Zeremin 37:1-21
37 Yɛ Zoziasi i wa Sedesiasi+ sinnin Zozakimun i wa Konia*+ i osu dili famiɛn-ɔn. Afin Nebikadnezaa* fɛ i sieli Zida nvle’n su famiɛn.+
2 Sanngɛ i bɔbɔ nin nvle’n nun sran dandan mun nin nvle’n nunfuɛ’m be nun wie fi w’a fɛmɛn i su w’a siemɛn i ndɛ nga Zoova seli Zeremin m’ɔ ti i nuan ijɔfuɛ’n kɛ ɔ kan kle be’n i su.
3 Famiɛn Sedesiasi sunmannin Selemia i wa Zeikali+ nin Maazeya m’ɔ ti Ɲanmiɛn ɲrun jranfuɛ’n i wa Sofonin,+ Zeremin m’ɔ ti Ɲanmiɛn nuan ijɔfuɛ’n i sin naan be ko se i kɛ: “Yaci, srɛ Zoova m’ɔ ti e Ɲanmiɛn’n man e.”
4 Blɛ sɔ’n nun’n, kɛ mɔ be nin-a wlaman Zeremin i bisua’n ti’n, ɔ kwla kɔ sran’m be wun.+
5 Kɛ Kaldefuɛ mɔ be bo sin yiali Zerizalɛmun’n be tili i kɛ Faraɔn i sonja’m be fin Ezipti+ lɔ be su ba’n, be cuɛnnin be wun Zerizalɛmun lɛ be ɔli.+
6 Yɛ Zoova kannin ndɛ kleli Zeremin m’ɔ ti i nuan ijɔfuɛ’n. Ɔ seli i kɛ:
7 “Zoova m’ɔ ti Izraɛli Ɲanmiɛn’n waan yoo: ‘Ndɛ ng’ɔ fata kɛ amun kan kle Zida famiɛn’n, m’ɔ sunmannin amun min sin kɛ amun wa usa min sa’n yɛ: “Nian, Faraɔn i sonja mɔ be su ba ɔ ukalɛ’n, bé wá sá be sin Ezipti m’ɔ ti be nvle’n i nun lɔ.+
8 Yɛ Kaldefuɛ’m bé wá sá be sin. Bé fá alɛ wlá klɔ nga i nunfuɛ’m be sin. Bé útu klɔ’n kpɛkun bé fá sin bé wɔ́ nun.”+
9 Zoova waan yoo: “Nán amun laka amun wun se kɛ: ‘Kaldefuɛ’m bé wá jáso e wun wa bé kɔ́ mmua.’ Afin be su kɔman lika fi.
10 Kannzɛ bɔbɔ amun kwla Kaldefuɛ’m be sonja nga be nin amun ba kunlɛ’n be kwlaa’n naan be sran nga amun yoli be like yaya’n be ngunmin yɛ be kali lɛ’n, sran sɔ’m bé jáso, bé fín be tannin sua’m be nun bé fíte, kpɛkun bé fá sin bé wɔ́ klɔ nga nun.”’”+
11 Kɛ Faraɔn i sonja’m be ti’n, Kaldefuɛ’m be sonja’m be cuɛnnin be wun Zerizalɛmun lɛ be ɔli’n,+
12 Zeremin kunndɛli kɛ ɔ́ jáso Zerizalɛmun lɛ ɔ́ kɔ́ Bɛnzamɛn akpasua’n+ su lɔ naan be fɛ i lika liɛ ng’ɔ ko ɲɛn i be osu’n nun’n be mɛn i.
13 Sanngɛ kɛ Ɲanmiɛn nuan ijɔfuɛ Zeremin juli Bɛnzamɛn Anuan’n nun lɛ’n, Anania i wa Selemia i klun ba liɛ Iria m’ɔ ti gladi difuɛ’m be su kpɛn’n trɛli i. Kpɛkun ɔ seli i kɛ: “A su wanndi kɔ Kaldefuɛ’m be sin.”
14 Sanngɛ Zeremin seli i kɛ: “Ato-ɔ. Nán Kaldefuɛ’m be sin yɛ n su kɔ-ɔ.” Sanngɛ Iria w’a faman su. Ɔ trali Zeremin, kpɛkun ɔ fɛ i ko mannin sran dandan mun.
15 Sran dandan’m be fali Zeremin i wun ya dan.+ Be boli i kpɛkun be wlɛli i bisua*+ Zoonatan m’ɔ ti fluwa klɛfuɛ’n i sua’n nun lɔ. Afin be fali sua sɔ’n be kacili bisua.
16 Be wlali Zeremin i bisua* sua ba mɔ be o asiɛ’n i bo lɔ’n be nun kun nun. Yɛ ɔ kali lɔ cɛn ba kpanngban.
17 I sin’n, Famiɛn Sedesiasi sunmannin sran kɛ be ko fɛ i be bla. Kpɛkun ɔ fɛ i ɔli aamiɛn i awlo lɔ ko usɛli i sa.+ Ɔ usɛli i kɛ: “?Zoova kannin ndɛ kleli wɔ?” Zeremin tɛli i su kɛ: “Ɛɛn!” Yɛ ɔ kan guali su kɛ: “Bé fá wɔ bé wlɛ́ i Babilɔnin famiɛn’n i sa nun.”+
18 Zeremin usali famiɛn Sedesiasi kɛ: “?Sa tɛ benin yɛ n yoli wɔ nin ɔ sran mun nin nvle nga nunfuɛ mun, mɔ i ti yɛ a wlali min bisua-ɔ?
19 ?Siɛn’n, amun Ɲanmiɛn nuan ijɔfuɛ nga be seli amun kɛ: ‘Babilɔnin famiɛn’n su faman alɛ wlaman wɔ nin nvle nga nunfuɛ mun amun sin’n,’ be o nin?+
20 Ɔ maan min min, famiɛn, yaci sie ɔ su. Yaci, si min aunnvɔɛ. Nán fa min sa min sin Zoonatan+ m’ɔ ti fluwa klɛfuɛ’n i awlo lɔ. Ɔ timɛn i ti’n, ń wú lɔ.”+
21 Yɛ famiɛn Sedesiasi seli kɛ be fa Zeremin be sie i Gladi Difuɛ’m be Awlo Klun’n i nun lɔ.+ Kpɛkun nglɛmun kwlakwla’n, be blɛ i kpanwun kukluku kun mɔ be tɔnnin i kpanwun tɔnfuɛ’m+ be atin’n su lɔ’n. Be yoli sɔ lele naan kpanwun w’a wie klɔ’n nun.+ Yɛ Zeremin kali Gladi Difuɛ’m be Awlo’n i klun lɔ-ɔ.
Ja ngua lɔ ndɛ mun
^ Be flɛ i ekun kɛ Zozakinin nin Zekoniasi.
^ Annzɛ “Nebikadrezaa.” I klɛlɛ wafa kun ekun-ɔn.
^ Ebr., “sua nga be bo sran’m be kpanwun lɔ’n nun.”
^ Ebr., “sua’n i kunman’n nun.”
