Oze 1:1-11
1 Oziasi+ nin Zotamun+ nin Akazi,+ ɔ nin Ezekiasi+ mɔ be ti Zida famiɛn’n,+ nin Zoasi+ i wa Zeroboamun+ m’ɔ ti Izraɛli famiɛn’n be blɛ su’n, Zoova kannin ndɛ kleli Beeri i wa Oze.*
2 Kɛ Zoova kán ndɛ klé Oze’n, i bo bolɛ nun’n, Zoova seli Oze kɛ: “Kɔ ko ja tekle bla kun,* yɛ ɔ́ wú ba mun mán wɔ i tekle bolɛ* sɔ’n nun. Afin tekle bolɛ’n ti’n, nvle’n nunfuɛ’m b’a kaci be sin b’a si Zoova mlɔnmlɔn.”+
3 Ɔ maan ɔ ɔli ko jali Diblaimun i wa bla Gomɛɛ. Yɛ bla’n wunnzɛli kpɛkun ɔ wuli ba yasua kun mɛnnin i.
4 I sin’n, Zoova seli i kɛ: “Tɔn i dunman kɛ Zizreɛli,* afin ɔ ka kaan sa’n ń má tú Zei+ i awlo’n i fɔ, sran nga Zizreɛli kunnin be’n ti.* Yɛ ń má yó maan Izraɛli nvle’n* i nunfuɛ su yoman famiɛn kun.+
5 Cɛn sɔ’n nun’n, ń búbú Izraɛli i ta’n nun Zizreɛli Kongo’n nun lɔ.”
6 Ɔ wunnzɛli ekun kpɛkun ɔ wuli ba bla kun. Yɛ Ɲanmiɛn seli i kɛ: “Tɔn i dunman kɛ Lo-Ruama,* afin n su siman Izraɛli nvle’n* i aunnvɔɛ kun.+ Afin saan ń fúan be.+
7 Sanngɛ ń sí Zida nvle’n* i aunnvɔɛ,+ yɛ min bɔbɔ Zoova mɔ n ti be Ɲanmiɛn’n min yɛ ń dé be-ɔ.+ Nán ta, annzɛ tokofi, annzɛ alɛ kunlɛ, annzɛ nnɛn kpanngɔ mun, annzɛ nnɛn kpanngɔ su fufuɛ mun yɛ ń fá dé be-ɔ.”+
8 Kɛ ɔ kpɛli Lo-Ruama i wunflɛn’n, i sin’n, ɔ wunnzɛli kpɛkun ɔ wuli ba yasua kun.
9 Kpɛkun Ɲanmiɛn seli kɛ: “Tɔn i dunman kɛ Lo-Amin,* afin amun timan min sran yɛ n kusu n timan amun liɛ.
10 “Yɛ Izraɛlifuɛ’m bé wá sɔ́n kɛ jenvie nuan aunɲan mɔ be kwlá sunnzunman annzɛ be kwlá kaman’n sa.+ Yɛ lika nga n seli be lɛ kɛ: ‘Amun timan min nvle’n nunfuɛ’n,’+ ń sé be lɛ kɛ: ‘Amun ti Ɲanmiɛn m’ɔ lafiman’n i mma mun.’+
11 Kpɛkun Zidafuɛ mun nin Izraɛlifuɛ’m bé yía likawlɛ,+ be bo yó kun bé fá sran kun bé síe be su yɛ bé fín nvle’n nun bé fíte, afin Zizreɛli i cɛn’n ɔ́ yó cɛn dan.+
Ja ngua lɔ ndɛ mun
^ Dunman Ozaya i flɛlɛ kpe’n niɔn. I bo’n yɛ: “Ya Deli i.”
^ Annzɛ “bla kun m’ɔ kunndɛ bian sukusuku’n.”
^ Annzɛ “bian kunndɛlɛ sukusuku.”
^ Ebr., “mmoja mɔ Zizreɛli guɛli i ase’n ti.”
^ Ebr., “awlo’n.”
^ I bo’n yɛ: “Ɲanmiɛn Wá Lúa Like.”
^ I bo’n yɛ: “B’a Simɛn i Aunnvɔɛ.”
^ Ebr., “awlo’n.”
^ Ebr., “awlo’n.”
^ I bo’n yɛ: “Amun Timan Min Sran.”
