Zeremin 22:1-30
22 Zoova waan yoo: “Kɔ Zida famiɛn’n i awlo lɔ naan kan ndɛ nga kle i.
2 Se i kɛ: ‘Zida famiɛn, wɔ mɔ a ti Davidi i famiɛn bia’n su’n, tie ndɛ nga Zoova kan’n. Maan ɔ nvle’n nun junman difuɛ mun, nin ɔ nvle nunfuɛ mun mɔ be sin anuan nga’m be nun’n, be sie be su be tie wie.
3 Zoova waan yoo: “Amun yo naan sran’m be yo sa i nuan su, naan be nanti seiin. Be nga awiefuɛ’m be wuali be sa nun ninnge mun’n, an de be. Nán amun yo aofuɛ mun, nin ba nga be leman si’n,* ɔ nin angbeti bla’m be tɛtɛ.+ Yɛ nán amun gua sran mɔ b’a yoman like fi’n be mmoja ase lika nga nun wa.+
4 Sɛ amun nian ndɛ sɔ’n su sakpa’n, famiɛn nga be ti Davidi i famiɛn bia’n su’n,+ be nin be nvle’n nun sran dandan mun ɔ nin be nvle nunfuɛ’m bé fú kakaklolo mun nin nnɛn kpanngɔ’m be su bé sín sua nga i anuan’m be nun.”’+
5 “Zoova waan yoo: ‘Sanngɛ ń tá nda kɛ sɛ amun faman ndɛ sɔ’m be su’n, bé sáci sua nga mlɔnmlɔnmlɔn.’+
6 “Zida famiɛn’n i awlo’n i su ndɛ nga Zoova kan’n yɛ:‘Min ɲrun’n, a ti kɛ Galaadi sa,a ti kɛ Liban oka’n i ti su’n sa.Sanngɛ ń yó maan á káci kɛ aawlɛ flɛnnɛn sa.Sran fi su tranman ɔ klɔ’m be su kun.+
7 Ń yó maan sran’m bé fá be alɛ ninnge munbé kó sáci wɔ.+Bé kpɛ́kpɛ́ ɔ sɛdri waka nglanmannglanman mun,kpɛkun bé gúa be sin nun.+
8 “‘Yɛ nvle kpanngban kpa be nunfuɛ’m bé wá sín klɔ nga i wun lɛ. Kpɛkun bé úsa be wiengu kɛ: “?Ngue ti yɛ Zoova yoli klɔ dan nga sɔ-ɔ?”+
9 Bé tɛ́ su kɛ: “Kɛ mɔ b’a nantiman aenguɛ nga be Ɲanmiɛn Zoova nin be trali’n su kun’n, mɔ be kotoli amuin’m be bo kpɛkun be sɔli be’n, i ti-ɔ.”’+
10 Nán amun sun sran ng’ɔ wuli’n,yɛ nán amun koko i.Sanngɛ amun sun sran ng’ɔ su kɔ’n leleleafin ɔ su sɛmɛn i sin kun. Yɛ lika nga i nun yɛ be wuli i’n, ɔ su wunmɛn i kun.
11 “Afin Zoziasi i wa Salɔmun*+ m’ɔ sinnin i si Zoziasi i ja nun yoli Zida famiɛn’n,+ m’ɔ jasoli lika nga nun wa’n, i wun ndɛ nga Zoova kan’n yɛ. Ɔ seli kɛ: ‘Ɔ su sɛmɛn i sin wa kun.
12 Afin ɔ́ wú lika nga be trɛli i ɔli lɔ’n nun. Yɛ i ɲinma su wunman lika nga kun.’+
13 Sran ng’ɔ́ kplán sua-ɔ sa nuan su sɛsɛ yolɛ’n timɛn i ndɛ’n,mɔ kɛ ɔ́ yó sua ba nga be o i sua’n i ti su nglonglo lɔ’n, ɔ diman mmla’n su’n,m’ɔ fɛ i wiengu di junman ngbɛn’n,kpɛkun ɔ tuɛmɛn i kalɛ’n, i yako.+
14 Sran sɔ’n se kɛ: ‘Ń kplán sua dan kpa kun.Ń kplán sua ba dandan mun min sua’n i ti su nglo lɔ.Ń wlɛ́ i fenɛtri mun.Ń fá sɛdri waka nglanmannglanman mun ń wláwlá nun sɛsɛsɛ. Kpɛkun ń kɛ́n i ayre ɔkwlɛ bioun.’
15 ?A bu i kɛ, kɛ mɔ sɛdri waka nga a fa yo ɔ ninnge mun’n be sɔnnin tra ɔ wiengu’m be liɛ’n ti’n, á yó famiɛn titi?Ɔ si dili like, yɛ ɔ nɔnnin nzan wie.Sanngɛ i liɛ’n, ɔ yoli maan sran’m be dili mmla’n su, yɛ be yoli sa i nuan su sɛsɛ.+Ɔ maan i liɛ yoli ye.
