Riti 4:1-22
4 Boazi ɔli klɔ’n i anuan’n nun lɔ+ ko trannin ase. Ɔ́ nían-ɔn, be ti kpɔfuɛ ng’ɔ kɛnnin i ndɛ’n+ su sin lɛ. Yɛ ɔ seli kɛ: “Nja, bla wa naan tran ase.” Yɛ bian’n ɔli ko trannin ase-ɔ.
2 Kpɛkun Boazi flɛli klɔ’n su kpɛnngbɛn blu+ naan w’a se be kɛ: “Amun tran ase wa.” Yɛ be trannin ase-ɔ.
3 I sin’n, Boazi seli be ti kpɔfuɛ sɔ’n kɛ:+ “Ɔ fata kɛ Naomin m’ɔ fin Moabu lɔ bali’n,+ ɔ yo e niaan bian Elimelɛki i asiɛ liɛ’n i atɛ.+
4 Ɔ maan min waan ń bó su ń klé wɔ, naan ń sé wɔ kɛ: ‘To i klɔfuɛ mun nin e kpɛnngbɛn mun be ɲrun wa.+ Sɛ ɔ waan á tó’n,* to. Sanngɛ sɛ a su toman kusu’n, kan maan n ti. Afin wɔ yɛ ɔ fata kɛ a to-ɔ, yɛ min yɛ n su wɔ su-ɔ.’” Bian’n tɛli su kɛ: “N klo kɛ ń tó.”+
5 Yɛ Boazi seli kɛ: “Cɛn nga á tó fie’n Naomin sa nun’n, ɔ fata kɛ a to i Riti m’ɔ fin Moabu’n, m’ɔ ti angbeti’n i sa nun wie. I liɛ’n, asiɛ sɔ’n yó sran ng’ɔ wuli’n i osu’n nunfuɛ’m be liɛ titi.”+
6 Yɛ be ti kpɔfuɛ’n seli kɛ: “N su kwlá toman, afin ɔ cɛman naan m’an saci min bɔbɔ min aja liɛ’n. Ɔ bɔbɔ to. N man wɔ atin kɛ a to, afin n kwlá toman.”
7 Laa Izraɛli lɔ’n, kɛ be waan bé kpɔ́ sran annzɛ like wie ti’n, annzɛ kusu kɛ sran kun i like sín sran uflɛ sa nun’n, wafa nga be yo’n yɛ: Sran’n yi i ja ngbabua’n+ man kunfuɛ’n. Izraɛli lɔ’n, be yo sɔ be fa kle kɛ be nuan w’a sɛ ndɛ’n su.
8 Ɔ maan kɛ bian’n* seli Boazi kɛ: “Ɔ bɔbɔ to’n,” ɔ yili i ja ngbabua’n.
9 Kpɛkun Boazi seli kpɛnngbɛn mun nin be kwlaa nga be o lɛ’n be kɛ: “M’an to Elimelɛki nin Kiliɔnun nin Malɔnun be ninnge’n kwlaa Naomin sa nun. Amun ti e lalofuɛ+ andɛ.
10 Asa ekun’n, m’an ja Riti m’ɔ fin Moabu’n, m’ɔ ti Malɔnun i angbeti’n. I liɛ’n, Malɔnun i asiɛ’n yó i osu’n nunfuɛ’m be liɛ titi.+ Ɔ maan sran ng’ɔ wuli’n i dunman’n su nunnunman i niaan mun nin klɔ’n sufuɛ’m be afiɛn.* Amun ti e lalofuɛ andɛ.”+
11 Be kwlaa nga be o klɔ’n i anuan’n nun lɛ’n nin kpɛnngbɛn’m be seli kɛ: “E ti amun lalofuɛ! Maan Zoova yra bla ng’ɔ su wlu ɔ awlo’n nun’n i su, naan ɔ yo kɛ Rasɛli nin Lea mɔ be nɲɔn’n yɛ be wuli Izraɛlifuɛ mun’n be sa.+ Maan ɔ liɛ yo ye Efrata’n+ su, yɛ maan sran’m be bo ɔ dunman kpa Bɛtleɛmun klɔ’n+ su.
12 Maan ba nga Zoova fanngan nun’n talua nga wá wú be mán wɔ’n ti’n,+ ɔ awlo’n yo kɛ Tamaa nin Zida be wa Perɛzi+ i liɛ’n sa.”
13 Kɛ ɔ yoli sɔ’n, Boazi jali Riti. Ɔ nin i be sili sua. Zoova fanngan nun’n, ɔ wunnzɛli kpɛkun ɔ wuli ba yasua kun.
14 Yɛ bla’m be seli Naomin kɛ: “Maan manmanlɛ’n yo Zoova liɛ. Afin w’a yaciman ɔ lɛ sa ngbɛn. Ɔ mannin wɔ be ti kpɔfuɛ kun andɛ. Maan sran’m be bo bakan’n i dunman Izraɛli nvle’n nun!
15 I* ti’n, w’a ɲan wunmiɛn siɛn’n. Kɛ á wá yó kpɛnngbɛn’n, ɔ́ súan ɔ bo. Afin ɔ sewi m’ɔ klo wɔ kpa’n,+ mɔ i kpa tra ba yasua nso bɔbɔ’n yɛ ɔ wuli i-ɔ.”
16 Naomin fali ba’n naan w’a fa sie i wue’n nun. Kpɛkun ɔ niɛnnin i lika.*
17 Bla nga be nin i be tran lɛ’n, be tɔnnin i dunman. Be seli kɛ: “B’a wu ba yasua kun b’a man Naomin.” Be flɛli i kɛ Obɛdi.+ I yɛ ɔ ti Zese+ m’ɔ wuli Davidi’n i si’n niɔn.
18 Perɛzi i osu’n nun sran mun yɛ:+ Perɛzi wuli Ɛzrɔn,+
19 Ɛzrɔn wuli Ramun, Ramun wuli Aminadabu,+
20 Aminadabu+ wuli Nasɔn, Nasɔn wuli Salmɔn,
21 Salmɔn wuli Boazi, Boazi wuli Obɛdi,
22 Obɛdi wuli Zese,+ yɛ Zese wuli Davidi.+
Ja ngua lɔ ndɛ mun
^ Ebr., “á kpɔ́ i ti’n.”
^ Ebr., “be ti kpɔfuɛ’n.”
^ Ebr., “i sua’n i anuan’n nun.”
^ Yɛle kɛ, Naomin i anunman’n.
^ Annzɛ “ɔ tɛli i.”
