Zeremin 11:1-23
11 Ndɛ nga Zoova kan kleli Zeremin’n yɛ. Ɔ seli i kɛ:
2 “Nvlefuɛ mun, amun tie aenguɛ yɛ’n i nun ndɛ mun.
“Kan* ndɛ sɔ mun kle Zidafuɛ mun nin Zerizalɛmunfuɛ mun.
3 Se be kɛ: ‘Zoova m’ɔ ti Izraɛli i Ɲanmiɛn’n waan yoo: “Sran kwlaa ng’ɔ nantiman aenguɛ nga i nun ndɛ’m be su’n, nán maan ɔ ɲan muae le.+
4 I nun mɔ n ko fali amun nannan mun Ezipti lɔ fiteli’n, mɔ n yili be fuu nga be klo blalɛ nun’n+ i nun fiteli’n, yɛ n seli be kɛ be di aenguɛ sɔ’n su-ɔ.+ N seli be kɛ: ‘Amun fa min nuan ndɛ’n su, yɛ amun yo like kwlaa nga n seli amun kɛ amun yo’n. I liɛ’n, amún káci min nvle, yɛ ń káci amun Ɲanmiɛn.+
5 Ɔ maan ń yía nda nga n tali amun nannan mun’n i nuan. N seli be kɛ ń fá mɛn kun mɔ nɔnnɔn nin awɛma nzue be sonji lɔ’n+ ń fá mán be. I sɔ kusu yɛ amun wun i andɛ-ɔ.’”’”
Yɛ n tɛli su kɛ: “Ee Zoova, maan ɔ yo sɔ!”
6 Zoova seli min ekun kɛ: “Bo ndɛ kwlaa nga’m be jɔ Zida lɔ klɔ’m be su nin Zerizalɛmun lɔ akpɔ’m be su. Se kɛ: ‘Amun tie aenguɛ nga i nun ndɛ mun naan amun nian su be nanti.
7 Afin kɛ ɔ fin cɛn mɔ n fali amun nannan mun Ezipti lɔ fiteli lele andɛ’n, n kannin ndɛ n kleli be titi. N seli be titi* kɛ: “Amun fa min nuan ndɛ’n su.”+
8 Sanngɛ b’a sieman be su naan se kɛ bé tíe. Akunndan tɛ nga be bu’n i nuan su sa yɛ be yoli-ɔ.+ I sɔ’n ti’n, n fali ɲrɛnnɛn nga n kannin be ndɛ aenguɛ nga e nin be e trali’n nun’n i kwlaa n yili be su. Afin b’a nantiman aenguɛ sɔ’n i nun ndɛ’n su.’”
9 Zoova seli min ekun kɛ: “Zidafuɛ mun nin Zerizalɛmunfuɛ’m b’a cici min wun ndɛ.
10 I nun mɔ amun nannan’m be waan be nantiman min nuan ndɛ’n su’n, sa tɛ nga be yoli’n, i kunngba’n yɛ be yo-ɔ.+ Be kusu be suli amuin’m be su, yɛ be sɔli be.+ Izraɛlifuɛ mun nin Zidafuɛ’m b’a nantiman aenguɛ nga e nin be nannan mun e trali’n su.+
11 I sɔ’n ti’n, Zoova waan yoo: ‘Ń má fá ɲrɛnnɛn kun ń yí be su.+ Ɔ su to fuanman be. Kɛ bé wá kpán flɛ́ min’n n su tɛman be su. N su nianman be lɔ naan se kɛ ń wún be.+
12 Zida klɔ’m be sufuɛ mun nin Zerizalɛmunfuɛ’m bé kpɛ́ be ɲin be amuin mɔ be yi tɛ man be’n* be wun lɔ. Bé kpán flɛ́ be,+ sanngɛ blɛ kekle sɔ’n nun’n, be amuin’m be su deman be.
