Mise 1:1-16
1 Zoova kannin ndɛ kleli Mise*+ m’ɔ fin Moresɛti’n, Zotamun+ nin Akazi+ nin Ezekiasi+ mɔ be ti Zida famiɛn’n+ be blɛ su. Ɔ kannin Samari nin Zerizalɛmun be ndɛ kleli i aolia nun. Ɔ seli kɛ:
2 “Nvlefuɛ mun, maan amun kwlaa amun tie!
Ee asiɛ, a nin ɔ su ninnge’m be kwlaa, amun sie amun su be tie,Zoova o i sua m’ɔ ti i liɛ klonglo’n nun lɔ.
Maan Miɛn Zoova m’ɔ Sie Like Kwlakwla’n kan sa nga amun yoli’n i ndɛ,+
3 afin amun nian! Zoova su fin i lika’n nun lɔ fite.
Ɔ́ wá jrá, yɛ ɔ́ nánti asiɛ’n su lika nglonglo’m be su.
4 Oka’m bé kló i bo,+yɛ kongo’m be nun kpáci
kɛ awɛma sua m’ɔ o sin’n i ɲrun’n sa,kɛ nzue m’ɔ su sonji ndroliɛ kun nun’n sa.
5 Zakɔbu i ɲin kekle’n ti yɛ sa sɔ’m be kwlaa bé jú-ɔ,Izraɛli i mma’m* be sa tɛ’m be ti yɛ sa sɔ’m be kwlaa bé jú-ɔ.+
?Wan ti yɛ Zakɔbu yoli ɲin kekle-ɔ?
?Nán Samarifuɛ’m be ti-ɔ?+
?Yɛ wan ti yɛ lika nglonglo’m be o Zida lɔ-ɔ?+
?Nán Zerizalɛmunfuɛ’mbe ti-ɔ?
6 Ń má yó maan Samari káci yɔbuɛ kwle kun blo lɔ,ɔ́ káci viɲin fie diwlɛ.
Ń má fɛ́ i yɔbuɛ mun ń gúɛ* i kongo’n nun lɔ,yɛ ń má yó maan i bo nga be wlɛli i ase’n ɔ́ fíte su.
7 Bé wá búbú i amuin ng’ɔ sɛli be’n be kwlaa be nun,+yɛ ninnge ng’ɔ ɲannin be i wun atɛ yolɛ nun’n,* bé fá sin wɔ́ be kwlaa be nun.+
Ń má sáci i amuin’m be kwlaa.
Afin i tekle bolɛ akatua’n yɛ ɔ fa ɲannin ninnge sɔ mun-ɔn,yɛ bé wá káci tekle bofuɛ’m be akatua ekun.”
8 I sɔ’n ti’n, ń má kpán yɛ ń bó awuyomo.+
Ń má nánti min ja ngbɛn ɔ nin min wun kplɛn.+
Min kpanlɛ’n yó kɛ blo alua’m be liɛ’n sa,yɛ min sunlɛ’n yó kɛ klɔnsoklo’m be liɛ’n sa.
9 Afin i kannin’n kwlá wieman,+w’a wɔ lele w’a ju Zida.+
Ɲrɛnnɛn’n w’a wɔ lele w’a ju min nvlefuɛ’m be anuan’n nun, w’a ju Zerizalɛmun.+
10 “Nán amun kɛn i ndɛ Gati lɔ,nán amun sun mlɔnmlɔn.
Maan amun la kondo ndutre’n nun Bɛti-Afra* lɔ.
11 Ee Safirfuɛ mun, amun fa amun wun kplɛn ɔ nin amun ɲrun ɲannzuɛn’n be wɔ.
Zaananfuɛ’m b’a fiteman.
Bé wá kpán Bɛti-Ezɛli lɔ,yɛ ɔ su suanman amunbo kun.
12 Marɔtufuɛ’m be minndɛli like ng’ɔ ti kpa’n.
Sanngɛ like ng’ɔ ti tɛ’n yɛ Zoova fa bali Zerizalɛmun anuan’n nun-ɔn.
13 Ee Lakisifuɛ mun,+ amun fa kakaklolo’m be cici nnɛn kpanngɔ’m be sin.
Amun ti yɛ Siɔn i wa bla’n yoli sa tɛ-ɔ,afin ɔ nun yɛ be wunnin Izraɛli i ɲin kekle’n niɔn.+
14 I sɔ’n ti yɛ á wá mán Moresɛti-Gati i like á fá kále i’n niɔn.
Akizibu+ i awlo’n nunfuɛ’m* be lakali Izraɛli famiɛn mun.
15 Ee Maresafuɛ mun,+ ń má fá kwlafuɛ’n* ń kɔ́ amun lɔ.+
Izraɛli i aɲrunɲan’n kɔ́ lele jú Adulamun.+
16 Maan amun kpɛkpɛ amun ti’m be su, amun yi amun ti mun, amun mma mɔ amun klo be kpa’n be ti.
Amun kpɛkpɛ su kɛ anunman ɲin’n i liɛ’n sa,afin be fali be amun sanun ɔli.”+
Ja ngua lɔ ndɛ mun
^ Dunman Misɛli (i bo’n yɛle “?Wan yɛ ɔ ti kɛ Ɲanmiɛn sa-ɔ?”) annzɛ Mikaya (i bo’n yɛle “?Wan yɛ ɔ ti kɛ Zoova sa-ɔ?”) i flɛlɛ kpe’n niɔn.
^ Ebr., “i awlo’n.”
^ Ebr., “ń sánndi.”
^ Annzɛ “i tekle bolɛ akatua’n.”
^ Annzɛ “Afra i awlo’n nun.”
^ Ebr., “i awlo mun.”
^ Annzɛ “sran m’ɔ fɛn sran’m be bo ninnge mun’n.”