Zeremin 52:1-34
52 Kɛ Sedesiasi+ káci famiɛn’n, nn ɔ le afuɛ ablaɔn-nin-kun (21). Ɔ dili famiɛn afuɛ blu-nin-kun (11) Zerizalɛmun lɔ. Be flɛ i nin’n kɛ Amitali,+ Zeremin m’ɔ fin Libina’n i wa bla-ɔ.
2 Ɔ yoli sa ng’ɔ ti tɛ Zoova ɲrun’n titi, kɛ nga Zozakimun fa yoli’n sa.+
3 Ya mɔ Zoova fali’n ti yɛ sa sɔ’m be kwlaa be tɔli Zerizalɛmun nin Zida be su-ɔ. Ɔ yoli sɔ lele fa nunnunnin be i ɲin bo lɛ.+ Sedesiasi yoli ɲin kekle Babilɔnin famiɛn’n su.+
4 Kɛ Sedesiasi kacili famiɛn’n i afuɛ ngwlan su’n, i anglo blu su’n i cɛn ba blu su’n, Nebikadnezaa* m’ɔ ti Babilɔnin famiɛn’n, ɔ nin i sonja’m be kwlaa be bali kɛ be nin Zerizalɛmunfuɛ’m bé kún. Be boli be nanmue’n klɔ’n i sin lɛ. Kpɛkun be kplannin talɛ bo sin yiali klɔ’n.+
5 Be kali lɛ lele fa juli Sedesiasi i famiɛn dilɛ’n i afuɛ blu-nin-kun’n (11) su.
6 Anglo nnan su’n i cɛn ba ngwlan su’n,+ awe’n yoli dan klɔ’n nun, sran’m be ɲanman aliɛ be diman.+
7 I agualiɛ su’n, be kpɛli klɔ’n i wun talɛ’n nun toklo. Kpɛkun sonja’m be kwlaa be jasoli klɔ’n su kɔnguɛ be wanndili. Be sinnin anuan ng’ɔ o talɛ nɲɔn’m be afiɛn’n nun, famiɛn’n i fie klanman’n i wun lɛ. Kɛ ɔ́ yó sɔ’n nn Kaldefuɛ’m b’a sin b’a yia klɔ’n. Kpɛkun be toli be ti Araba bue liɛ’n su lɔ.+
8 Sanngɛ Kaldefuɛ’m be sonja’m be suli famiɛn Sedesiasi+ su. Be ko trɛli Zeriko lika kpɛtɛkplɛɛ’n nun lɔ. I sonja’m be kwlaa be yacili i lɛ be bo sanndili.
9 Be trali famiɛn’n, be fɛ i be mannin Babilɔnin famiɛn’n Ribla lɔ, Amati asa’n su lɔ. Yɛ Babilɔnin famiɛn’n dili i jɔlɛ-ɔ.
10 Babilɔnin famiɛn’n kunnin Sedesiasi i mma mun i ɲin bo lɛ. Asa ekun’n, ɔ kunnin Zida lɔ sran dandan’m be kwlaa Ribla lɛ.
11 I sin’n, Babilɔnin famiɛn’n boboli Sedesiasi i ɲinma mun,+ ɔ fali aaba jrɔkɔ cili i, kpɛkun ɔ fɛ i ɔli Babilɔnin. Ɔ wlɛli i bisua, yɛ ɔ kali lɔ lele ɔ fa wuli.
12 Anglo nnun su’n, i cɛn ba blu su’n, yɛle kɛ, kɛ Nebikadnezaa* kacili famiɛn’n i afuɛ blu-nin-ngwlan (19) su’n, Nebizaradan m’ɔ ti gladi difuɛ’m be su kpɛn’n, mɔ i kunngba’n di junman man Babilɔnin famiɛn’n, ɔ bali Zerizalɛmun lɛ.+
13 Ɔ wɔli Zoova i sua’n+ nin famiɛn’n i sua’n, ɔ nin sua nga be o Zerizalɛmun lɔ’n be kwlaa be nun. Asa ekun’n, ɔ wɔli sran’m be sua kpakpa’m be kwlaa be nun.
