Zeremin 43:1-13
43 Zeremin kannin ndɛ kwlaa nga Zoova m’ɔ ti be Ɲanmiɛn’n seli i kɛ ɔ kan kle nvlefuɛ’m be kwlaa’n. Ndɛ kwlaa nga Zoova m’ɔ ti be Ɲanmiɛn’n sunmɛnnin i kɛ ɔ ko kan’n, ɔ niannin su sɛsɛsɛ ɔ kan kleli be. Kɛ ɔ wieli ndɛ’n i kan’n,
2 Osaya i wa Azaria nin Karea i wa Zoanan+ ɔ nin tutrefuɛ’m be kwlaa nga be o lɛ’n be seli Zeremin kɛ: “Ndɛ nga a su kɛn i lɛ’n ti ato. Zoova m’ɔ ti e Ɲanmiɛn’n w’a sunmanman ɔ kɛ a wa se e kɛ: ‘Nán amun wɔ Ezipti naan amun ko tran lɔ.’
3 Sanngɛ Neria i wa Bariki+ yɛ ɔ wlawlali ɔ kɛ a kan ndɛ sɔ mun kle e, naan e fa e wun wla Kaldefuɛ’m be sa nun, naan be kun e annzɛ be tra e be wɔ Babilɔnin-ɔn.”+
4 Ɔ maan Karea i wa Zoanan nin sonja’m be su kpɛn’m be kwlaa nin nvlefuɛ’m be kwlaa b’a faman Zoova i nuan ndɛ’n su. Be waan be kaman Zida nvle’n nun lɛ.
5 Sanngɛ Karea i wa Zoanan nin sonja’m be su kpɛn’m be kwlaa be fali Zidafuɛ nga be kali lɛ’n be kwlaa ɔli. Sran sɔ mun yɛle be nga be bo sanndili nvle’m be nun mɔ be sali be sin be wa trannin Zida nvle’n nun lɛ ekun’n.+
6 Be fali yasua mun nin bla mun nin ba mun ɔ nin famiɛn’n i wa bla mun, ɔ nin be kwlaa nga Nebizaradan+ m’ɔ ti gladi difuɛ’m be su kpɛn’n fa be wlɛli i Safan+ i wa Aikamun+ i klun ba liɛ Gedalia+ i sa nun’n. Be fali Ɲanmiɛn nuan ijɔfuɛ Zeremin nin Neria i wa Bariki wie.
7 Kpɛkun be ɔli Ezipti nvle’n nun lɔ. B’a faman Zoova i nuan ndɛ’n su. Be ɔli lele be juli Tapanɛsi.+
8 Kɛ be juli Tapanɛsi lɔ’n, Zoova kan ndɛ kleli Zeremin. Ɔ seli i kɛ:
9 “Fa yɔbuɛ dandan wie mun. Kpɛkun Zifu’m be kwlaa be ɲrun lɛ’n, fa be fiɛ i Faraɔn i sua ng’ɔ o Tapanɛsi lɛ’n i ɲrun lɛ bliki’m be afiɛn naan fa laso kata su.
10 Kpɛkun se be kɛ: ‘Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: “Ń má súnman min sufuɛ+ Nebikadnezaa* m’ɔ ti Babilɔnin famiɛn’n. Kpɛkun ń fɛ́ i famiɛn bia’n ń síe i yɔbuɛ nga n fali be n fiɛli i yɛ’n be su. Yɛ ɔ́ trɛ́ i famiɛn tannin sua’n nun yɔbuɛ sɔ’m be su.+
11 Ɔ́ bá, kpɛkun ɔ́ útu Ezipti nvle’n.+ Be ng’ɔ fata kɛ tukpacɛ tɛ kun be’n, ɔ́ kún be. Be ng’ɔ fata kɛ be tra be be wɔ’n, bé trá be kɔ́. Be ng’ɔ fata kɛ be fa tokofi kun be’n, bé fá tokofi kún be.+
12 Ń fá sin ń yí i Ezipti lɔ amuin’m be sua’m be nun.+ Yɛ Nebikadnezaa wɔ́ be nun. Ɔ́ fá amuin mun kɔ́ i nvle’n nun. Ɔ́ fá Ezipti mɛn’n fá kɛ́tɛ i wun kɛ bua sunianfuɛ’n fɛ i kondro’n kɛtɛ i wun’n sa. Kpɛkun ɔ́ kɔ́ i kɔlɛ bɔ cɛ.*
13 Yɛ ɔ́ fúfú sua ja mlomlo nga be o Bɛti-Semɛsi’n* m’ɔ o Ezipti mɛn’n nun lɔ’n be nun. Kpɛkun ɔ́ fá sin wɔ́ Ezipti lɔ amuin sua’m be nun.”’”
Ja ngua lɔ ndɛ mun
^ Annzɛ “Nebikadrezaa.” I klɛlɛ wafa kun ekun-ɔn.
^ Annzɛ “ɔ́ kɔ́ diin.”
^ Annzɛ “Wia’n i Sua’n.” Yɛle kɛ, Eliopolisi.
