Zeremin 7:1-34
7 Ndɛ nga Zoova kan kleli Zeremin’n yɛ:
2 “Jran Zoova i sua’n i anuan’n nun lɛ naan kan ndɛ yɛ’n: ‘Zidafuɛ mun, amun kwlaa nga amun sin anuan nga’m be nun be ko koto Zoova bo’n, amun tie ndɛ nga Zoova kan’n.
3 Zoova m’ɔ ti sonja’m be su kpɛn’n, m’ɔ ti Izraɛli i Ɲanmiɛn’n waan yoo: “Amun yaci ninnge tɛtɛ nga amun yo be’n be yolɛ, yɛ amun kaci amun nzuɛn’n. Yɛ ń mán amun atin naan amun ka lika nga nun wa.+
4 Nán amun fa amun wla gua ato ndɛ’m be su naan amun se kɛ: ‘Zoova i sua’n,* yɛ ɔ o yɛ. Zoova i sua’n, Zoova i sua’n.’+
5 Afin sɛ amun yaci ninnge tɛtɛ nga amun yo be’n be yolɛ naan amun kaci amun nzuɛn’n sakpa’n, yɛ sɛ amun di ndɛ ng’ɔ o sran kun nin i wiengu be afiɛn’n kɛ ng’ɔ nin i fata’n sa’n,+
6 sɛ amun mianmianman aofuɛ mun nin aika ba mun* nin angbeti bla mun’n,+ sɛ amun guaman sran nga w’a yoman sa’n i mmoja ase lika nga nun’n, yɛ sɛ amun sɔman amuin fa yoman amun bɔbɔ amun wun abɔlɛ’n,+
7 ń yó maan amún ká lika nga nun wa. N fali lika sɔ’n n mannin amun nannan mun naan ɔ yo be liɛ tititi.”’”
8 “Sanngɛ amun fali amun wla guali gblɛ ndɛ’m be su.+ I sɔ’n su yoman amun ye kaan sa.
9 Amun wua,+ amun kun sran, amun kunndɛ bian annzɛ bla amun wiengu bo, amun ta ato nda,+ amun yi tɛ* man Baali,+ yɛ amun sɔ amuin mɔ amun a siman be’n.
10 ?Amun bu i kɛ amun kwla yo ninnge kainkain kwlaa sɔ mun, kpɛkun amún bá, amún wá jrán min ɲrun sua nga min dunman o su’n i nun wa amún sé kɛ ‘é wá ɲán e ti’?
11 ?Naan amun bu i kɛ sua ng’ɔ o yɛ’n, mɔ min dunman o su’n w’a kaci awiefuɛ’m be lika?+ N wun i kɛ i sɔ yɛ amun yo-ɔ.” Zoova yɛ ɔ kan sɔ-ɔ.
12 “‘Sanngɛ amun wɔ Silo+ naan amun ko nian min lika mɔ i klikli nun’n n fali min dunman n sieli su’n.+ Kɛ Izraɛlifuɛ mɔ be ti min nvle’n nunfuɛ’n be yoli sa tɛtɛ mun’n, like nga n fa yoli lika sɔ’n, sɛ amun ju lɔ’n amún wá wún i.’+
13 Zoova waan yoo: ‘Kannzɛ n kannin ndɛ n kleli amun kpɛ sunman’n,* amun a sieman amun su.+ Amun yoli ninnge sɔ mun titi. N flɛli amun kpɛ sunman, sanngɛ amun a tɛman su.+
14 I sɔ’n ti’n, like nga n fa yoli Silo’n+ yɛ ń fá yó sua nga min dunman o su’n,+ mɔ amun fa amun wla gua su’n,+ ɔ nin lika nga n fa mannin amun nin amun nannan mun’n niɔn.
15 Ń kpálo amun min ɲin bo lɛ, kɛ nga n fa kpaloli Efraimun i osu’n nunfuɛ mɔ be ti amun niaan’n be kwlaa min ɲin bo lɛ’n sa.’+
16 “Sanngɛ ɔ liɛ’n, nán srɛ sran nga’m be ti. Nán sun flɛ min, nán srɛ min, yɛ nán kpata min be dunman nun ti.+ Afin n su sieman min su ɔ nuan bo.+
17 ?A wunman like nga be yo i Zida klɔ’m be su nin Zerizalɛmun akpɔ’m be su’n?