13 Afin Zida, ɔ amuin’m be sɔnnin kpanngban kɛ ɔ klɔ’m be sa. Yɛ a kplannin tɛ yiwlɛ kpanngban kɛ Zerizalɛmun klɔ’n nun akpɔ mun sa a fa mannin ɲannzuɛn like’n.* Be su yɛ a yi tɛ man Baali-ɔ.’+
14 “Sanngɛ ɔ liɛ’n* nán srɛ sran nga’m be ti. Nán sun flɛ min kɛ n uka be, nán srɛ man be.+ Afin kɛ ɲrɛnnɛn wá tɔ́ be su mɔ bé sún flɛ́ min’n, n su tɛman be su.
15 ?Ngue ti yɛ min nvle’n nunfuɛ mɔ n klo be kpa’n be wlu min sua’n nunkusu nn be nun kpanngban be yo sa tɛtɛ mun-ɔn??Be kwla man nnɛn ng’ɔ ti sanwun’n* naan ɲrɛnnɛn ng’ɔ su ba’n w’a tɔman ɔ* su??Blɛ sɔ’n nun’n, á bó sro?
16 Zoova flɛli ɔ kɛ olivie waka dan,waka klanman m’ɔ su mma nglanmannglanman’n.I nɛn’n tɛli kekle kpa, yɛ ɔ fali sin yili i waka’n nun,kpɛkun be bubuli i sama mun.
17 “Zoova m’ɔ ti sonja’m be su kpɛn’n, m’ɔ tali ɔ kɛ waka wie sa’n+ ɔ seli kɛ ɲrɛnnɛn wá tɔ́ ɔ su. Afin Izraɛlifuɛ mun nin Zidafuɛ’m be yoli sa tɛ. Be yili tɛ mannin Baali be fa fɔkɔli min awlɛn.”+
18 Zoova, a kannin ndɛ kleli min naan n si nun.Blɛ sɔ’n nun’n, a yoli maan n wunnin like nga be su yo’n.
19 Blɛ sɔ’n nun’n, n ti kɛ bua ba kun mɔ be su kɔ i kunlɛ m’ɔ lo i wun kplɔkɔɔ’n sa.N siman kɛ b’a cici minwun ndɛ:+“Maan e saci waka’n nin i su mma mun,yɛ e kpɛ i nguan’n i sinnaan sran’m b’a bomɛn i dunman kun.”
20 Sanngɛ Zoova m’ɔ ti sonja’m be su kpɛn’n, ɔ di jɔlɛ mun nanwlɛ su.Ɔ niannian be klun akunndan ng’ɔ ti fiawa kpa’n* ɔ nin be awlɛn’n be nun.+Kɛ á wá tú ɔ klunngbɔ’n be su’n, yo maan ɔ yo min ɲrun.Afin n fali min ndɛ liɛ’n n wlali ɔ sa nun.
21 I sɔ’n ti’n, Anatɔtufuɛ+ mɔ be kunndɛ kɛ bé kún wɔ’n, mɔ be se ɔ kɛ: “Nán kan Zoova i nuan su ndɛ’n kun,+ sɛ ɔ timɛn i ti é kún wɔ’n,” be wun ndɛ nga Zoova kan’n yɛ.
22 Zoova m’ɔ ti sonja’m be su kpɛn’n waan yoo: “Ń má mán be ndɛ. Bé fá tokofi kún gbanflɛn mun,+ yɛ awe kún be mma yasua mun nin be mma bla mun lele bé wú.+
23 Sran ba kun sa su kaman lɛ. Afin afuɛ nga i nun yɛ ń má mán Anatɔtufuɛ’m+ be ndɛ’n, ń fá ɲrɛnnɛn ń yí be su.”
Ja ngua lɔ ndɛ mun
^ Ɔ ti weiin kɛ Zeremin yɛ be su kan ndɛ’n kle i-ɔ.
^ Ebr., “N jaso nglɛmun ndɛ kpa’n kpɛkun n kan ndɛ kle be.”
^ Annzɛ “be yra like man be naan sin wunsrɛn’n fu wɔ nglo’n.”
^ Annzɛ “amuin ng’ɔ fa ɲannzuɛn ba’n.”
^ Yɛle kɛ, Zeremin.
^ Yɛle kɛ, tɛ nga be yi be Ɲanmiɛn sua’n nun’n.
^ Yɛle kɛ, Zida.
^ Ebr., “be aklɛnzia’n.”