14 Kpɛkun Kaldefuɛ’m be sonja nga be su gladi difuɛ’m be su kpɛn’n i su’n be kwlaa be bubuli Zerizalɛmun klɔ’n i wun talɛ mun.+
15 Nebizaradan m’ɔ ti gladi difuɛ’m be su kpɛn’n fali nvlefuɛ nga be leman ɲrun’n be nun wie mun, ɔ nin nvlefuɛ nga be kali klɔ’n su lɛ’n ɔ ɔli. Asa ekun’n, ɔ fali sran nga be fali be wun mannin Babilɔnin famiɛn’n nin ajuin difuɛ nga be si be junman’n i di kpa’n be onga mun ɔli wie.+
16 Sanngɛ Nebizaradan m’ɔ ti gladi difuɛ’m be su kpɛn’n yacili nvle’n nunfuɛ nga be ti yalɛfuɛ kpa’n be nun wie’m be lɛ naan be di junman viɲin fie’m be nun, yɛ be di fie su junman wie mun ekun kekle nun.+
17 Kaldefuɛ’m be bubuli Zoova i sua’n i ja mlomlo nga be fali aaba yoli be’n,+ nin kakaklolo mun,+ ɔ nin aaba Jenvie’n+ mɔ be o Zoova i sua’n nun’n. Kpɛkun be fali aaba’n i kwlaa be ɔli Babilɔnin.+
18 Asa ekun’n, be fali nzuɛn guawlɛ mun, nin peli mun, nin ninnge nga be ti kɛ sizo sa’n, nin kpongbo ba mun,+ nin klowa mun,+ nin ninnge kwlaa nga be fali aaba yoli mɔ be fa di junman Ɲanmiɛn sua’n nun lɔ’n.
19 Gladi difuɛ’m be su kpɛn’n fali kpongbo dandan mun,+ nin sin guawlɛ mun, nin kpongbo ba mun, nin nzuɛn guawlɛ mun, nin kannin siewlɛ mun,+ nin klowa mun, ɔ nin kpongbo ba mɔ be fali sika ɔkwlɛ jrɛiin nin sika jrɛiin be yoli’n.+
20 Sua ja mlomlo nɲɔn mun, nin Jenvie’n, nin aaba nannin tola blu-nin-nɲɔn (12)+ nga be o Jenvie’n i bo’n, nin kakaklolo nga Famiɛn Salomɔn yoli be fa sieli Zoova i sua’n nun lɔ’n be liɛ’n, aaba nga be fa yoli ninnge kwlaa sɔ mun’n, be kwlá simɛn i nɔnnin’n i nuan.
21 Sua ja mlomlo’m be liɛ’n, be tɛnndɛn nun’n, kun ti kude blu-nin-mɔcuɛ (18), kun ti kude blu-nin-mɔcuɛ (18).* Ɲanman kun m’ɔ ti kude blu-nin-nɲɔn’n (12) yɛ be kwla fa bo sin yia sua ja mlomlo kun-ɔn.+ Kpɛkun i gbugblugbu nun’n, ɔ nin sran sa mma nnan be sɛ,* yɛ kunman o i klun.
22 Sua ja mlomlo kun su’n, i ti su like kukluku’n ti aaba, i nglonglo su’n ti kude nnun,+ tɛ’n nin grenadie mma nga be o like kukluku’n i wun’n, aaba yɛ be fa yoli be kwlaa-ɔ. Sua ja mlomlo nɲɔn mun nin be wun tɛ’n be wafa’n ti kun sɛsɛsɛ. Grenadie mma ng’ɔ o su’n, ɔ ti sɔ wie.
