Jue Mun 38:1-22
Davidi i jue’m be nun kun-ɔn. Ɔ ti be wla kpɛnlɛ like.
38 Ee Zoova, nán fa ya tu min fɔ,nán fa ya dan man min afɔtuɛ.+
2 Afin ɔ ta mma’m b’a wluwlu min nun,yɛ ɔ sa’n tin min su.+
3 Ɔ klun m’ɔ jɔman min wun’n ti’n, min wunnɛn wunmuan’n yo min ya.
Min sa tɛ’n ti’n, min owie’n nun timan fɔun.+
4 Min fɔnlɛ’m be tramin ti’n su,+be ti kɛ trɔ nɔnnin wie sa, be yo nɔnnin dan ti’n, n kwlá suaman be.
5 Min kannin’m be bɔn yɛ be bu nzue,min sinnzin’n ti.
6 Awlabɔɛ’n w’a kun min kpo, yɛ min akunndan’n w’a sanngan dan.
Aliɛ ba kwlaa nun’n, n nanti sa zuɛɛnzuɛɛn.
7 Sin o min klun lɔ,min wunnɛn wunmuan’n yo min ya.+
8 N wunman min wun fɛ kaan sa, m’an bubu mlɔnmlɔn.
Awlabɔɛ ng’ɔ o min awlɛn’n nun’n ti’n, n kplin kekle kpa.
9 Ee Zoova, a si ninnge nga n kunndɛ be’n be kwlaa,yɛ kplinlɛ nga n kplin’n a ti.
10 Min awlɛn’n si kpukpukpu, min wunmiɛn’n w’a wie,yɛ min ɲinma’m be kpajaman kun.+
11 Ɲrɛnnɛn ng’ɔ o min su’n ti’n, min janvuɛ mun nin be nga e nin be e san nun’n be wanndi min,yɛ min janvuɛ kpa’m be jran mmua lɔ.
12 Be nga be kunndɛ kɛ bé kún min’n, be sua min bo aya.
Be nga be kunndɛ kɛ bé yó min like yaya’n, be kan min kunlɛ ndɛ.+
Be ijɔ be konviabo be kan sran lakalɛ ndɛ aliɛ ba kwlaa nun.
13 Sanngɛ kɛ sutrefuɛ sa’n, n sieman min su n tieman,+kɛ sran m’ɔ kwlá ijɔman sa’n, n ukeman min nuan.+
14 M’an kaci kɛ sran m’ɔ timan sa’n sa,m’an yo kɛ sran m’ɔ kwlá ukemɛn i nuan kplimɛn i ti’n sa.
15 Afin, ee Zoova, wɔ yɛ n minndɛli wɔ-ɔ,+yɛ min Ɲanmiɛn Zoova, a tɛli min su.+
16 Afin n seli kɛ: “Nán maan be sri min,sɛ min ja seli’n, nán maan i sɔ’n ti’n be klun jɔ.”
17 Afin m’an wie tɔ,yɛ afɛ’n wo min su blɛ kwlaa nun.+
18 N dili min fɔnlɛ’n i nanwlɛ,+min sa tɛ’n ti’n, min akunndan’n sanngannin.+
19 Sanngɛ min kpɔfuɛ’m be ti juejue kpa, yɛ be le wunmiɛn,be nga be kpɔ min ngbɛn’n b’a sɔn kpa.*
20 Kɛ n yo be kpa’n, tɛ yɛ be fa tua min kalɛ-ɔ.
Sa kpa mɔ n mian min ɲin n yo’n ti’n, be tanndan min ɲrun.
21 Ee Zoova, nán yi min ase,ee Ɲanmiɛn, nánka mmua lɔ.+
22 Ee Zoova, wɔ mɔ a ti min defuɛ’n,bla ndɛndɛ wa uka min.+
Ja ngua lɔ ndɛ mun
^ Be kwla se ekun kɛ “m’an wunman sa ti’n, sanngɛ min kpɔfuɛ’m b’a sɔn.”
