Zeremin 30:1-24
-
Bé wá sín be osu’n nun yɛ bé yó juejue (1-24)
30 Zoova seli Zeremin kɛ yoo:
2 “Ndɛ nga Zoova m’ɔ ti Izraɛli Ɲanmiɛn’n ɔ kan’n yɛ: ‘Ndɛ nga ń má kán klé wɔ’n, klɛ be fluwa kun nun.
3 Zoova waan yoo: “Nian, blɛ kun wá jú’n ń yíayía Izraɛli nin Zida+ mɔ be ti min sran’n, mɔ be trali be ɔli’n be nuan, kpɛkun ń fá be ń bá nvle nga n fa mannin be nannan mun’n i nun ekun. Kpɛkun ɔ́ káci be liɛ ekun.”’+ Zoova yɛ ɔ kan sɔ-ɔ.”
4 Ndɛ nga Zoova kan kleli Izraɛlifuɛ mun nin Zidafuɛ mun’n yɛ.
5 Zoova waan yoo:“Kɛ srɛ dan kunnin sran mun mɔ bé kpán’n, e tili.Srɛ dan kpa kun sran’m be kwlaa, fɔundi nunman lɛ.
6 Amun yaci, amun usa be nian. ?Yasua kwla cinnjin wu ba??Sɛ ɔ kwlá yoman sɔ’n, yɛ nn ngue ti yɛ yasua’m be kwlakwla b’a fa be sa b’a sie be ku’n su*kɛ bla kun m’ɔ su wu ba’n sa-ɔ?+?Ngue ti yɛ be ɲrun’n w’a kpa fuai sɔ-ɔ?
7 Nanwlɛ, cɛn sɔ’n yo sro* kpa.+Be nin-a wunmɛn i wunsu le.Cɛn sɔ’n nun’n Zakɔbu wá wún i ɲrun kpa,sanngɛ ɔ́ fín nun fíte.”
8 Zoova m’ɔ ti sonja’m be su kpɛn’n waan yoo: “Cɛn sɔ’n nun’n, ń má búbú waka ng’ɔ o be kɔmin su’n nun. Ń má kpɛ́kpɛ́ ɲanman nga be fa cili be’n be nun. Yɛ aofuɛ’m be su faman be yoman be kanga kun.
9 Bé sú Zoova m’ɔ ti be Ɲanmiɛn’n ɔ nin Davidi mɔ ń fɛ́ i ń síe be su famiɛn’n.”+
10 Zoova waan yoo: “Zakɔbu, wɔ mɔ a ti min sufuɛ’n, nán srɛ kun wɔ,Izraɛli, nán ɔ klun titi wɔ,+afin ń kó dé wɔ mmua lɔ,ń kó dé ɔ osu’n nunfuɛ nga be trali be ɔli mɛn wie nun’n.+Zakɔbu wá sɛ́ i sin. I wla wá gúa ase. Be su klemɛn i yalɛ.Yɛ sran fi su wlɛmɛn i ɲin nglonglo.”+
11 Zoova waan yoo: “N jin ɔ sin naan ń dé wɔ.Nvle nga n yoli maan a bo sanndili be nun’n ń núnnún be kwlaa.+Sanngɛ ɔ liɛ’n, n su nunnunman ɔ wie.+Ń tú ɔ fɔ kɛ ng’ɔ nin i fata’n sa.N su yaciman ɔ lɛ. Saan ń tú ɔ fɔ.”+
12 Zoova waan yoo:“Ɔ tukpacɛ’n leman ayre.+Ɔ kannin’n su wuman le.
13 Sran fi nunman lɛ naan w’a kpli ɔ ti,ɔ kannin’n leman ayre.A su kwlá yoman juejue.
14 Be nga be wuli ɔ ti kpo’n be kwlaa be wla fili wɔ.+Be baman ɔ sin kun mlɔnmlɔn.Ɔ sa tɛ dan nga a yoli’n, ɔ nin ɔ ninnge tɛtɛ nga a yoli be’n be ti’n,+n yoli ɔ like yaya kɛ ɔ kpɔfuɛ yɛle min sa.+N tuli ɔ fɔ kɛ klunwifuɛ yɛle min sa.
