Zozie 10:1-43
10 Famiɛn Adonin-Zedɛki m’ɔ ti Zerizalɛmun famiɛn’n ɔ tili i kɛ Zozie fali Ai klɔ’n, naan ɔ nunnunnin i mlɔnmlɔn, yɛ ɔ yoli Ai nin i famiɛn’n+ kɛ ng’ɔ fa yoli Zeriko nin i famiɛn’n+ be sa. Ɔ tili i ekun kɛ Gabaɔnfuɛ mun nin Izraɛlifuɛ’m be trali aenguɛ+ naan be tran be afiɛn.
2 Ɔ maan srɛ dan kpa kunnin i,+ afin Gabaɔn ti klɔ dan, ɔ ti kɛ famiɛn klɔ sa. I dan tra Ai,+ yɛ i su yasua’m be kwlaa be ti alɛ kunfuɛ.
3 Ɔ maan Adonin-Zedɛki m’ɔ ti Zerizalɛmun famiɛn’n sunmannin sran kɛ be ko se Ɔamun m’ɔ ti Ebrɔn+ famiɛn’n, nin Piramun m’ɔ ti Zaamiti famiɛn’n, nin Zafia m’ɔ ti Lakisi famiɛn’n, ɔ nin Debii m’ɔ ti Eglɔn famiɛn’n be kɛ:+
4 “Amun bla be wa uka min, maan e nin Gabaɔnfuɛ mun e kun alɛ, afin be nin Zozie nin Izraɛlifuɛ’m b’a tra aenguɛ.”+
5 Kɛ ɔ yoli sɔ’n, Amɔɔfuɛ’m be famiɛn nnun+ mɔ be yɛle Zerizalɛmun famiɛn’n, Ebrɔn famiɛn’n, Zaamiti famiɛn’n, Lakisi famiɛn’n nin Eglɔn famiɛn’n be nin be sonja mun be yiali likawlɛ, kpɛkun be ɔli Gabaɔn, be ko boli be nanmue klɔ’n i wun naan be nin be kún alɛ.
6 Gabaɔnfuɛ’m be mannin Zozie i ngaliɛ Gilgali nanmue’n+ nun lɔ kɛ: “Nán ɔ wla fi* ɔ kanga’m+ be su. Bla ndɛndɛ! De e, uka e! Amɔɔfuɛ’m be famiɛn’m be kwlaa mɔ be o okaoka lika’n nun lɔ’n be bo w’a yo kun e wun.”
7 Ɔ maan Zozie nin i alɛ kunfuɛ’m be kwlaa ɔ nin i sonja kpakpa’m be fɛli i Gilgali lɛ be ɔli lɔ.+
8 Zoova seli Zozie kɛ: “Nán srɛ kun wɔ be wun,+ afin m’an fa be m’an wla ɔ sa nun.+ Be nun wie fi su kwlá jranman ɔ ɲrun.”+
9 Zozie jasoli Gilgali lɛ, ɔ nantili kɔnguɛ wunmuan kun, kpɛkun ɔ fali alɛ fuli be nun.
10 Zoova sanngannin be nun Izraɛlifuɛ’m be ɲrun lɛ.+ Be kunnin be nun kpanngban Gabaɔn lɛ. Kɛ bé sú be su’n, be fali atin ng’ɔ fu kɔ Bɛti-Orɔn’n. Kpɛkun be kunnin be lele juli Azeka nin Makeda.
11 Kɛ bé wánndi Izraɛlifuɛ’m be ɲrun mɔ be juli Bɛti-Orɔn ndroliɛ’n nun lɔ’n, Zoova yoli maan nzraama nga kɛ nzue tɔ́’n ɔ gua’n, i dandan wie’m be fin ɲanmiɛn su lɔ be guali be su lele fa juli Azeka, ɔ maan be wuli. I kpa bɔbɔ’n, sran nga nzraama sɔ’m be kunnin be’n, be sɔn trali be nga Izraɛlifuɛ’m be fali tokofi kunnin be’n.
12 Cɛn sɔ’n nun’n, Zoova kwlali Amɔɔfuɛ mun Izraɛlifuɛ’m be ɲin bo lɛ. Kɛ ɔ yoli sɔ’n, Izraɛlifuɛ’m be ɲrun lɛ’n, Zozie seli Zoova kɛ:
“Wia, jran+ Gabaɔn i ti su nglo lɛ diin,+Yɛ wɔ anglo ba, jran Azalɔn kongo’n i ti su nglo lɛ diin!”