16 Ɔ dili ɲrɛnnɛnfuɛ mun nin yalɛfuɛ’m be jɔlɛ mun klanman mannin be.Ɔ maan sran’m be dili alaje.‘?Be nga be kan kɛ be si min’n, nɛ́n i sɔ yɛ ɔ fata kɛ be yo-ɔ?’ Zoova yɛ ɔ usa sɔ-ɔ.
17 ‘Sanngɛ like nga ɔ ɲinma’n nin ɔ awlɛn’n be o su’n yɛle kɛ á dí sran’m be lufle fá ɲán ɔ wun,á gúa sran mɔ b’a yoman like fi’n be mmoja ase,á dí ndrunmun kpɛkun á wúa.’
18 “Zoziasi i wa Zozakimun+ m’ɔ ti Zida famiɛn’n, i wun ndɛ nga Zoova kan’n yɛ:‘Be su sunmɛn i be seman kɛ:“Ɔo, min niaan bian’n nin-o we! Ɔo, min niaan bla’n nin-o we!”Be su sunmɛn i be seman kɛ:“Ɔo, min min’n nin-o we! Ɔo, min famiɛn’n nin-o we!”
19 Bé síe i kɛ be fa sie aflunmun’n sa.+Bé cúɛn i fuɛn’n bé yí i Zerizalɛmun klɔ’ni anuan’m be sin lɔ.’+
20 Kɔ Liban lɔ naan kpankekle kpa.Man ɔ nɛn’n su Basan lɔ.Yɛ kpan kekle kpa Abarimun lɔ.+Afin b’a nunnun be kwlaa nga b’a wu ɔ ti kpo’n be sekeseke.+
21 Blɛ mɔ a bu i kɛ like fi su ɲanman wɔ’n, n kannin ndɛ n kleli wɔ.Sanngɛ a seli kɛ: ‘N su faman su.’+Kɛ ɔ fɛ i ɔ kaan nun’n i sɔ yɛ a yo-ɔ,afin a faman min nuan ndɛ’n su.+
22 Aunmuan kun wá fá ɔ sunianfuɛ’m be kwlaaɔ́ kɔ́.+Bé trá be nga b’a wu ɔ ti kpo’n bé kɔ́.I sin’n, bé gúa ɔ ɲin ase, yɛ á wún ɲannzuɛn, ɲrɛnnɛn kwlaa nga be tɔli ɔ su’n ti.
23 Wɔ mɔ a tran Liban lɔ’n,+mɔ ɔ sua’n o sɛdri waka’m be afiɛn’n,+kɛ aklunya’n wá tɔ́ ɔ su’n, á wá kplín lelele.Á wá fɛ́* kɛ bla kun mɔ w’a koto awuliɛ’n sa.”+
24 “Zoova waan yoo: ‘Kɛ mɔ n wo lɛ sakpasakpa’n ti’n, kannzɛ bɔbɔ Zozakimun+ i wa Konia*+ m’ɔ ti Zida famiɛn’n yɛ ɔ ti nga nga be fa sie like nzɔliɛ m’ɔ o min sa fama’n su’n, ń tú i lɛ.
25 Ń fá wɔ ń wlá be nga be kunndɛ kɛ bé kún wɔ’n ɔ nin be nga a sro be kpa’n be sa nun. Ń fá wɔ ń wlá Nebikadnezaa* m’ɔ ti Babilɔnin famiɛn’n nin Kaldefuɛ’m be sa nun.+
26 A nin ɔ nin m’ɔ wuli wɔ’n, ń tó amun ń yí i nvle uflɛ nun. Nán nvle sɔ’n nun yɛ be wuli amun-ɔn, sanngɛ lɔ yɛ amún wú-ɔ.
27 Yɛ be su saman be sin nvle mɔ be wla lo i kpa’n i nun kun le.+
28 ?Konia sɔ’n ti kɛ sɛ kun mɔ be yo i finfin, mɔ w’a bo’n sa??Ɔ ti kɛ sɛ kun mɔ sran fi waan ɔ faman’n sa??Ngue ti yɛ be tɛli i nin i osufuɛ’m be asemɔ be toli be yili i nvle kun mɔ be siman lɔ’n nun-ɔn?+
29 Ee asiɛ,* asiɛ, asiɛ, sie ɔ su tie ndɛ nga Zoova kan’n.
30 Zoova waan yoo:‘Amun klɛ bian nga i dunman’n be wla be nga b’a wuman ba’n be nun.Maan ɔ yo kɛ sran kun mɔ i ɲin su’n, w’a yoman like kpa kun le’n sa.Afin i osu’n nunfuɛ wie fi su tranmanDavidi i famiɛn bia’n su naan se kɛ ɔ́ síe Zida.’”+
Ja ngua lɔ ndɛ mun
^ Annzɛ “aika ba mun.”
^ Be flɛ i ekun kɛ Zoakazi.
^ Ebr., “ɲán ba wulɛ aklunya.”
^ Be flɛ i ekun kɛ Zozakinin annzɛ Zekoniasi.
^ Annzɛ “Nebikadrɛzaa,” i klɛlɛ wafa kun ekun-ɔn.
^ Annzɛ “nvle.”