23 Grenadie mma nga be bo sin yiɛ i’n, be ti ablangwlan-nin-nsiɛn (96). Ɔ maan grenadie mma nga be o like kɛ lala sa’n be su’n, be kwlaa be ti ya kun (100).+
24 Asa ekun’n, Gladi difuɛ’m be su kpɛn’n trali Seraya+ m’ɔ ti Ɲanmiɛn ɲrun jranfuɛ’m be su kpɛn’n, nin Sofonin+ m’ɔ ti Ɲanmiɛn ɲrun jranfuɛ’m be nɲɔn su’n, ɔ nin anuan su nianfuɛ nsan mun ɔli.+
25 Klɔ’n su lɛ’n, ɔ trali famiɛn i awlo lɔ junman difuɛ kun m’ɔ nian sonja’m be su’n, ɔ nin famiɛn’n i mantanfuɛ nso mɔ be wunnin be klɔ’n nun’n, ɔ nin sonja’m be su kpɛn’n i fluwa klɛfuɛ m’ɔ fa nvle’n nun sran mun wla sonja nun’n, ɔ nin nvle’n nun sran ablesiɛn (60) ekun mɔ be wunnin be klɔ’n nun’n.
26 Nebizaradan m’ɔ ti gladi difuɛ’m be su kpɛn’n fali be ko mannin Babilɔnin famiɛn’n Ribla lɔ.
27 Babilɔnin famiɛn’n kunnin be Ribla lɔ,+ Amati asa’n su lɔ. Kɛ be fali Zidafuɛ mun be mɛn’n nun ɔli kɛ ngalɛ’n sa.+
28 Be nga Nebikadnezaa* trali be ɔli’n, be nuan’n yɛ: Kɛ ɔ yoli famiɛn’n i afuɛ nso su’n, ɔ trali Zifu akpi nsan ablaɔn-nin-nsan (3.023) ɔli.+
29 Nebikadnezaa*+ i famiɛn dilɛ’n i afuɛ blu-nin-mɔcuɛ (18) su’n, ɔ trali sran ya mɔcuɛ ablasan-nin-nɲɔn (832) Zerizalɛmun lɛ ɔli.
30 Nebikadnezaa* i famiɛn dilɛ’n i afuɛ ablaɔn-nin-nsan (23) su’n, Nebizaradan m’ɔ ti gladi difuɛ’m be su kpɛn’n trali Zifu ya nso ablanan-nin-nnun (745) ɔli.+
Ɔ maan sran’m be kwlaa nga be trali be ɔli’n, be ti akpi nnan ya nsiɛn (4.600).
31 Kɛ be trali Zozakinin+ m’ɔ ti Zida famiɛn’n ɔli’n, i afuɛ ablasan-nin-nso (37) su’n, i anglo blu-nin-nɲɔn (12) su’n, i cɛn ba ablaɔn-nin-nnun (25) su’n, Evili-Merodaki m’ɔ ti Babilɔnin famiɛn’n yacili Zozakinin m’ɔ ti Zida famiɛn’n i nun. Afuɛ kunngba nga Evili-Merodaki kacili famiɛn’n i nun yɛ ɔ yili i bisua lɔ fiteli-ɔ.+
32 Ɔ kannin ndɛ amanniɛn su kleli i. Kpɛkun ɔ yoli maan ɔ ɲannin ɲrun trali famiɛn onga nga be nin i o Babilɔnin lɔ’n.*
33 Ɔ maan Zozakinin yili i wun bisua tralɛ mun. Yɛ ɔ nin famiɛn’n be dili like titi lele naan wie’n w’a fa kun i.
34 Babilɔnin famiɛn’n mɛnnin i aliɛ titi. Ɔ yoli i sɔ cɛn kwlakwla. Ɔ yoli i sɔ lele naan wie’n w’a fa kun i.
Ja ngua lɔ ndɛ mun
^ Annzɛ “Nebikadrezaa.” I klɛlɛ wafa kun ekun-ɔn.
^ Annzɛ “Nebikadrezaa.” I klɛlɛ wafa kun ekun-ɔn.
^ Annzɛ “Nebikadrezaa.” I klɛlɛ wafa kun ekun-ɔn.
^ Annzɛ “Nebikadrezaa.” I klɛlɛ wafa kun ekun-ɔn.
^ Annzɛ “Nebikadrezaa.” I klɛlɛ wafa kun ekun-ɔn.
^ Ebr., “ɔ mɛnnin i famiɛn bia kun m’ɔ o famiɛn onga’m be famiɛn bia liɛ’n be ti su nglo’n.”
