Zeremin 50:1-46
50 Babilɔnin+ i su ndɛ’n, Kaldefuɛ’m be nvle’n i su ndɛ nga Zoova kan kleli i nuan ijɔfuɛ Zeremin’n yɛ:
2 “Amun kɛn i nvlenvle’m be nun. Yɛ amun bo i jɔ.Amun sie nzɔliɛ like kun,* yɛ amun bo i jɔ.Nán amun fia ndɛ fi su.Amun se kɛ: ‘B’a utu Babilɔnin.+Bɛli i ɲin w’a gua ase.+Merodaki i wla w’a tɔ blo.Babilɔnin i amuin’m be ɲin w’a gua ase.I amuin mɔ be ti like kain’n* be wla w’a tɔ blo.’
3 Afin nvle kun fin nglo lɔ lika’n nun bali kɛ ɔ nin i bé kún.+W’a yo maan nvle nga w’a yo sran’m be sro.Sran fi tranman su kun.I klɔ sran-o, i nnɛn-o, be kwlaa b’a wanndi.Be wanndi ɔli.”
4 Zoova waan yoo: “I blɛ sɔ’n nun’n, Izraɛlifuɛ mun nin Zidafuɛ’m bé bá likawlɛ.+ Kɛ bé nánti’n, nn bé sún.+ Yɛ be bo yó kun bé kpɛ́ Zoova m’ɔ ti be Ɲanmiɛn’n i sin atin.+
5 Bé úsa Siɔn i atin’n. Be ɲin káci kɔ́ lɔ lika’n nun,+ yɛ bé sé kɛ: ‘Amun bla naan e fa e wun e mantan Zoova naan e nin i e tra aenguɛ kun m’ɔ su wieman le’n, mɔ be wla su fiman su le’n.’+
6 Min nvle’n nunfuɛ’m b’a kaci kɛ bua mɔ b’a mlin’n sa.+ Be sunianfuɛ mun yɛ be mlinnin be-ɔ.+ Be fa be ɔli oka’m be su. Á nían-ɔn, b’a fa be b’a ɔ oka’n su lɔ, á nían ekun-ɔn, be o kpɔlɛ’n su lɔ. Be wla w’a fi lika nga be lo wunmiɛn lɛ’n.
7 Be kwlaa nga be wunnin be’n, be dili be sekeseke.+ Yɛ be kpɔfuɛ’m be seli kɛ: ‘Y’a yoman sa tɛ. Afin Zoova mɔ sa nuan su sɛsɛ yolɛ’n i bo’n wo i wun lɔ’n, Zoova mɔ be nannan’m be fali be wla guɛ i su’n, be fɔnnin i wun.’”
8 “Amun jaso Babilɔnin lɛ be wanndi,amun fin Kaldefuɛ’m+ be nvle’n nun fite,yɛ amun yo kɛ nnɛn nga kɛ be nin be wiengu’m bé kɔ́ lika’n, be dun mmua be ɲrun’n sa.
9 Afin ń má yíayía nvle dandan nga be o nglo lɔ lika’n nun’n,+yɛ bé wá fá alɛ wlá Babilɔninfuɛ’m be sin.Bé wá jrán sɛsɛsɛ bé fá alɛ wlɛ́ i sin,kpɛkun bé útu i.Be ta mma’m be ti kɛ safuɲrɛn’m be liɛnga be fa kun sran’m be mma mun’n sa.+Kɛ be to be’n, be to fuanman le.
10 Kaldefuɛ’m be nvle’n ɔ́ káci kɛ like nga be kun alɛ-ɔ be ɲɛn i’n sa.+Be kwlaa nga bé wá fɛ́n lɔ ninnge mun’n, ɔ́ jú be lelele.”+ Zoova yɛ ɔ kan sɔ-ɔ.
11 “Afin kɛ amun isali min aja like’n i bo ninnge mun ɔli’n,+amun dili aklunjɔɛ titi.+ Nanwlɛ, amun klun jɔli dan.Amun tu kpɛnnin kɛ nannin talua kun m’ɔ o ijre’n nun’n sa,yɛ amun kpannin kɛ nnɛn kpanngɔ mun sa.
