Ezai 9:1-21
9 Sanngɛ aosin tritri’n su yoman kɛ blɛ mɔ ɲrɛnnɛn tɔli nvle’n su’n sa, ɔ su yoman kɛ laa mɔ be yoli Zabilɔn akpasua’n, ɔ nin Nɛftali akpasua’n be finfin’n sa.+ Sanngɛ kɛ ɔ́ kɔ́ i ɲrun’n, Ɔ́* yó maan atin ng’ɔ o jenvie’n i wun lɔ’n, Zurdɛn’n i asa’n su lɔ’n, yɛle kɛ Galile mɔ nvle uflɛ nun sran’m be tran lɔ’n, ɔ́ ɲán ɲrun.
2 Be nga be nanti aosin tuun kpa’n nun’n,be wunnin kɛ lika’n kpajali dan kpa.Be nga be tran mɛn tuun kpa’n nun’n,kannin’n kpajali be su.+
3 A yoli maan nvlefuɛ’m be wa sɔnnin kpa.A yoli maan aklunjɔɛ nga be di’n, ɔ yoli dan.Be di aklunjɔɛ ɔ ɲrun,be di aklunjɔɛ kɛ fie su ninnge’m be kpɛlɛ blɛ’n nun’n sa,be di aklunjɔɛ kɛ sran mɔ be su cɛcɛ like nga be ɲɛnnin i alɛ kunlɛ nun’n sa.
4 Afin a bubuli kɔmin su waka ng’ɔ tin be su’ni nun,a bubuli waka nga be fa finfin be wati su’n i nun, a bubuli junman su nianfuɛ’n i waka’n nun,kɛ Madianfuɛ’m+ be blɛ su’n sa.
5 Sonja ngbabua kwlaa nga kɛ bé fá nánti’n, asiɛ’n keje’n,ɔ nin tralɛ kwlaa nga mmoja o nun’n,bé yrá be sin nun.
6 Afin b’a wu ba kun b’a man e,+b’a wu ba yasua kun b’a man e.Bé fá sielɛ’n bé wlɛ́ i sa nun,*+bé flɛ́ i kɛ Afɔtuɛ Manfuɛ Kpa,+ Ɲanmiɛn m’ɔ Kwla’n,+ Siɛ m’ɔ o lɛ Titi’n, Fɔundi Wlengbi.
7 Davidi i famiɛn bia’n su’n,+ ɔ nin i famiɛn diwlɛ’n nun’n,i sielɛ’n ɔ́ trɛ́ kɔ́ i ɲrun titi,yɛ fɔundi’n su wieman le.+I sielɛ’n táka kpa,+yɛ sa nuan su sɛsɛ yolɛ’n+ nin sa kpa yolɛ’n+ bésúɛn i bo,kɛ ɔ fɛ i andɛ’n ɔ́ yó sɔ, yɛ ɔ́ yó sɔ tititi.Zoova m’ɔ ti sonja’m be su kpɛn’n, ɔ́ wá wlɛ́ i wun ase yó sa sɔ’n.
8 Zoova kannin ndɛ kun wɔli Zakɔbu,kpɛkun ɔ kpɛnnin su Izraɛli i lika.+
9 Nvlefuɛ’m be kwlaa bésí nun,Efraimunfuɛ mun nin Samarifuɛ munmɔ be tu be wun’n, mɔ be yo ɲin kekle’n, be se kɛ:
10 “Bliki wie’m b’a tɔ,sanngɛ é wá fá yɔbuɛ mɔ be sɛli’n+ é fá kplán.B’a kpɛ sikomɔɔ waka mun,sanngɛ é wá fá sɛdri waka mun é káci be.”
11 Zoova wá yó maan Rezɛn i kpɔfuɛ’m bé jáso i wun,yɛ ɔ́ wá sú i kpɔfuɛ’m be bo naan be yo i like,
12 Sirifuɛ’m bé fín wia afiliɛ lɔ bé bá, yɛ Filistifuɛ’m bé fín wia atɔliɛ lɔ bé bá,*+bé trɛ́ be nuan’n nun dan kpa bé dí Izraɛli.+I kwlaa sɔ’n ti’n, i ya’n kanman ase,yɛ ɔ te tinngɛ i sa’n be wun naan ɔ́ yó be like yaya.+
13 Afin nvlefuɛ’m be saman be sin i m’ɔ yoli be like yaya’n i wun,b’a kunndɛman Zoova m’ɔ ti sonja’m be su kpɛn’n.+
14 Zoova wá kpɛ́ Izraɛlii ti’n nin i lua’n, ɔ nin waka’n i wun fɛfɛwa’n nin ijre’n* cɛn kunngba.+
15 I ti’n yɛle kpɛnngbɛn’n ɔ nin sran m’ɔ le ɲrun kpa’n,yɛ i lua’n yɛle Ɲanmiɛn nuan ijɔfuɛ m’ɔ kan ato ndɛ’n.+
16 Be nga be dun nvlefuɛ nga’m be ɲrun mmua’n, be yo maan be wlan daan,kpɛkun be nga sran sɔ mun be kle be atin’n be wunman kɔwlɛ.
17 I sɔ’n ti’n, Zoova i klun su jɔman be gbanflɛn’mbe wun,yɛ ɔ su siman be mma nga be leman si’n,* ɔ nin be angbeti bla’m be aunnvɔɛ,be kwlaa be nin Ɲanmiɛn b’a bu, yɛ be ti sa tɛ yofuɛ,+ndɛ ng’ɔ fin be nuan fite’n, ɔ ti sinnzin ndɛ.I kwlaa sɔ’n ti’n, i ya’n kanman ase,yɛ ɔ te tinngɛ i sa’n be wun naan ɔ́ yó be like yaya.+
18 Afin klunwi’n jue kɛ sin sa,ɔ yra owieowie mun, ɔ nin ijre tɛtɛ mun.Ɔ́ yrá bo’n nun susrɛ mun,yɛ be wunsrɛn’n fú kɔ́ nglo.
19 Zoova m’ɔ ti sonja’m be su kpɛn’n i ya dan’n ti’n,nvle’n su yra,yɛ bé wá fá nvle’n nunfuɛ mun bé gúa be sin nun,be su yaciman sran fi lɛ, be su yaciman be niaan’n bɔbɔ i lɛ.
20 Bé kpɛ́ like fama su,sanngɛ awe kún be titi.Yɛ bé dí like bɛ su,sanngɛ be ku su yiman.Sran kun dí i bɔbɔ i sa’n i wun nnɛn’n,
21 Manase dí Efraimun,yɛ Efraimun dí Manase.Be bo yó kun Zida i wun.+I kwlaa sɔ’n ti’n, i ya’n kanman ase,yɛ ɔ te tinngɛ i sa’n be wun naan ɔ́ yó be like yaya.+
Ja ngua lɔ ndɛ mun
^ Yɛle kɛ, Ɲanmiɛn.
^ Ebr., “Sielɛ’n trɛ́n i wati su.”
^ Ebr., “bé fín i sin lɔ bé bá.”
^ Be kwla se ekun kɛ “nglesia nɲa’n nin ndɛma’n.”
^ Annzɛ “aika ba mun.”
