ auble sa.E kunndɛ sa nuan su sɛsɛ yolɛ’n titi, sanngɛ e wunmɛn i.E kunndɛ delɛ’n titi, sanngɛ e nin i e afiɛn’n ti nun.
12 Ɲin kekle nga e yo’n, be sɔnnin ɔ ɲrun,+e sa tɛ’m be kwlaa be yi wafa nga e ti’n i nglo,+afin e si kɛ e yoli ɲin kekle,e si e fɔnlɛ mun kpa.+
13 E yoli sa tɛ, yɛ e kacili e sin e sili Zoova,e kacili e sin sili e Ɲanmiɛn’n.E kannin ɲrɛnnɛn klelɛ nin ɲin kekle yolɛ ndɛ.+E awlɛn’n nun lɔ’n, e buli ato bualɛ’n i akunndan, yɛ e kannin ato ndɛ mun.+
14 Sa nuan su sɛsɛ yolɛ’n w’a cuɛn i wun w’a wɔ siɛn,+yɛ sa kpa yolɛ’n w’a wɔ mmua,+afin nanwlɛ dilɛ’n i ja w’a kpla klɔ’n i gua’n su,yɛ sa kpa yolɛ’n ɔ kwlá kɔman lɔ.
15 Nanwlɛ dilɛ’n w’a wie,+yɛ sran kwlaa ng’ɔ kaci i sin si sa tɛ yolɛ’n, be fɛn i bo ninnge mun.Zoova wunnin i sɔ liɛ’n, yɛ w’a yomɛn i fɛ,*afin be yoman sa i nuan su sɛsɛ.+
16 Ɔ wunnin kɛ sran fi nunman lɛ,kɛ ɔ wunnin kɛ sran fi nunman lɛ naan w’a kpata be ti’n, i sɔ’n boli i nuan.Ɔ maan i bɔbɔ i sa’n yɛ ɔ fa deli be-ɔ,*i sa nuan su sɛsɛ yolɛ’n ti’n, ɔ ɲannin wunmiɛn yolisa sɔ’n.
17 Ɔ maan ɔ fali sa nuan su sɛsɛ yolɛ’n wlɛli i wun kɛ like kokloko nga sonja’m be fa kata be wue’n su’n sa,kpɛkun delɛ m’ɔ de sran’n* m’ɔ ti kɛ kpongbo kle sa’n ɔ fa wlɛli i ti.+Ɔ fɛli i klunngbɔ tulɛ tralɛ mun wlɛli i wun,+ɔ fali like juejue su yolɛ’n wlɛli i wun kɛ tralɛ tɛnndɛn wie* sa.
18 Ɔ́ wá fá like nga be yoli’n i akatua’n ɔ́ mán be:+Ɔ́ fɛ́ i kpɔfuɛ’m be wun ya, ɔ́ tú i kpɔfuɛ’m be fɔ.+Kpɛkun lika nga nzue bo sin yia be’n, ɔ́ fá like ng’ɔ nin be fata’n ɔ́ mán be.
19 Be nga be o wia atɔliɛ lɔ’n, bé wá sró Zoova i dunman’n,yɛ be nga be o wia afiliɛ lɔ’n, bé sró i aɲrunɲan’n.Afin ɔ́ wá bá kɛ nzue dan wie m’ɔ sonji kpuu,mɔ Zoova i wawɛ’n yɛ ɔ su i bo’n sa.
20 “Sran Ti Kpɔfuɛ’n+ ɔ́ wá bá Siɔn lɔ,+ɔ́ wá kɔ́ Zakɔbu i osu’n nunfuɛ mɔ be kacili be sin sili sa tɛ’n be sin.”+ Ndɛ nga Zoova kan’n yɛ ɔ o lɛ-ɔ.
21 “Min liɛ’n, aenguɛ nga e nin be é trá’n yɛ,”+ Zoova yɛ ɔ kan sɔ-ɔ. “Min wawɛ ng’ɔ o ɔ su’n, ɔ nin min ndɛ nga n fa wlali ɔ nuan’n, be su tuman ɔ nuan nun, yɛ be su tuman ɔ mma’m be nuan nun, nin ɔ anunman’m be nuan nun. Kɛ ɔ fɛ i andɛ’n ɔ́ yó sɔ, yɛ ɔ́ yó sɔ tititi.” Ndɛ nga Zoova kan’n yɛ ɔ o lɛ-ɔ.
Ja ngua lɔ ndɛ mun
^ Ebr., “nɔnnin.”
^ Ebr., “nuan bui mun.”
^ Ebr., “ɔ ti tɛ i ɲrun.”
^ Ebr., “ɔ fali delɛ’n bali-ɔ.”
^ Annzɛ “tralɛ tɛnndɛn m’ɔ leman sa’n.”
^ Annzɛ “kwlalɛ.”