12 Amun nin’n w’a wun ɲannzuɛn.+Bla ng’ɔ wuli amun’n i ɲin w’a gua ase.Amun nian, i yɛ w’a ka nvle’m be siɛn-ɔn.I lika’n w’a kaci blo, nzue nunman su, w’a kaci aawlɛ flɛnnɛn.+
13 Ya nga Zoova fali’n ti’n, sran fi su tranman su kun.+Ɔ́ tɔ́ srolo.+Sa kwlaa nga bé wá tɔ́ Babilɔnin su’n, bé yó sran kwlaa nga bé wá sín i wun lɛ’n be sro,yɛ bé bó feliman.+
14 Amun kwlaa nga amun to ta’n,*amun jran Babilɔnin i bue kwlaa su sɛsɛsɛ yɛ amun fa alɛ wlɛ i nunfuɛ’m be sin.Amun to i wun ta, nán amun yaci ta mma ba kun sa lɛ.+Afin Zoova yɛ ɔ yoli i tɛ-ɔ.+
15 Amun kpan alɛ kunlɛ kpanlɛ i bue kwlaa su.W’a fɛ i wun w’a man.*I sua ja mlomlo mun nin i wun talɛ’n be kwlaa b’a bubu.+Afin Zoova yɛ ɔ su tu i klunngbɔ’n niɔn.+Amun tu amun klunngbɔ’n i su.Sa ng’ɔ yoli’n, amun nian su sɛsɛsɛ be fa yo i wie.+
16 Amun yo maan sran ng’ɔ fa wlɔsɔ kpɛ like ninnge’m be kpɛlɛ blɛ’n nun’n,+nin sran ng’ɔ lua like’n, be nunnun Babilɔnin lɔ sekeseke.Tokofi m’ɔ kun’n ti’n, sran kun sɛ́ i sin i fuɛ’m be sin,sran kun wánndi kɔ́ i nvle’n nun.+
17 Izraɛlifuɛ’m be ti kɛ bua mɔ b’a bo b’a sanndi’n sa.+ Asɔmɔli mun yɛ be sanngannin be nun-ɔn.+ I klikli nun’n, Asiri famiɛn’n dili be nnɛn ba’n.+ I sin’n, Nebikadnezaa* m’ɔ ti Babilɔnin famiɛn’n boboli be owie’n.+
18 I sɔ’n ti’n, Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Sa nga n fa yoli Asiri famiɛn’n, i kunngba’n yɛ ń fá yó Babilɔnin famiɛn’n nin i nvle’n niɔn.+
19 Kpɛkun ń fá Izraɛli ń sɛ́ i sin i didiwlɛ’n nun.+ Ɔ́ dídí Kaamɛli lɔ nin Basan+ lɔ. Yɛ Efraimun+ nin Galaadi+ okaoka’m be su’n, ɔ́ dí like lele i ku yí.’”
20 Zoova waan yoo: “Blɛ sɔ’n nun’n,bé kúnndɛ sa tɛ nga Izraɛli yoli’n lele ngbɛn,be su wunmɛn i.Yɛ be su wunman sa tɛtɛ nga Zida yoli be’n.Afin ń yáci be nga min sa w’a kanman be’n be sa tɛ’n ń cɛ́ be.”+
21 Zoova waan yoo: “Ko fa alɛ wla Merataimun nvle’n nin Pekɔdufuɛ’m+ be sin.Kun be lele naan be nunnun sekeseke.I kwlaa nga n seli ɔ kɛ a yo’n, yo.
22 Be ti alɛ kunlɛ ngan nvle’n nun.Ɲrɛnnɛn dan yɛ w’a tɔ-ɔ.
23 Blalɛ bofuɛ’n i maato dan m’ɔ nunkun asiɛ’n su nvlenvle’m be kwlaa’n, amun nian kɛ w’a bu-ɔ, amun nian kɛ i nun w’a kpuke-ɔ.+Amun nian kɛ sa nga w’a tɔ Babilɔnin su’n, ɔ yo nvlenvle’m be sro-ɔ.+
24 Babilɔnin, n suali ɔ wun aya.Yɛ kɛ á tɔ́ nun’n, w’a wunman nun bɔɔ kaan sa.Be wunnin wɔ kpɛkun be trali wɔ.+Afin Zoova yɛ a tɛnndɛnnin i ɲrun-ɔn.
25 Zoova w’a tike i alɛ ninnge’m be guawlɛ’n su,yɛ ya ng’ɔ fali’n ti’n, w’a yi i alɛ kunlɛ ninnge mun w’a fite.+Afin Miɛn m’ɔ Sie Like Kwlakwla’n, Zoova m’ɔ ti sonja’m be su kpɛn’n, ɔ́ wá yó sa kunKaldefuɛ’m be nvle’n nun lɔ.