13 Ɔ maan wia’n jrannin diin yɛ anglo’n w’a tumɛn i bo lele nvlefuɛ’m be kwla tuli be klunngbɔ be kpɔfuɛ’m be su. Be klɛli ndɛ sɔ’n Zasaa fluwa’n nun.+ Wia’n jrannin diin ɲanmiɛn’n i afiɛn, ɔ dili cɛn klonglo kun, w’a tɔman ndɛndɛ.
14 Cɛn kɛ ngalɛ’n sa’n i wunsu nin-a juman le, yɛ i wunsu w’a juman kun le. Zoova nin-a tieman klɔ sran kun i nuan ndɛ kɛ ngalɛ’n sa le,+ afin Zoova kunnin Izraɛlifuɛ’m be ti alɛ.+
15 I sin’n, Zozie nin Izraɛlifuɛ’m be kwlaa be sali be sin nanmue’n nun lɔ Gilgali lɔ.+
16 Kɛ ɔ́ yó sɔ’n, nn famiɛn nnun sɔ’m b’a wanndi b’a ko fia yɔbuɛ buɛ kun nun Makeda+ lɔ.
17 Be ko seli Zozie kɛ: “Be wunnin famiɛn nnun sɔ mun, be fia yɔbuɛ buɛ ng’ɔ o Makeda+ lɔ’n nun.”
18 Yɛ Zozie seli kɛ: “An kondo yɔbuɛ dandan wie mun sie i yɔbuɛ buɛ’n i nuan’n su, yɛ amun fa sran wie mun naan be nian su.
19 Amun onga mun, nán amun jran. Amun fuan amun kpɔfuɛ mun, amun sin be sin lɔ naan amun kun be.+ Nán amun yaci be nun naan be wlu be klɔ’m be nun, afin amun Ɲanmiɛn Zoova fali be wlali amun sa nun.”
20 Zozie nin Izraɛlifuɛ’m be kunnin be kunlɛ kpa, be wieli be nunnun, saan be nun kunngun nga be wanndili mɔ be wluli klɔ nga be sisili be wun’n be nun’n, be yɛ be kali lɛ-ɔ.
21 I sin’n, nvlefuɛ’m be kwlaa be sali be sin Zozie i wun lɔ, Makeda nanmue’n nun lɔ, like w’a yoman be nun wie fi. Kɛ ɔ fin i lɛ’n, sran fi w’a ukemɛn i nuan Izraɛlifuɛ’m be wun kun.
22 I sin’n, Zozie seli kɛ: “Amun tike yɔbuɛ buɛ’n su naan amun fa famiɛn nnun sɔ mun yɔbuɛ buɛ’n nun lɔ blɛ min.”
23 Ɔ maan be fali famiɛn nnun sɔ mun yɔbuɛ buɛ’n nun be blɛli i: Zerizalɛmun famiɛn’n, Ebrɔn famiɛn’n, Zaamiti famiɛn’n, Lakisi famiɛn’n, ɔ nin Eglɔn famiɛn’n.+
24 Kɛ be fali famiɛn sɔ mun blɛli Zozie’n, ɔ flɛli Izraɛli yasua’m be kwlaa kpɛkun ɔ seli alɛ kunfuɛ’m be su kpɛn nga be nin i ɔli alɛ kunlɛ’n be kɛ: “Amun wunnge wa. Amun fa amun ja takataka famiɛn nga’m be kɔmin sin.” Ɔ maan be wunngeli lɔ, kpɛkun be fali be ja takatakali be kɔmin sin.+
25 I sin’n, Zozie seli be kɛ: “Nán srɛ kun amun, yɛ nán amun wun usu amun.+ Amun yo yakpafuɛ yɛ amun jran kekle, afin like nga Zoova wá fá yó amun kpɔfuɛ kwlaa nga amun nin be kun’n yɛ ɔ o lɛ-ɔ.”+
26 I sin’n, Zozie kunnin be, yɛ ɔ sendeli be waka nnun su, be kali waka’m be su lɛ lele nnɔsua.
27 Kɛ wia’n tɔli’n, Zozie seli kɛ maan be yi be waka’m be su jra+ naan be fa be gua yɔbuɛ buɛ nga be ko fiali nun lɔ’n i nun. Kpɛkun be fali yɔbuɛ dandan wie mun sieli yɔbuɛ buɛ’n i nuan’n su. Yɔbuɛ sɔ’m be te o lɛ andɛ.
28 Zozie fali Makeda klɔ’n+ cɛn sɔ’n nun, kpɛkun ɔ fali tokofi kunnin i nun sran mun. Ɔ kunnin famiɛn’n nin sran nga be o klɔ’n nun’n be kwlaa. W’a yaciman sran fi nguan nun.+ Ɔ yoli Makeda famiɛn’n+ kɛ ng’ɔ fa yoli Zeriko famiɛn’n sa.
