Jue Mun 83:1-18
Azafu i jue-ɔ.+
83 Ee Ɲanmiɛn, nán tran lɛ bliin.+
Ee Ɲanmiɛn, nán muan ɔ nuan’n su, nán tran lɛ diin.
2 Afin nian! Ɔ kpɔfuɛ’m be kejeman aɔwi.+
Be nga be kpɔ wɔ’n be tu be wun.*
3 Be fa gblɛ be cici ɔ nvlefuɛ’m be wun ndɛ nvialiɛ nun.
Be cici be nga be ndɛ ti ɔ cinnjin’n* be wun ndɛ.
4 Be se kɛ: “Amun bla maan e nunnun be nvle’n.+
I liɛ’n, sran’m be wla su kpɛnman Izraɛli dunman’n su kun.”
5 Be bo yo kun be bu like nga bé wá yó’n i akunndan.
B’a ti be wun aniɛn* naan bé jáso ɔ wun:+
6 Edɔmun tannin sua mun, ɔ nin Ismaɛlifuɛ mun, Moabu+ nin Agaafuɛ mun,+
7 Gebali, nin Amɔn,+ nin Amalɛki,Filisti+ nin Tir lɔfuɛ mun.+
8 Asiri+ kusu fɛli i wun wlali be nun.
Be suan Lɔtu i mma’m be bo.*+ (Sela)
9 Like nga a fa yoli Madian’n, fa yo be wie.+
Like nga a fa yoli Sizera nin Zabɛn Kisɔn nzue’n i nuan lɔ’n,+ fa yo be wie.
10 Be wuli An-Dɔɔ lɔ.+
Be kacili kɛ nnɛn wakasu sa asiɛ’n su.
11 Yo be sran dandan’m bekɛ a fa yoli Orɛbu nin Zeɛbu sa,+yɛ yo be wlengbi’m* bekɛ a fa yoli Zeba nin Zalmuna sa.+
12 Afin be se kɛ: “Maan e fa mɛn nga Ɲanmiɛn tran nun’n e yo e liɛ.”
13 Ee, min Ɲanmiɛn, yo maan be yo kɛ ijre wie mɔ seke’n su fɛ i kɔ’n sa,+kɛ ijre kee wie mɔ aunmuan’n su fɛ i kɔ’n sa.
14 Kɛ sin m’ɔ yra bo’n sa’n,kɛ sin taaman m’ɔ yra oka’m be sa’n,+
15 fa ɔ aunmuan dan’nfuan be,+fa ɔ aunmuan dan’n m’ɔ yo sro’n fa fuan be.+
16 Ee Zoova, gua be ɲin ase.
I liɛ’n, bé kúnndɛ ɔ dunman’n.
17 Maan ɲannzuɛn kun be tititi, yɛ maan srɛ kun be tititi.
Maan be wun ɲannzuɛn, yɛ maan be nunnun.
18 Maan sran’m be si kɛ wɔ mɔ ɔ dunman’n yɛle Zoova’n,+ɔ kunngba cɛ yɛ a o Like Kwlaa Ti Su asiɛ wunmuan’n su-ɔ.+
Ja ngua lɔ ndɛ mun
^ Annzɛ “be man be ti’n su.”
^ Ebr., “mɔ a fiali be’n.”
^ Annzɛ “tra aenguɛ kun.”
^ Ebr., “Be ti Lɔtu i mma’m be sa.”
^ Annzɛ “siefuɛ mun.”
