Zakari 4:1-14
4 Anzi ng’ɔ nin min ijɔli’n ɔ sɛli i sin, yɛ ɔ tinngeli min, kɛ nga be fa tinnge sran kun m’ɔ su lafi’n sa.
2 I sin’n, ɔ seli min kɛ: “?Ngue yɛ a wun i-ɔ?”
Ɔ maan n seli kɛ: “N wun kannin siewlɛ kun, i wunmuan’n ti sika ɔkwlɛ,+ kpongbo kun o i ti su nglo. Kannin siewlɛ’n i su kannin’m be ti nso,+ ɛɛn, be ti nso, yɛ kannin’m be o i ti su nglo, i sama’m be ti nso, yɛ kunman o be klun.
3 Olivie waka nɲɔn be o i wun lɛ,+ kun o kpongbo’n i fama su, yɛ kun o i bɛ su.”
4 I sin’n, n usali anzi ng’ɔ nin min su ijɔ’n kɛ: “?Min min, ninnge nga mun be bo yɛle benin?”
5 Ɔ maan anzi ng’ɔ nin min su ijɔ’n usali min kɛ: “?A siman ninnge nga’m be bo?”
N tɛli su kɛ: “Ɛɛn, min min, n siman be bo.”
6 I sin’n, ɔ seli min kɛ: “Ndɛ nga Zoova kan kle Zorobabɛli’n yɛ: ‘“Nán sonja mun yɛ bé yó-ɔ, yɛ nán klɔ sran’m be wunmiɛn’n niɔn,+ sanngɛ min wawɛ’n niɔn,”+ ndɛ nga Zoova m’ɔ ti sonja’m be su kpɛn’n kan’n yɛ ɔ o lɛ-ɔ.
7 ?Ee, oka dan, ngue yɛle wɔ? Á wá káci lika kpɛtɛkplɛɛ+ Zorobabɛli+ i ɲrun. Yɛ ɔ́ wá fá yɔbuɛ m’ɔ o nglo lɔ’n bá, yɛ bé bó ndɛ bé sé kɛ: “Ɔ yo ɲɛnmɛn-o! Ɔ yo ɲɛnmɛn-o!”’”
8 Zoova kannin ndɛ kleli min ekun, i waan:
9 “Zorobabɛli i sa mun yɛ be wlali sua nga i bo ase-ɔ,+ yɛ i bɔbɔ i sa mun yɛ bé wíe i kplán-ɔn.+ Yɛ amún wá sí kɛ Zoova m’ɔ ti sonja’m be su kpɛn’n, ɔ sunmannin min amun sin.
10 ?Wan yɛ ɔ yoli cɛn nga ninnge’m be boli be bo kannganngan’n* i finfin-ɔn?+ Be klun wá jɔ́, yɛ bé wún ɲanman mɔ sunmun o i nuan’n* Zorobabɛli i sa nun. Ɲinma nso nga mun be ti Zoova i ɲinma m’ɔ fa niannian asiɛ wunmuan’n su’n.”+
11 I sin’n n usɛli i kɛ: “?Olivie waka nɲɔn mɔ be o kannin siewlɛ’n i fama su nin i bɛ su’n, be ti ngue nzɔliɛ?”+
12 N usɛli i kpɛ nɲɔn su kɛ: “N wunnin olivie waka sama nɲɔn* mɔ be su fa ngo mɔ i ɲin blo kɛ sika ɔkwlɛ sa’n be guɛ i sika ɔkwlɛ tiyo nɲɔn’m be nun’n. ?Olivie waka sama nɲɔn sɔ’m be ti ngue nzɔliɛ?”
13 Ɔ usali min kɛ: “?A siman ninnge sɔ’m be bo?”
N tɛli i su kɛ: “Ɛɛn, min min, n siman be bo.”
14 Ɔ seli kɛ: “Be yɛle sran nɲɔn mɔ Ɲanmiɛn kpali be sieli be ngunmin’n mɔ be jin asiɛ wunmuan’n i Min’n i wun lɛ’n.”+
Ja ngua lɔ ndɛ mun
^ Annzɛ “yoli ninnge kanngan’m be cɛn’n.”
^ Annzɛ “yɔbuɛ’n”, “etɛn’n.”
^ Yɛle kɛ, waka sama mɔ mma o be su’n.
