Zeremin 48:1-47
-
Sa ng’ɔ́ wá jú Moabu su’n (1-47)
48 Moabu+ i su ndɛ liɛ’n yɛ. Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo:“Nebo+ i yako. Afin b’a bubu i!B’a gua Kiriataimun+ i ɲin ase, b’a utu i.Fiawlɛ lika kpa’n* leman ɲrun kun. B’a saci i.+
2 Sran fi yiman Moabu i ayɛ kun.Ɛsbɔn+ lɔ’n, b’a cici i wun kɛ bé yí i ase, be se kɛ:‘Amun bla naan e saci nvle sɔ’n i mlɔnmlɔnmlɔn.’Madimɛnnin, ɔ kusu muan ɔ nuan,afin tokofi’n te su ɔ su.
3 Be ti sran’m be kpanlɛ Oronaimun+ lɔ,afin klɔ’n w’a wie bubu, w’a wie saci mlɔnmlɔnmlɔn.
4 Moabu w’a wie bubu.I mma kanngan’m be su kpan.
5 Kɛ bé fú bé kɔ́ Luiti lɔ’n nn bé sún.Kɛ bé fɛ́ i Oronaimun lɔ bé jrá’n, be ti sran’m be sunlɛ ɲrɛnnɛn sa ng’ɔ tɔli’n ti.+
6 Amun wanndi be wɔ. Amun wanndi naan amun a ka nguan nun!Amun yo kɛ zenevrie waka kun m’ɔ o aawlɛ flɛnnɛn’n nun lɔ’n sa.
7 Kɛ mɔ a lafili ninnge nga a yoli be’n nin ɔ ninnge kpakpa’m be su’n ti’n,bé útu wɔ wie.Yɛ bé trá Kemɔsu+nin i amuin ɲrun jranfuɛ mun nin i sran dandan mun bé kɔ́.
8 Like sacifuɛ’n wá wlú klɔ’m be kwlaa be nun,klɔ ba kun sa su kaman lɛ.+Kongo’n sáci,yɛ lika kpɛtɛkplɛɛ’n sáci, kɛ nga Zoova fa kannin’n sa.
9 Maan be sie nzɔliɛ kun akpɔ’n su lɛ be man Moabufuɛ mun,afin kɛ bé wá sáci Moabu’n, i sufuɛ’m bé wánndi.Kɛ sran’m bé wá wún i klɔ mun’n, ɔ́ yó be sro,sran fi su tranman be su kun.+
10 Sran ng’ɔ fa Zoova i junman’n fa kankan ngowa’n, nán maan ɔ ɲan ye le!Sran ng’ɔ kloman kɛ ɔ́ fɛ́ i tokofi’n gúa sran mmoja ase’n, nán maan ɔ ɲanye le!
11 Kɛ ɔ fɛ i Moabufuɛ’m be kaan nun lele’n, be nin-a kleman be yalɛ le,kɛ duvɛn m’ɔ o lɛ diin’n sa.Be ti kɛ duvɛn mɔ be nin-a kaciman nin-a guɛmɛn i sɛ uflɛ nun’n sa,yɛ be nin-a traman be nin-a ɔman nvle uflɛ nun le.I sɔ’n ti yɛ be nin-a yoman fɛ,mɔ bɔnlɛ kunngba’n yɛ be te bɔn’n niɔn.
12 “Zoova waan yoo: ‘I sɔ’n ti’n, blɛ wie wá jú’n, ń súnman sran naan be ko utu be. Bé káci be naan sɛ nga be o nun’n, be ka ngbɛn, kpɛkun bé bóbó be tomua dandan mun.
13 Wafa nga Izraɛlifuɛ’m be fali be wla guali Betɛli su mɔ be wunnin ɲannzuɛn’n, i wafa kunngba’n, Kemɔsu ti’n, Moabufuɛ’m bé wún ɲannzuɛn.+
14 ?Ngue ti yɛ amun jaso ko se kɛ: “E ti safuɲrɛn, e kwla ko kun alɛ-ɔ”?’+
15 ‘B’a nunnun Moabu,yɛ b’a fɛ i klɔ mun,+b’a kun i gbanflɛn’m be nun kpakpa mun,’+Famiɛn’n mɔ i dunman’n yɛle Zoova m’ɔ ti sonja’m be su kpɛn’n+ yɛ ɔ kan sɔ-ɔ.
16 Ɔ ka kaan sa’n, ɲrɛnnɛn’n wá tɔ́ Moabufuɛ’m be su,tɔlɛ nga bé wá tɔ́’n, w’a mantan koko kpa.+
17 Be kwlaa nga be si i dunman’n,be kwlaa nga be o i wun lɛ’n, saan bé kókó be.Amun se be kɛ: ‘Ee, b’a bubu waka kekleke’n nun, b’a bubu kpɔnman klanman’n nun!’