26 Amun fɛ i mmuammua lɔ be bla be wa fa alɛ wlɛ i sin.+Amun tike i tanngannin’m be su.+Amun tiɛntiɛn i ninnge kpakpa’m be nuan kwlekwle.Amun nunnun i sekeseke.+Nán maan i sran ba kun sa ka lɛ.
27 Amun nunkun i nannin ba’m be sekeseke.+Maan be fa be wɔ be kunwlɛ lɔ.Be yako, afin be cɛn liɛ’n w’a ju,blɛ ng’ɔ fata kɛ be kan sa nga be yoli’n i ti ndɛ’n w’a ju.
28 Be ti be nga be su wanndi’n be ngan.Be nga be su jaso Babilɔnin nvle’n nunnaan bé kó kɛ́n i Siɔn lɔ kɛ Zoova m’ɔ ti e Ɲanmiɛn’n su tu i klunngbɔ’n,naan i sua’n ti’n ɔ su tu i klunngbɔ’n, be ti i sɔfuɛ’m be ngan.+
29 Amun flɛflɛ ta tofuɛ mun,be kwlaa nga be cuɛn ta’m be nun’n,+ naan be utu Babilɔnin.Amun bo sin yiɛ i, nán amun yaci sran ba kun sa lɛ naan ɔ fite nun.Amun fa sa ng’ɔ yoli’n i nuan like be mɛn i.+Sa ng’ɔ yoli’n, amun nian su sɛsɛsɛ be yo i wie.+Afin ɔ yoli i wun dandan Zoova su,ɔ yoli i wun dandan Izraɛli Ɲanmiɛn m’ɔ ti sanwun’ni su.+
30 I sɔ’n ti’n, i gbanflɛn’m bé tɔ́ klɔ’n i gua’m be su,+yɛ i sonja’m be kwlaa bé wú* cɛn sɔ’n nun.” Zoova yɛ ɔ kan sɔ-ɔ.
31 Miɛn m’ɔ Sie Like Kwlakwla’n, Zoova m’ɔ ti sonja’m be su kpɛn’n waan yoo: “Nian, ɲin keklefuɛ,+ e nin wɔ y’a ɲɛn i.+Afin saan ɔ cɛn liɛ’n ɔ́ jú. Blɛ nga ń má úsa ɔ sa nga a yoli’n i su ndɛ’n ɔ́ wá jú.
32 Ɲin keklefuɛ, ɔ ja kplá kpɛkun á tɔ́,sran fi su manman ɔ su.+Yɛ ń wɔ́ ɔ klɔ’m be nun,yɛ sin’n yrá ɔ asa’n su lɔ ninnge’m be kwlaa.”
33 Zoova m’ɔ ti sonja’m be su kpɛn’n waan yoo:“Be mianmian Izraɛlifuɛ mun nin Zidafuɛ mun,yɛ be te o be kwlaa nga be trali be’n be sa nun.+Be waan be kloman kɛ bé yáci be nun naan be wɔ.+
34 Sanngɛ be Ti Kpɔfuɛ’n le wunmiɛn.+I dunman’n yɛle Zoova m’ɔ ti sonja’m be su kpɛn’n.+Saan ɔ́ kán be ti ndɛ+naan nvle’n nun tɔ fɔuun.+Yɛ ɔ́ yó maan Babilɔninfuɛ’m be wawɛ tɔ́ blo.”+
35 Zoova waan yoo: “Tokofi kun wá klé Kaldefuɛ’m be ɲrɛnnɛn.Ɔ́ wá klé Babilɔninfuɛ mun nin lɔ sran dandan mun nin lɔ ngwlɛlɛfuɛ’m+ be ɲrɛnnɛn.