18 Ba’m be ko isa yie, siɛ’m be trɔ sin nuan, yɛ be yi’m be fɔtɔ sanmlɛn nga be fa yo gato’n kpɛkun be fa man Ɲanmiɛn su lɔ Famiɛn Bla’n.*+ Kpɛkun be fa nzan gua ɲanmiɛn uflɛ wie mun ekun be tɛ yiwlɛ’m be su be fa fɔkɔ min awlɛn.+
19 Zoova waan yoo: ‘?Sanngɛ be bu i kɛ min yɛ be su yo min tɛ-ɔ?* ?Nán be bɔbɔ yɛ be su yo be wun tɛ-ɔ? ?Nán be bɔbɔ be ɲin ase yɛ be su gua-ɔ?’+
20 I sɔ’n ti’n, e Min Zoova m’ɔ Sie Like Kwlakwla’n waan yoo: ‘Amun nian! Ń má yí min ya dan’n i nglo lika nga su.+ Ń má yí i nglo klɔ sran mun nin nnɛn mun nin waka nga be o blo lɔ’n ɔ nin ninnge kwlaa nga be su mma’n be su. Min ya’n júe kɛ sin sa, yɛ sran fi su kwlá nuɛnmɛn i.’+
21 “Zoova m’ɔ ti sonja’m be su kpɛn’n, m’ɔ ti Izraɛli i Ɲanmiɛn’n waan yoo: ‘Amun li amun fa tɛ nga kɛ bé yí’n be yra nnɛn’n i kɔlikɔli’n be fa uka tɛ onga’m be su, yɛ amun bɔbɔ amun di nnɛn’n.+
22 Afin cɛn nga n ko fali amun nannan mun Ezipti mɛn’n nun lɔ n fiteli’n, m’an seman be kɛ be yi tɛ nga kɛ bé yí’n be yra nnɛn’n i kɔlikɔli’n annzɛ tɛ uflɛ be man min. Yɛ m’an fɛmɛn i sɔ mmla m’an manman be.+
23 Sanngɛ mmla nga n fa mannin be’n yɛ. N seli be kɛ: “Amun fa min nuan ndɛ’n su, yɛ ń káci amun Ɲanmiɛn, yɛ amun kusu amún káci min sran.+ Amun nanti atin kwlaa nga n kleli amun’n su. I liɛ’n, amun liɛ yó ye.”’+
24 Sanngɛ b’a sieman be su naan se kɛ bé tíe.+ Be bɔbɔ be klun akunndan tɛ’n i su yɛ be nantili-ɔ. Be ɲin kekle’n ti’n, like nga be awlɛn m’ɔ ti tɛ’n suli be bo kɛ be yo’n yɛ be yoli-ɔ.+ B’a ɔman be ɲrun, be sin yɛ be ɔli-ɔ.
25 Kɛ ɔ fɛ i cɛn nga n fali amun nannan mun Ezipti lɔ fiteli’n lele andɛ’n, b’a yacimɛn i sɔ yolɛ.+ I sɔ’n ti’n, n sunmannin min sufuɛ mun, yɛle kɛ min nuan ijɔfuɛ’m be kwlaa amun sin cɛn kwlakwla. M’an yaciman be sunmanlɛ.*+
26 Sanngɛ b’a sieman be su naan se kɛ bé tíe.+ Be ɲin su ti kekle.* Yɛ sa tɛ nga be yoli’n, ɔ trali be nannan’m be liɛ’n bɔbɔ.
27 “Á wá kán ndɛ kwlaa sɔ mun klé be,+ sanngɛ be su sieman be su ɔ nuan bo. Á flɛ́ be, sanngɛ be su tɛman ɔ su.
