Jue Mun 5:1-12
Ɔ ti jue tofuɛ’m be su kpɛn’n i liɛ. Neilɔtu* su. Davidi i jue’m benun kun-ɔn.
5 Ee Zoova, tie ndɛ mɔ n kan’n,+fa ɔ ɲin sie i kplinlɛ mɔ n kplin’n su.
2 Ee, min Famiɛn nin min Ɲanmiɛn,fa ɔ ɲin sie i kpanlɛ mɔ n kpan n kunndɛ ukalɛ’n su, afin wɔ yɛ n srɛ wɔ-ɔ.
3 Ee Zoova, á tí min nɛn’n nglɛmun.+
Nglɛmun’n, ń kán sa ng’ɔ o min su’n i ndɛ ń klé wɔ,+ yɛ ń trán ń mínndɛ.
4 Afin a timan Ɲanmiɛn kun m’ɔ klo klunwi-ɔ,+a nin klunwifuɛ wie fi kwlá tranman.+
5 Wun tufuɛ’m be kwlá jranman ɔ ɲrun.
A kpɔ be kwlaa nga be yo klunwi sa mun’n.+
6 Á wá núnnún be nga be kan ato ndɛ mun’n.+
Zoova i ɲin ci nzaje sa yofuɛ mun, ɔ nin sran lakafuɛ mun.*+
7 Sanngɛ min liɛ’n, ɔ sran klolɛ dan’n+ ti’n, ń má wlú ɔ sua’n+ nun lɔ.
Ń kóto ɔ sua m’ɔ ti ɔ liɛ klonglo’n i ndɛnman su ń klé kɛ min ɲin yi wɔ dan.+
8 Ee Zoova, wɔ mɔ a yo sa i nuan su sɛsɛ’n, kle min atin min kpɔfuɛ’m be ti.
Yo wɔ atin’n i weiin man min.+
9 Afin be kwlá lafiman ndɛ nga be kan’n i wie fi su.
Akunndan tɛtɛ yɛ ɔ o be klun-ɔn,be nuan’n ti kɛ ndia mɔ b’a tike su’n sa,be fa be nuan nun fɛ’n be fa laka sran mun.+
10 Sanngɛ Ɲanmiɛn wá bú be fɔ.
Sa nga be cicili’n, ɔ́ yí be bɔbɔ be ase.+
Be fɔnlɛ kpanngban’m be ti’n, maan be kan be bo,afin be yoli ɲin kekle ɔ su.
11 Sanngɛ be kwlaa nga be fia ɔ sin’n, be klun jɔ́,+bé kpán aklunjɔɛ kpanlɛ titi.
Á sásá be,yɛ be nga be klo ɔ dunman’n, be klun jɔ́.
12 Afin, Zoova, á yrá sran kpa’m be su.
Ɔ klun m’ɔ jɔ be wun’n, ɔ́ yó kɛ ɲrɛn dan wie m’ɔ sasa be bue kwlaa su’n sa.+
Ja ngua lɔ ndɛ mun
^ Nian Ndɛ’m be bo tulɛ lika’n nun lɔ.
^ Annzɛ “sran m’ɔ gua mmoja ase’n, m’ɔ laka sran mun’n.”
