Riti 3:1-18
3 Cɛn kun’n, Riti i sewi Naomin seli i kɛ: “Min wa, ɔ fata kɛ n kunndɛ ɔ tranwlɛ+ naan ɔ wla gua ase.
2 Boazi ti e osufuɛ.+ A nin i talua mun yɛ be dili junman-ɔn. Andɛ kɔnguɛ’n, ɔ́ wá kɔ́ ɔɔzu bowlɛ lɔ ɔ́ kó kpája ɔɔzu’n nun.
3 I sɔ’n ti’n, wunnzin, kpakpa ngo fanninfannin, wla ɔ tralɛ klanman kpa’n* naan kɔ lika nga be bo ɔɔzu lɔ’n. Sɛ ɔ nin-a wieman like di naan ɔ nin-a wieman nzan nɔn’n, nán maan ɔ wun wɔ.
4 Kɛ ɔ́ kɔ́ lalɛ’n, sie lika ng’ɔ́ lá lɛ’n i nzɔliɛ. Kpɛkun kɔ naan man kondro ng’ɔ kɛtɛ i ja wun’n su, naan la lɛ. Ɔ́ wá kán like ng’ɔ fata kɛ a yo’n, i ndɛ klé wɔ.”
5 Yɛ Riti tɛli i su kɛ: “Like kwlaa nga a se min kɛ n yo’n, ń yó.”
6 Kpɛkun ɔ ɔli ɔɔzu bowlɛ lɔ. Ɔ yoli like kwlaa nga i sewi’n seli i kɛ ɔ yo’n.
7 Kɛ ɔ́ yó sɔ’n, nn Boazi su di like, yɛ ɔ su nɔn nzan. I klun w’a jɔ kpa liɛ su. Kpɛkun ɔ ko lali ɔɔzu kwle’n i wun lɛ. Kɛ Riti wunnin i sɔ’n, ɔ ɔli blɛblɛblɛ, ɔ ko mannin kondro ng’ɔ kɛtɛ i ja wun’n su, kpɛkun ɔ lali lɛ.
8 Kɔnguɛ afiɛn’n, bian’n i wun usuli i. Kɛ ɔ mɛnnin i wun su kan’n, ɔ́ nían-ɔn, bla kun yɛ ɔ lɛ i ja wun yɛ.
9 Ɔ seli kɛ: “?Wan-ɔn?” Bla’n tɛli su kɛ: “Min-ɔn, ɔ sufuɛ Riti-ɔ. Fa ɔ tralɛ dan’n kata ɔ sufuɛ’n su.* Afin a ti e ti kpɔfuɛ.”+
10 Yɛ ɔ seli i kɛ: “Min wa, maan Zoova yo ɔ liɛ ye. Klolɛ nga a fa klo sran’n, w’a yi i nglo dan w’a tra laa liɛ’n.+ Afin w’a suman gbanflɛn’m be su, sɛ be ti yalɛfuɛ-o, sɛ be ti aɲanbeunfuɛ-o.
11 Ɔ maan, min wa, nán ɔ klun titi wɔ. Like kwlaa nga a se n kɛ n yo’n, ń yó mán wɔ.+ Afin klɔ’n* nun sran ngba si kɛ a ti bla kpa.
12 N ti amun ti kpɔfuɛ sakpa.+ Sanngɛ sran uflɛ o lɛ, ɔ ti amun ti kpɔfuɛ wie. I liɛ’n, ɔ mantan amun tra min.+
13 Ka wa kɔnguɛ’n. Sɛ lika’n cɛn naan i waan ɔ́ kpɔ́ ɔ ti’n, maan ɔ kpɔ.+ Sanngɛ sɛ i waan ɔ kpɔman ɔ ti’n, n kan Zoova m’ɔ lafiman’n, n bɔbɔ ń kpɔ́ ɔ ti. La wa lele maan aliɛ cɛn.”
14 Yɛ Riti lɛli i ja wun lɛ-ɔ. Ɔ jasoli nglɛmun ndɛ kpa’n, kɛ ɔ́ yó sɔ’n nn lika’n nin-a titiman naan se kɛ bé wún sran wlɛ. Boazi seli kɛ: “Nán maan sran fi si kɛ bla kun bali ɔɔzu bowlɛ wa.”
15 Ɔ seli ekun kɛ: “Fa tralɛ dan ng’ɔ o ɔ wun’n bla naan trɛ nun.” Yɛ ɔ trɛli nun-ɔn. Kpɛkun Boazi fali ɔɔzu suliɛ nsiɛn* guali nun naan w’a man su w’a mɛn i. I sin’n, Boazi ɔli klɔ.
16 Kɛ Riti juli awlo lɔ’n, i sewi’n usɛli i kɛ: “?Min wa, ɔ yoli sɛ?”* Yɛ Riti kannin like kwlaa nga bian’n yo mɛnnin i’n i ndɛ kleli i-ɔ.
17 Ɔ seli ekun kɛ: “Ɔ fali ɔɔzu sea nsiɛn nga mannin min. Kpɛkun ɔ seli min kɛ: ‘Nán fa ɔ sa ngbɛn to ɔ sewi’n lɔ.’”
18 Naomin seli i kɛ: “Min wa, minndɛ siɛn’n. Nian wafa nga ndɛ’n i bo’n gúa’n. Afin sɛ bian’n nin-a kanman ndɛ nga nin-a wieman andɛ’n, i klun su tɔman nun.”
Ja ngua lɔ ndɛ mun
^ Annzɛ “wla ɔ tralɛ dan’n.”
^ Annzɛ “Nian ɔ sufuɛ’n i lika.”
^ Ebr., “min nvle’n i anuan kwlaa.”
^ Ebr., “?Wan-ɔn?”
