Zeremin 25:1-38
25 Kɛ Zoziasi i wa Zozakimun+ yoli Zida famiɛn’n, i afuɛ nnan su’n, Ɲanmiɛn kannin Zidafuɛ’m be kwlaa be wun ndɛ kleli Zeremin. Kɛ Nebikadnezaa* yoli Babilɔnin famiɛn’n, i afuɛ klikli’n su-ɔ.
2 Zidafuɛ’m be kwlaa nin Zerizalɛmunfuɛ’m be kwlaa be wun ndɛ nga Ɲanmiɛn nuan ijɔfuɛ Zeremin kannin’n* yɛ:
3 “Zoova kan ndɛ kle min i afuɛ ablaɔn-nin-nsan (23) yɛ. Kɛ Amɔn i wa Zoziasi+ yoli Zida famiɛn’n, i afuɛ blu-nin-nsan (13) su’n, yɛ ɔ boli min ndɛ kan klelɛ bo-ɔ. Ɔ yoli sɔ lele w’a fa ju andɛ.* N kannin ndɛ’n n kleli amun lele, sanngɛ amun a sieman amun su.+
4 Yɛ Zoova sunmɛnnin i sufuɛ nga be ti i nuan ijɔfuɛ’n amun sin. Ɔ sunmannin be lelele,* sanngɛ amun a sieman amun su naan se kɛ amún tíe be ndɛ’n.+
5 Be seli kɛ: ‘Amun yaci, amun wla amun nzuɛn tɛtɛ mun nin amun ayeliɛ tɛtɛ’m be ase.+ I liɛ’n, mɛn nga Zoova fa mannin amun nin amun nannan mun’n, amún trán nun cɛ́ kpa.
6 Nán amun su amuin’m be su, nán amun sɔ be, yɛ nán amun koto be bo. Nán amun fa amun sa nuan ninnge nga amun sɔ be’n be fa fɔkɔ min awlɛn. Ɔ timɛn i ti’n, ń fá ɲrɛnnɛn ń yí amun su.’
7 “Zoova waan yoo: ‘Sanngɛ amun waan amun sieman amun su min nuan bo. I kpa bɔbɔ’n, amun fali amun sa nuan ninnge nga amun sɔ be’n fa fɔkɔli min awlɛn. Ɔ maan amun kpɛli saɛ ba mannin amun wun.’+
8 “I sɔ’n ti’n, Zoova m’ɔ ti sonja’m be su kpɛn’n waan yoo: ‘“Kɛ mɔ amun a faman min ndɛ’n su’n ti’n,
9 n su yia nvle nga be o nglo lɔ lika’n nun’n be kwlaa,+ yɛ n su yia min sufuɛ Nebikadnezaa* m’ɔ ti Babilɔnin famiɛn’n.+ Ń fá be ń bá naan be fa alɛ wla nvle nga+ nin i nunfuɛ mun nin nvle kwlaa nga be mantan be lɛ’n be sin.+ Ń núnnún be, ɔ maan be nga bé wún be’n bé bó feliman. Ń núnnún be mlɔnmlɔnmlɔn.” Zoova yɛ ɔ kan sɔ-ɔ.
10 “Ń yó maan be su timan bo srolɛ’n nin aklunjɔɛ kpanlɛ’n,+ nin yasua nga w’a ja bla’n i nɛn’n, nin bla nga w’a ja bian’n i nɛn’n kun.+ Ń yó maan be su timan yɔbuɛ nga be fa tin like’n i ngan kun. Yɛ kannin’n su kpajaman kun.
11 Yɛ nvle nga núnnún mlɔnmlɔnmlɔn. I nunnunlɛ sɔ’n yó ɲrɛnnɛn. Yɛ nvle nga be o lɛ’n bé sú Babilɔnin famiɛn’n lele afuɛ ableso (70).”’+
12 “Zoova waan yoo: ‘Kɛ afuɛ ableso (70) ko sin’n,+ sa tɛ nga Babilɔnin famiɛn’n nin nvle sɔ’n be yoli’n ti’n, e nin be é kán.*+ Yɛ ń yó maan Kaldefuɛ’m be mɛn’n tɔ́ srolo, sran fi su tranman su kun mlɔnmlɔn.+
13 Nvle sɔ’n i wun sa kwlaa nga n kannin be ndɛ’n ń má fá yí i su. Sa kwlaa sɔ’m be ti klɛwa fluwa nga nun. Nvlenvle’m be kwlaa be wun ndɛ nga Zeremin kannin’n niɔn.