28 Yɛ á wá sé be kɛ: ‘Nvle mɔ i nunfuɛ’m be faman Zoova m’ɔ ti be Ɲanmiɛn’n i nuan ndɛ’n su’n, mɔ be kloman kɛ bé sɔ́ fɔ ng’ɔ tu be’n nun’n yɛ ɔ o yɛ. Tranlɛ mɔ be nin sran be tran-ɔn be kpɔcimɛn i’n, ɔ timan be nzuɛn kun. Be kɛnmɛn i ndɛ kun.’*+
29 “Amun kpɛkpɛ amun timuɛn mɔ b’a fu dan’n,* yɛ amun guɛ i blo. Kpɛkun amun fu kpɔlɛ’m be ti su lɔ naan amun ko yi ngwlɛ. Afin Zoova yili blɛ nga nunfuɛ mɔ be ti yɛ ɔ fali ya’n be ase. Ɔ́ yí be blo.
30 Zoova waan yoo: ‘Afin Zidafuɛ’m be yoli sa ng’ɔ ti tɛ min ɲrun’n. Be fali be amuin mɔ be ti like kain’n be ko sieli be sua mɔ min dunman o su’n nun naan bé fá yó i fiɛn.+
31 Be ko kplannin lika nglonglo nga be o Tofɛti m’ɔ o Inɔmun i Wa’n i Kongo’n*+ nun’n, naan bé fá sin bé yrá be mma yasua mun nin be mma bla mun kɔlikɔli.+ Kusu nn m’an seman be kɛ be yo i sɔ like. Yɛ i sɔ akunndan nin-a baman min ti nun le bɔbɔ.’+
32 “Zoova waan yoo: ‘I sɔ’n ti’n, amun nian! Cɛn wie lele’n, be su flɛmɛn i kɛ Tofɛti annzɛ Inɔmun i Wa’n i Kongo* kun. Sanngɛ bé flɛ́ i kɛ Sran Kunlɛ Kongo. Bé síe sran mun Tofɛti lele be su ɲanman lika naan b’a sie be kun.+
33 Yɛ sran sɔ’m be fuɛn’m bé káci anunman nga be tu sin nglo lɔ’n nin nnɛn nga be o asiɛ’n su’n be aliɛ. Sran fi su kanman be bo.+
34 Ń yó maan be su timan bo srolɛ nin aklunjɔɛ kpanlɛ, nin yasua nga w’a ja bla’n, nin bla nga w’a ja bian’n be nɛn’n+ Zida klɔ’m be nun, ɔ nin Zerizalɛmun akpɔ’m be su kun. Afin nvle wunmuan’n núnnún sekeseke.’”+
Ja ngua lɔ ndɛ mun
^ Ebr., “i sua mun.” Sua kwlaa nga be o lika nga be kplannin Zoova i sua’n i lɛ’n, be ndɛ yɛ be kan-ɔn.
^ Annzɛ “ba nga be leman si’n.”
^ Annzɛ “amun yra like naan sin wunsrɛn’n fu wɔ nglo.”
^ Ebr., “n jasoli nglɛmun ndɛ kpa’n n kannin ndɛ’n.”
^ Izraɛlifuɛ nga be kacili be sin sili Ɲanmiɛn’n be amuin nga be sɔ be’n be nun kun yɛ be flɛ i sɔ-ɔ. Atrɛkpa’n be bu i kɛ amuin sɔ’n yɛ ɔ man be ba-ɔ.
^ Annzɛ “min yɛ be su lo min ngasi-ɔ, min yɛ be su klɔklɔ min-ɔn.”
^ Ebr., “Cɛn kwlaa n jaso nglɛmun ndɛ kpa’n n sunman be.”
^ Ebr., “Be keteli be kɔmin’n.”
^ Ebr., “Ɔ nunman be nuan nun kun.”
^ Annzɛ “m’ɔ ti Ɲanmiɛn liɛ’n.”
^ Nian Ndɛ’m be bo tulɛ lika’n nun lɔ, “Zeɛnin.”
^ Nian Ndɛ’m be bo tulɛ lika’n nun lɔ, “Zeɛnin.”