18 Ɔo talua, wɔ mɔ a tran Dibɔn’n,+jaso ɔ aɲrunɲan’n nun naan jra, naan tran ase nzuewe’n nun,*afin Moabu i sacifuɛ’n w’a ba naan ɔ nin wɔ bé kún.Ɔ́ wá búbú ɔ fiawlɛ lika mun.+
19 Wɔ mɔ a tran Aroɛɛ’n,+ jran akpɔ nuan lɛ naan nian.Usa yasua ng’ɔ su wanndi’n nin bla ng’ɔ su tu kpɛn’n be kɛ: ‘?Ngue sa-ɔ?’
20 Be guali Moabufuɛ’m be ɲin ase, be usuli sa tututu.Amun sun, amun kpan.Maan be bo i jɔ Aanɔn+ lɔ kɛ b’a nunnun Moabu.
21 “Lika kpɛtɛkplɛɛ’n i jɔlɛ dilɛ’n w’a ju.+ Bé wá dí Olɔn nin Zaazi,+ ɔ nin Mefaati+ be jɔlɛ.
22 Bé wá dí Dibɔn+ nin Nebo+ nin Bɛti-Diblataimun be jɔlɛ.
23 Bé wá dí Kiriataimun+ nin Bɛti-Gamuli nin Bɛti-Meɔn+ be jɔlɛ.
24 Bé wá dí Keriɔti+ nin Bɔzra be jɔlɛ. Kpɛkun bé wá dí klɔ nga be o Moabu mɛn’n nun’n, nga be o mmua-o, nga be o koko-o, be kwlaa be jɔlɛ.
25 ‘Moabu i wunmiɛn’n w’a wie i nun.*Be buli i sa’n.’ Zoova yɛ ɔ kan sɔ-ɔ.
26 ‘Maan be mɛn i nzan naan ɔ bo,+ afin i olɛ ng’ɔ o lɛ’n, ɔ yoli i wun dandanZoova su.+Moabu la kondo i fiɛ’n nun.Ɔ maan sran’m be kwlaa be yo i finfin.
27 ?Nán wɔ yɛ a yoli Izraɛli i finfin’n niɔn?+?Be wunnin i awiefuɛ’m be nun ti yɛa keje ɔ ti’n sɛkɛsɛkɛ mɔ a kɛn i wun ndɛ tɛtɛ’n niɔn?
28 Amun mɔ amun tran Moabu lɔ’n, amun jaso klɔ’m be su be ko tran yɔbuɛ buɛ’m be nun.Yɛ amun yo kɛ auble m’ɔ ko yoli i sua’n kpɔlɛ’m be nvɛnwun’n sa.’”
29 “E tili i kɛ Moabu tu i wun. Nanwlɛ, ɔ tumɛn i wun aɔwi.Ɔ di i nuan, ɔ tu i wun, ɔ ɲinmɛnɲinmɛn i wun, ɔ yo i wun kpakpa.”+
30 “Zoova waan yoo: ‘N si kɛ ɔ fa ya ndɛndɛ.Ijɔlɛ ngbɛn yɛ ɔ ijɔ-ɔ.Be su yoman like fi.
31 I sɔ’n ti’n, ń sún Moabu.Moabufuɛ’m be kwlaa be ti’n, ń kpán kekle kpa.Yɛ yasua nga be o Kii-Erɛsi+ lɔ’n be ti’n, ń yí ngwlɛ.
32 Ee, Sibma+ lɔ viɲin fie, ń sún wɔ.Sunlɛ nga ń sún wɔ’n, ɔ́ trá sunlɛ nga n sunnin Zazɛɛ’n.+Ɔ viɲin sama mɔ b’a yo zɔglɔɔ’n, b’a kpɛ jenvie’n.Be juli jenvie’n nun lɔ, Zazɛɛ lɔ.Like sacifuɛ’n tɔli+ɔ waka mma mun* nin ɔ viɲin mma nga a tili be’n be su.
33 Aklunjɔɛ dilɛ’n nin talolɛ’n, b’a wie fie su lɔnin Moabu mɛn’n nun.+N yoli maan duvɛn yiwlɛ’m be nun w’a wu kee.Sran fi su tiatiaman viɲin mma’m be su aklunjɔɛ nun.Kpanlɛ nga bé kpán’n, ɔ́ yó wafa uflɛ.’”+
34 “‘Kpanlɛ nga be kpan Ɛsbɔn+ lɔ’n, be ti i Eleale+ lɔ.Kɛ be man be nɛn’n su’n, be ti i Zaazi+ lɔ.Kpanlɛ nga be kpan Zoaa lɔ’n, be ti i Oronaimun+ lɔ lele fa ju Eglati-Sɛlisia.Nzue nga be o Nimunrimun lɔ bɔbɔ’n, bé wíe nun sekeseke.+
35 Zoova waan yoo: ‘Sran ng’ɔ yi tɛ lika nglonglo’n su-o,sran ng’ɔ yi tɛ man i amuin’n nin-o,ń yó maan be su wunman be kun Moabu lɔ.