14 Afin nvle kpanngban nin famiɛn nga be le ɲrun kpa’n,+ bé fá be yó be kanga.+ Yɛ ń fá be nzuɛn’n nin sa tɛ nga be yoli’n i nuan like ń mán be.’”+
15 Zoova m’ɔ ti Izraɛli Ɲanmiɛn’n seli min kɛ: “Fa klowa ng’ɔ o min sa nun yɛ’n, naan fa min ya falɛ duvɛn m’ɔ o nun’n man nvlenvle’m be kwlaa nga n sunman wɔ be nun’n, naan be nɔn.
16 Bé nɔ́n, kpɛkun bé bó nvaka. Bé yó kɛ sran mɔ w’a bo fia’n sa, tokofi mɔ ń má fá klé be nun’n ti.”+
17 N fali klowa ng’ɔ o Zoova i sa nun’n. Kpɛkun n fa ko mannin nvle kwlaa nga Zoova sunmannin min be nun’n, naan b’a nɔn.+
18 N boli i bo Zerizalɛmun nin Zida klɔ mun,+ nin lɔ famiɛn mun, nin lɔ sran dandan’m be su, naan be nunnun mlɔnmlɔn, naan be yo sran’m be ɲrɛnnɛn, naan be bo feliman yɛ be fa be bo sannzan,+ afin ɔ́ kpɛ́n su andɛ.
19 I sin’n, n fa mannin Faraɔn m’ɔ ti Ezipti famiɛn’n nin i junman difuɛ mun, nin i nvle’n nun sran dandan mun nin i nvle’n nunfuɛ’m be kwlaa,+
20 ɔ nin lɔ aofuɛ’m be kwlaa naan b’a nɔn. Kpɛkun n fa mannin Izi lɔ famiɛn’m be kwlaa. I sin’n n fa mannin Filistifuɛ’m+ be famiɛn’m be kwlaa, i Askalɔn+ lɔ liɛ’n nin-o, i Gaza lɔ liɛ’n nin-o, i Ekrɔn lɔ liɛ’n nin-o, be nga be ka Asdɔdu lɔ’n be liɛ’n nin-o.
21 Edɔmun,+ nin Moabu,+ nin Amɔnfuɛ mun.+
22 Tir lɔ famiɛn’m be kwlaa, Sidɔn+ lɔ famiɛn’m be kwlaa, nin nvle nga be o jenvie’n i afiɛn lɔ’n be su famiɛn’m be kwlaa.
23 Dedan,+ Tema, Bizi, nin be kwlaa nga be kpɛkpɛ be srɔ su ndrɛ’n.+
24 Arabu’m+ be famiɛn’m be kwlaa, nin sran wafawafa kwlaa nga be tran aawlɛ flɛnnɛn’n nun lɔ’n be famiɛn’m be kwlaa.
25 Zimri lɔ famiɛn’m be kwlaa, Elamun+ lɔ famiɛn’m be kwlaa, nin Medifuɛ’m+ be famiɛn’m be kwlaa.
26 Yɛ famiɛn nga be o nglo lɔ lika’n nun’n be kwlaa, be nga be o mmua-o, be nga be o koko-o, ɔ nin asiɛ wunmuan’n su famiɛn diwlɛ onga’m be kwlaa, bé nɔ́n i kunngunngun. I sin’n, Sesaki*+ lɔ famiɛn’n wá nɔ́n i liɛ.
27 “Se be kɛ: ‘Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: “Tokofi nga n su wa fa kle amun nun’n ti’n, amun nɔn naan amun bo, yɛ amun fi. Amun fin ase naan nán amun kwla jaso kun.”’+
28 Yɛ sɛ be waan be sɔman klowa ng’ɔ o ɔ sa nun’n nun naan be nɔnman’n, se be kɛ: ‘Zoova m’ɔ ti sonja’m be su kpɛn’n waan yoo: “Amun nɔn i kekle nun!