36 Tokofi kun wá klé be nga be ijɔ finfin’n* be ɲrɛnnɛn, yɛ bé yó kɛ be ti sinnglinfuɛ sa.Tokofi kun wá klé i safuɲrɛn’m be ɲrɛnnɛn, yɛ be wawɛ tɔ́ blo.+
37 Tokofi kun wá klé be nnɛn kpanngɔ mun nin be kakaklolo nga be fa kun alɛ’n be ɲrɛnnɛn.Ɔ́ klé aofuɛ nga be tran klɔ’n su lɔ’n be kwlaa be ɲrɛnnɛn,yɛ bé káci kɛ bla mun sa.+Tokofi kun wá klé be bo ninnge kpakpa’m be ɲrɛnnɛn, yɛ bé ísa bebé kɔ́.+
38 Bé wá sáci i nzue mun, yɛ bé wíe nun.+Afin ninnge nga be sɛli be’n b’a yi nvle’n sa piɛ,+yɛ aolia nun ninngesroesroe nga be wunbe’n ti’n, be yo kɛ beti w’a saci sa.
39 I sɔ’n ti’n, aawlɛ flɛnnɛn’n nun nnɛn mun nin blo alua mun* bé trán likawlɛ,Yɛ klɔnsoklo’m bé trán klɔ’n nun.+Be su tranman su kun.Sran fi su jasoman ko tranman lɔ kun le.”+
40 Zoova waan yoo: “Ɔ́ wá yó kɛ Sodɔmun nin Gomɔru+ nin klɔ nga be mantan be+ lɛ mɔ n bɔbɔ min Ɲanmiɛn n nunnunnin be’n be sa. Ɔ́ tɔ́ srolo yɛ sran fi su tranman su kun.+
41 Amun nian, nvle kun fin nglo lɔ lika’n nun ɔ su ba.Nvle dan kun nin famiɛn dandan wie’m+ bé jásoasiɛ’n i tiwa su lɔ bé bá.+
42 Be si ta’n nin cua’n be nun tra kpa.+Be tɛ liɛ’n be kanman, yɛ be siman sran aunnvɔɛ bɔɔ kaan sa.+Kɛ be o be nnɛn kpanngɔ’m be su mɔ bé bá’n,ɔ waan jenvie’n yɛ ɔ subo sa.+Ɔo, Babilɔnin i wa bla, nian kɛ b’a lɔngɔ tɛɛn-ɔn, ɔ waan sran kunngba-ɔ. Yɛ be su wa fa alɛ wla ɔ sin.+
43 Babilɔnin famiɛn’n tili be su ndɛ nga be kannin’n,+yɛ i sa sin w’a bubu i.+Awlabɔɛ’n w’a kun i kpo,afɛ ng’ɔ o i su’n ti kɛ bla ng’ɔ su wu ba’n i liɛ’n sa.
44 “Amun nian, nnɛn didiwlɛ nga be o lɛ diin’n be sacilɛ ti’n, sran kun wá bá kɛ asɔmɔli kun m’ɔ fin Zurdɛn’n i nuan lɛ ijre’m be nun w’a fite’n sa. Sanngɛ ń má yó maan bé jáso be nvle’n nun lɛ kpɛ kunngba bé kɔ́ mmuammua kpa. Yɛ ń fá sran nga n kpɛli i’n ń síe i nvle’n su.+ ?Afin wan yɛ ɔ ti kɛ min sa-ɔ? ?Yɛ wan yɛ ɔ nin min kwla si akplowa-ɔ? ?Bua kankanfuɛ benin yɛ ɔ kwla jran min ɲrun-ɔn?+
45 I sɔ’n ti’n, sran mun, amun sie amun su tie Babilɔnin i wun ajalɛ nga Zoova w’a fa’n,+ nin Kaldefuɛ’m be nvle’n i wun akunndan nga w’a bu’n.Saan bé cúɛn be nnɛn’m be mma kanngan mun kɔ́ mmua.Be dunman nun ti’n, ɔ́ sáci be tranwlɛ’n.+
46 Kɛ bé wá tí i kɛ b’a fa Babilɔnin’n, asiɛ’n kéje,yɛ bé tí nvlenvle’m be kpanlɛ.”+
Ja ngua lɔ ndɛ mun
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Annzɛ “waka kun m’ɔ ti nzɔliɛ like’n.”
^ Ebr., “amun fa amun ja sie i ta’n su’n.”
^ Ebr., “W’a fɛ i sa’n w’a man.”
^ Annzɛ “Nebikadrezaa.” I klɛlɛ wafa kun ekun-ɔn.
^ Ebr., “bé múan be nuan’n su.”
^ Annzɛ “be nga be tɔn be wun suɛn kɛ be ti Ɲanmiɛn nuan ijɔfuɛ’n.”
^ Annzɛ “nnɛn nga be kpan kɛ sunlɛ yɛ be su sun sa’n.”