36 I sɔ’n ti’n, min awlɛn’n kplín* min klun lɔ kɛ blo wie yɛ be su bo sa,* Moabu ti.+Yasua nga be o Kii-Erɛsi be ti’n, min awlɛn’n kplín* min klun lɔ kɛ blo wie yɛ be su bo sa,*afin i nun ninnge kpakpa’m bé sáci.
37 B’a kpu be kwlaa beti’m be su,+b’a yi be kwlaa be akanza’n.B’a bobo be sa’m be wun kannin,+yɛ bajɛ tralɛ’n o be bo lenge’n nun.’”+
38 “‘Moabu lɔ sua’m be kwlaa be ti su’n,ɔ nin klɔ’m be gua’m be kwlaa be su’n,sunlɛ yɛ sran’m be sun-ɔn.Afin m’an bobo Moabukɛ sɛ kun mɔ be fɛmɛn i kun’n sa.’ Zoova yɛ ɔ kan sɔ-ɔ.
39 ‘Be nian kɛ i wawɛ w’a tɔ blo-ɔ! Be sun!Ɲannzuɛn’n ti’n, Moabu w’a kaci i sin!Be nga be wun Moabu’n, be kwlaa be yo i finfin,be nga be mɛntɛn i’n, be wun usu be.’”
40 “Afin Zoova waan yoo:‘Ɔ́ trɛ́ i ndɛwa’m be nun Moabu su+kɛ anunman ɲin m’ɔ su jra asiɛ wun’n sa.+
41 Bé útu klɔ mun,yɛ bé fá fiawlɛ lika mun.Cɛn sɔ’n nun’n, Moabu lɔ safuɲrɛn’m be klun títí be,kɛ bla kun m’ɔ su wuba’n sa.’”
42 Moabufuɛ’m be su yoman nvle kun mlɔnmlɔn,+afin ɔ yoli i wun dandan Zoova su.+
43 Wɔ mɔ a tran Moabu lɔ’n,sa sroesroe’n nin kunman’n nin aya’n be o ɔ ɲrun lɛ.’ Zoova yɛ ɔ kan sɔ-ɔ.
44 Sran ng’ɔ wanndi sa sroesroe’n, ɔ́ tɔ́ kunman’n nun,yɛ sran ng’ɔ fin kunman’n nun fite’n, ɔ́ tɔ́ aya nun.’‘Afin afuɛ kun wá jú’n, ń má tú Moabu i fɔ.’ Zoova yɛ ɔ kan sɔ-ɔ.
45 ‘Be nga be su wanndi mɔ afɛ’n w’a ti be kpa’n, bé kó fía Ɛsbɔn i fɔnvɔ’n nun.Afin sin fín Ɛsbɔn lɔ,yɛ sin taaman kun fín Siɔn+ i afiɛn lɔ.Kpɛkun ɔ́ yrá Moabu i ngban’nnin sa sakasaka yofuɛ’m be mma’m be ti kongloman’n.’+
46 ‘Moabu, yako!Kemɔsufuɛ’m+ b’a wie nunnun sekeseke.Afin b’a wla ɔ wa yasua’m be bisua,yɛ b’a tra ɔ wa blamun b’a wɔ.+
47 Sanngɛ blɛ kasiɛn’n nun’n, ń yíayía Moabufuɛ nga be wlali be bisua’n.’ Zoova yɛ ɔ kan sɔ-ɔ.‘Moabu i fɔ bulɛ’n i awieliɛ’n yɛ ɔ o lɛ-ɔ.’”+
Ja ngua lɔ ndɛ mun
^ Annzɛ “Lika nglonglo’n.”
^ Be kwla se ekun kɛ “asiɛ kee’n su.”
^ Ebr., “b’a kpɛ i wɛ’n.”
^ Yɛle kɛ, “figie mma,” yɛ atrɛkpa’n “nglesia mma” o nun.
^ Annzɛ “kéjekéje.”
^ Kɛ bé kó síe sran mɔ bé yí ngwlɛ’n, yɛ be bo blo sɔ’n niɔn.
^ Annzɛ “kéjekéje.”
^ Kɛ bé kó síe sran mɔ bé yí ngwlɛ’n, yɛ be bo blo sɔ’n niɔn.