15 ?Ngue ti yɛ ɔ tukpacɛ’n ti’n a kpan sɔ-ɔ?Ɔ awlabɔɛ’n leman ayre.Ɔ sa tɛ dan nga a yoli’n ɔ nin ɔ ninnge tɛtɛ nga a yoli be’n+be ti yɛ n yoli ɔ sɔ-ɔ.
16 Sanngɛ be kwlaa nga be sacili wɔ’n, bé sáci be wie.+Yɛ bé trá ɔ kpɔfuɛ’m be kwlaa bé kɔ́.+Be nga be isali ɔ bo ninnge mun’n, sran uflɛ wá ísa be liɛ mun wie.Yɛ be nga be fɛnnin ɔ sa nun ninnge’m be kwlaa’n, ń yó maan sran uflɛ fɛ́n be liɛ mun wie.”+
17 Zoova waan yoo: “Kannzɛ be kannin ɔ ndɛ seli kɛ a ti bla kun mɔ be kɛnnin i bo’n,mɔ be flɛli wɔ kɛ ‘Siɔn mɔ i ndɛ loman sran fi’n,’+sanngɛ ń yó ɔ juejue kpɛkun ń yó maan ɔ kannin’mbé wú.”+
18 Zoova waan yoo:“Siɛn’n, n su yiayia be kwlaa nga be tran Zakɔbu+ i tannin sua’m be nun mɔ be trali be ɔli’n.Yɛ ń sí i tannin sua’m be aunnvɔɛ.Yɛ bé wá kplán klɔ’n ekun i kpɔlɛ’n su.+Yɛ bé wá kplán fiawlɛ sua’n i osu laa’n nun.
19 Bé tí asenna jue ɔ nin sran’m be srilɛ lɔ.+Ń yó maan bé trɛ́, be su kaman kaan.+Ń yó maan bé sɔ́n kpanngban kpa,*kpɛkun be su kaman kaan.+
20 Zakɔbu i mma’m bé sá be sin bé yó kpa kɛ laa’n sa.I sran’m be bo wá táka kpa min ɲrun.+E nin be kwlaa nga be kleli i yalɛ’n é ɲɛ́n i.+
21 I nvle’n nunfuɛ’m be nun yɛ i sran dan’n ɔ́ fín-ɔn.I osu’n nunfuɛ kun yɛ ɔ́ wá yó siefuɛ’n niɔn.Ń yó maan ɔ́ wúnnge wa yɛ ń yó maan ɔ́ mántan min.”“?Afin sɛ m’an seman sran kun kɛ ɔ to min wa’n, wan yɛ ɔ kwla si i wue’n nun se kɛ ɔ́ tó min wa-ɔ?” Zoova yɛ ɔ kan sɔ-ɔ.
22 “Amún yó min nvle,+ yɛ min kusu ń yó amun Ɲanmiɛn.”+
23 Amun nian! Aunmuan dan kun m’ɔ fin Zoova’n wá fíta kekle kpa.+Ɔ́ yó kɛ seke dan kun sa. Kpɛkun ɔ́ kpɛ́ kekle kpa klunwifuɛ’m be ti’n su.
24 Sɛ Zoova nin-a yiaman like nga i awlɛn o su kɛ ɔ́ yó’n i nuan’n,i ya dan’n nin-a kanman ase.+Mɛn’n i awieliɛ blɛ’n nun’n, amún wún i sɔ liɛ’n i wlɛ weiin.+
Ja ngua lɔ ndɛ mun
^ Annzɛ “be le be wi’n nun.”
^ Ebr., “cɛn sɔ’n ti dan.”
^ Be kwla se ekun kɛ “bé ɲán ɲrun.”