29 I sin’n, Zozie nin Izraɛlifuɛ’m be kwlaa be fɛli i Makeda lɛ be ɔli Libina, kpɛkun be nin Libinafuɛ’m+ be kunnin alɛ.
30 Zoova fali klɔ’n nin i su famiɛn’n+ wlali Izraɛlifuɛ’m be sa nun, be tɔli klɔ’n su kpɛkun be fali tokofi be kunnin sran’m be kwlaa, b’a yaciman sran fi nguan nun. Ɔ maan be yoli famiɛn’n kɛ nga be fa yoli Zeriko famiɛn’n sa.+
31 Zozie nin Izraɛlifuɛ’m be kwlaa be fɛli i Libina lɛ be ɔli Lakisi,+ be boli nanmue lɛ kpɛkun be nin lɔfuɛ’m be kunnin alɛ.
32 Zoova fali Lakisi klɔ’n wlali Izraɛlifuɛ’m be sa nun, be fali klɔ’n i cɛn nɲɔn su’n nun. Be tɔli klɔ’n su kpɛkun be fali tokofi kunnin sran’m be kwlaa,+ kɛ nga be fa yoli Libinafuɛ mun’n sa.
33 Kɛ ɔ yoli sɔ’n, Ɔramun m’ɔ ti Gezɛɛ+ famiɛn’n ɔ bali Lakisifuɛ’m be ukalɛ, sanngɛ Zozie kunnin i, ɔ nin i sran mun. Be nun ba kun sa w’a kaman lɛ.
34 I sin’n, Zozie nin Izraɛlifuɛ’m be kwlaa be fɛli i Lakisi lɛ be ɔli Eglɔn,+ be boli nanmue lɛ, kpɛkun be nin lɔfuɛ mun kunnin alɛ.
35 Be fali klɔ’n cɛn sɔ’n nun, kpɛkun be fali tokofi kunnin sran mun. Be nunnunnin i nun sran’m be kwlaa cɛn sɔ’n nun, kɛ nga be fa yoli Lakisifuɛ mun’n sa.+
36 I sin’n, Zozie nin Izraɛlifuɛ’m be kwlaa be fɛli i Eglɔn lɛ ɔli Ebrɔn,+ kpɛkun be nin lɔfuɛ’m be kunnin alɛ.
37 Be fali klɔ’n nin klɔ nga be o i wun lɛ’n, be fali tokofi kunnin famiɛn’n nin sran’m be kwlaa, b’a yaciman sran fi nguan nun. Kɛ ng’ɔ fa yoli Eglɔn klɔ’n nunfuɛ mun sa’n, ɔ fali klɔ’n yɛ ɔ nunnunnin i nun sran’m be kwlaa.
38 I agualiɛ su’n, Zozie nin Izraɛlifuɛ’m be kwlaa be ɔli Debii+ lɔ, kpɛkun be nin lɔfuɛ’m be kunnin alɛ.
39 Ɔ fali klɔ’n, ɔ trali famiɛn’n, ɔ fali klɔ nga be o klɔ’n i wun lɛ’n be kwlaa, kpɛkun be fali tokofi kunnin be kwlaa, ɔ nunnunnin sran’m be kwlaa,+ b’a yaciman sran fi nguan nun.+ Ɔ yoli Debii klɔ’n nin i su famiɛn’n kɛ ng’ɔ fa yoli Ebrɔn, ɔ nin Libina nin i su famiɛn’n be sa.
40 Zozie fali okaoka lika’n i kwlaa, ɔ fali Negɛbu nin Sefela,+ ɔ nin oka’m be ja ngua lɔ lika mun, kpɛkun ɔ kunnin be famiɛn mun, w’a yaciman sran fi nguan nun. Ɔ kunnin like kwlaa ng’ɔ lo wunmiɛn’n,+ kɛ nga Zoova m’ɔ ti Izraɛli Ɲanmiɛn’n seli kɛ be yo’n sa.+
41 Zozie fali Kadɛsi-Baanea+ lele fa juli Gaza, ɔ fali+ Gosɛnin+ mɛn’n i kwlaa lele fa juli Gabaɔn.+
42 Zozie kwlali famiɛn sɔ’m be kwlaa, kpɛkun ɔ fali be mɛn’n kpɛ kunngba, afin Zoova m’ɔ ti Izraɛli Ɲanmiɛn’n yɛ ɔ kun Izraɛlifuɛ’m be ti alɛ-ɔ.+
43 I sin’n, Zozie nin Izraɛlifuɛ’m be kwlaa be sali be sin nanmue’n nun lɔ Gilgali lɔ.+
Ja ngua lɔ ndɛ mun
^ Ebr., “Nán ɔ sa’n wɔ mmua.”