29 ?Afin amun nian, sɛ n dun mmua n fa ɲrɛnnɛn n yi i klɔ nga n dunman o su’n+ i su’n, amun yɛ ń yáci amun lɛ-ɔ?”’+
“‘N su yaciman amun lɛ. Afin n su flɛ tokofi kun naan ɔ kle asiɛ wunmuan’n su sran’m be kwlaa be ɲrɛnnɛn.’ Zoova m’ɔ ti sonja’m be su kpɛn’n yɛ ɔ kan sɔ-ɔ.
30 “Kan min nuan su ndɛ kwlaa nga kle be. Se be kɛ:‘Zoova m’ɔ o nglo lɔ’n, ɔ́ kpán kekle kpa.Kɛ ɔ o i tranwlɛ m’ɔ ti sanwun’n nun lɔ’n, ɔ́ kpán kekle naan be ti.Ɔ́ kpɛ́n i tranwlɛ’n su kekle kpa.Ɔ́ kpán kɛ be nga be cuɛn viɲin nzue’n be sa,ɔ́ tó kwlalɛ jue asiɛ’n sufuɛ’m be kwlaa be su.’
31 ‘Kpankpanlɛ’n jú asiɛ’n i tiwatiwa’m be su,afin Zoova nin nvle’m b’a ɲɛn i.I bɔbɔ dí klɔ sran’m be kwlaa be jɔlɛ.+Yɛ ɔ́ yí klunwifuɛ mun mán naan tokofi’n kun be.’ Zoova yɛ ɔ kan sɔ-ɔ.
32 Zoova m’ɔ ti sonja’m be su kpɛn’n waan yoo:‘Amun nian, ɲrɛnnɛn wá tɔ́ nvle’m be su kunngunngun,+yɛ aunmuan dan kpa kun fin asiɛ’n i tiwatiwa’m be su, ɔ su ba.+
33 “‘Cɛn sɔ’n nun’n, be nga Zoova kún be’n, bé fɛ́ i asiɛ’n i bue kun su lele fá jú i bue uflɛ su. Be su sunman be, be su isaman be saka’n naan se kɛ bé síe be. Bé káci kɛ angrɛ sa asiɛ’n su.’
34 Bua sunianfuɛ mun, amun sun, amun kpan kekle kpa!Amun mɔ amun ti bua’m be nun kpakpa mun’n amun la kondo,afin amun kunlɛ nin amun bo sanndilɛ blɛ’n w’a ju,yɛ amún tɔ́ kɛ sɛ klanman wie sa.
35 Bua sunianfuɛ’m be leman kɔwlɛ,bua’m be nun kpakpa’m be leman lika naan b’a wanndi b’a wɔ lɔ.
36 Amun nian, bua sunianfuɛ’m be kpanyɛ bua’m be nun kpakpa’m be su sun,afin Zoova su saci be didiwlɛ’n.
37 Ya dan nga Zoova fali’n ti’n,sran fi nunman lika nga be nun ti fɔun laa’n be nun kun.
38 Tokofi m’ɔ siman aunnvɔɛ’nnin ya dan ng’ɔ fali’n ti’n,w’a fin i lawlɛ’n nun lɔ w’a fite kɛ asɔmɔli gbanflɛn*+ wie sa.Afin kɛ a wun be nvle’n sa’n, ɔ yo ɲrɛnnɛn dan.”
Ja ngua lɔ ndɛ mun
^ Annzɛ “Nebikadrezaa.” I klɛlɛ wafa kun ekun-ɔn.
^ Annzɛ “ndɛ nga Ɲanmiɛn nuan ijɔfuɛ Zeremin kan kleli be’n.”
^ Ebr., “N jaso nglɛmun ndɛ kpa’n, n kan ndɛ.”
^ Ebr., “Ɔ jaso nglɛmun ndɛ kpa’n, ɔ sunman be.”
^ Annzɛ “Nebikadrezaa.” I klɛlɛ wafa kun ekun-ɔn.
^ Annzɛ “ń tú be fɔ.”
^ Kɔlɛ’n Babɛli (Babilɔnin) i dunman kun ekun-ɔn.
^ Annzɛ “asɔmɔli gbanflɛn kun mɔ i kɔmin nun ndrɛ’n ti vɔɔ’n.”
