Zeremin 21:1-14
21 Ndɛ nga Zoova kan kleli Zeremin’n yɛ. Kɛ ɔ́ yó sɔ’n, nn Famiɛn Sedesiasi+ w’a sunman Malkia i wa Pasii+ nin Maazeya i wa Sofonin+ m’ɔ ti Ɲanmiɛn ɲrun jranfuɛ’n be kɛ be ko se i kɛ:
2 “Yaci, usa Zoova i sa man e. Afin Nebikadnezaa* m’ɔ ti Babilɔnin famiɛn’n w’a fa alɛ w’a wla e sin.+ Atrɛkpa’n, Zoova yó i abonuan sa’m be nun kun ɔ́ fá dé e naan ɔ jaso e lika’n nun wa.”+
3 Yɛ Zeremin seli be kɛ: “Amun ko kan kle Sedesiasi kɛ yoo:
4 ‘Zoova m’ɔ ti Izraɛli Ɲanmiɛn’n waan: “Alɛ ninnge nga amun fali naan amun nin Babilɔnin+ famiɛn’n nin Kaldefuɛ mɔ b’a bo b’a sin b’a yia klɔ’n i wun talɛ’n bé kó kún’n, ń yó maan be ɲin káci amun su lɔ, yɛ ń yía be klɔ nga i afiɛn wa.
5 Ń fá min sa mɔ wunmiɛn o nun dan’n nin min tinmin’n naan min bɔbɔ e nin amun é kún.+ Ya su nin klunngbɔ su yɛ e nin amun é kún-ɔn.+
6 Klɔ sran nin nnɛn nga be o klɔ nga su’n, ń fá ɲrɛnnɛn ń yí be su. Tukpacɛ tɛ kun m’ɔ sa ndɛndɛ’n ɔ́ wá kún be sekeseke.”’+
7 ‘“Zoova waan yoo: “I sin’n, sa ng’ɔ́ wá jú Sedesiasi m’ɔ ti Zida famiɛn’n, nin i nvle’n nun sran dandan mun, nin klɔ nga sufuɛ mun, ɔ nin be kwlaa nga tukpacɛ’n nin alɛ’n* nin awe’n w’a nunnunman be’n, be su’n yɛ. Ń fá be ń wlá Nebikadnezaa* m’ɔ ti Babilɔnin famiɛn’n i sa nun. Ń fá be wlá be kpɔfuɛ mun nin be nga be kunndɛ kɛ bé kún be’n, be sa nun sakpasakpa.+ Ɔ́ fá tokofi kún be. Be su yomɛn i annvɔ, ɔ su siman be aunnvɔɛ, ɔ su kokoman be.”’+
8 “Se nvle nga nunfuɛ’m be kɛ: ‘Zoova waan yoo: “M’an fa nguan atin’n nin wie atin’n m’an sie amun ɲrun.
9 Be nga bé ká klɔ nga nun wa’n, alɛ’n dí be, annzɛ kusu awe’n kún be lele bé wú, annzɛ kusu tukpacɛ’n núnnún be. Sanngɛ be nga bé fíte mɔ bé kó fá be wun wlá Kaldefuɛ mɔ b’a bo b’a sin b’a yia amun’n be sa nun’n, bé ká nguan nun. Like nga bé ɲɛ́n i’n yɛle be nguan’n.”’+
10 “‘Zoova waan yoo: “Afin m’an kpɛ min ɲin klɔ nga su wa naan ń fá ɲrɛnnɛn ń yí nun. N su yomɛn i ye.+ Ń fá klɔ nga ń wlá Babilɔnin famiɛn’n i sa nun,+ kpɛkun ɔ́ wɔ́ nun.”+
11 “‘Zida famiɛn, yɛ amun kwlaa nga amun tran famiɛn’n i awlo’n nun’n, amun tie ndɛ nga Zoova kan’n.
12 Davidi i awlofuɛ mun, Zoova waan yoo:“Nglɛmun kwlakwla’n, amun yo naan sran’m be yo sa i nuan su,yɛ be nga awiefuɛ’m be de be sa nun ninnge mun’n, amun de be.+Sɛ ɔ timɛn i ti’n, amun sa tɛtɛ’m be ti’n,+ya dan nga n fali’n ɔ́ júe kɛ sin sa,+yɛ ɔ́ júe lele sran fi su kwlá nuɛnmɛn i.”’
13 Zoova waan yoo: ‘Wɔ mɔ a tran kongo nun’n,*yɔbuɛ m’ɔ o lika kpɛtɛkplɛɛ nun’n, e nin wɔ y’a ɲɛn i.Amun mɔ amun se kɛ: “?Wan yɛ ɔ kwla fa alɛ wla e sin-ɔn??Yɛ wan mun yɛ be kwla ba kpuu be wa fa e sua mun-ɔn?”
14 Amun ayeliɛ’n i nuan likeyɛ ń fá mán amun-ɔn.’+ Zoova yɛ ɔ kan sɔ-ɔ.‘Yɛ ń fá sin ń yí i bo’n nun,ɔ́ yrá ninnge kwlaa nga be bo sin yiɛ i’n kɔlikɔli.’”+
Ja ngua lɔ ndɛ mun
^ Annzɛ “Nebikadrezaa.” I klɛlɛ wafa kun ekun-ɔn.
^ Annzɛ “Nebikadrezaa.” I klɛlɛ wafa kun ekun-ɔn.
^ Ebr., “tokofi’n.”
^ Annzɛ “lika kpɛtɛkplɛɛ nun’n.”
