Zozie 11:1-23
11 Kɛ Zabɛn m’ɔ ti Azɔɔ famiɛn’n tili ndɛ sɔ’n, ɔ toli Zobabu m’ɔ ti Madɔn famiɛn’n,+ nin Simunrɔn famiɛn’n, nin Akisafu famiɛn’n+ be ngaliɛ.
2 Ɔ toli famiɛn nga be o nglo lɔ lika’n nun okaoka’m be nun lɔ’n, nin Kinerɛti i ngua lɔ aawlɛ flɛnnɛn’n nun lɔ’n,* nin be nga be o Sefela lɔ’n, nin Dɔɔ+ okaoka lika’n m’ɔ o wia afiliɛ lɔ’n be ngaliɛ wie.
3 Yɛ ɔ toli Kanaanfuɛ+ mɔ be o wia afiliɛ lɔ’n, nin wia atɔliɛ lɔ’n, nin Amɔɔfuɛ mun,+ nin Ɛtifuɛ mun, nin Perizifuɛ mun, nin Zebisifuɛ mɔ be o okaoka lika’m be nun lɔ’n, nin Ivifuɛ+ mɔ be o Ɛrmɔn+ i bo lɛ Mizpa mɛn’n nun’n be ngaliɛ.
4 Ɔ maan be nin be sonja’m be kwlaa be bali, be sɔnnin kpa kɛ jenvie nuan aunɲan’n sa. Be fali nnɛn kpanngɔ kpanngban kpa nin alɛ kunlɛ kakaklolo mun bali.
5 Famiɛn sɔ’m be kwlaa be nuan sɛli su kɛ bé yía, ɔ maan be bali yɛ be boli nanmue likawlɛ Merɔmun Nzue’n i wun lɛ naan be nin Izraɛlifuɛ mun bé kún alɛ.
6 Zoova seli Zozie kɛ: “Nán srɛ kun wɔ be wun.+ Afin ainman dɔ kɛ nga sa su’n, ń fá be ń wlá Izraɛlifuɛ’m be sa nun yɛ amún kún be kwlaa. Ɔ fata kɛ amun kpɛ be nnɛn kpanngɔ’m be jasin ndin’m be nun,+ yɛ amun wɔ be alɛ kunlɛ kakaklolo’m be nun.”
7 Zozie nin i alɛ kunfuɛ’m be kwlaa be wa fuli be nun, yɛ be tɔli be su Merɔmun nzue ti’m be wun lɛ.
8 Zoova fali be wlali Izraɛlifuɛ’m be sa nun,+ be kwlali be, yɛ be suli be su lele juli Sidɔn Dan’n+ nin Misrefɔtu-Maimun,+ ɔ nin Mizpe Kongo’n i wia afiliɛ lɔ. Be kunnin be kwlaa, be nun ba kun sa w’a kaman.+
9 Ɔ maan Zozie yoli i kɛ nga Zoova seli i kɛ ɔ yo’n sa sɛsɛsɛ. Ɔ kpɛli be nnɛn kpanngɔ’m be jasin ndin’m be nun, yɛ ɔ fali sin wɔli be kakaklolo’m be nun.+
10 Asa ekun’n, Zozie sɛli i sin, ɔ fali Azɔɔ klɔ’n, yɛ ɔ fali tokofi kunnin i famiɛn’n,+ afin laa’n Azɔɔ klɔ’n yɛ ɔ ti famiɛn diwlɛ kwlaa sɔ’m be nun klɔ cinnjin’n niɔn.
11 Be fali tokofi kunnin sran’m be kwlaa, be nunnunnin be mlɔnmlɔn.+ Ninnge nga be lo wunmiɛn’n be nun wie fi w’a kaman lɛ.+ I sin’n, ɔ fali sin wɔli Azɔɔ klɔ’n nun.
12 Ɔ fali famiɛn sɔ’m be klɔ’m be kwlaa, yɛ ɔ fali tokofi kunnin be famiɛn’m be kwlaa.+ Ɔ nunnunnin be+ kɛ nga Moizi m’ɔ ti Zoova i sufuɛ’n seli kɛ be yo’n sa.
13 Sanngɛ Izraɛlifuɛ’m b’a wɔman klɔ nga be o kpɔlɛ’m be su’n be nun wie fi nun, saan Azɔɔ klɔ’n nun yɛ be wɔli-ɔ. Klɔ sɔ’n i kunngba cɛ yɛ Zozie wɔli nun-ɔn.
14 Izraɛlifuɛ’m be fali klɔ’n i nun ninnge mun, nin i nun nnɛn mun.+ Sanngɛ be fali tokofi kunnin sran’m be kwlaa, be kunnin be kunngunngun lele be wieli.+ B’a yaciman sran fi nguan nun.+
15 Ndɛ nga Zoova kan kleli i sufuɛ Moizi’n, Moizi kusu kan kleli Zozie,+ yɛ Zozie niannin su yoli-ɔ. Like kwlaa nga Zoova seli Moizi kɛ be yo’n, w’a yaciman be nun ba kun sa lɛ.+
16 Zozie fali mɛn sɔ’n kwlaa, okaoka lika mun, nin Negɛbu+ nin Gosɛnin mɛn’n, nin Sefela,+ nin Araba,+ nin Izraɛli i okaoka lika mun nin i Sefela’n,*
17 ɔ fɛ i Alaki Oka m’ɔ kɔ Seii lɔ’n su lele fa ju Baali-Gadi+ m’ɔ o Liban Kongo’n nun lɔ’n su, Ɛrmɔn Oka’n+ i bo lɛ. Ɔ trali be famiɛn’m be kwlaa, ɔ kunnin be.
18 Zozie nin famiɛn sɔ’m be kunnin alɛ cɛli kan.
19 Klɔ wie fi nin Izraɛlifuɛ’m b’a traman aenguɛ, saan Ivifuɛ mɔ be tran Gabaɔn’n.+ Be nin be onga’m be kwlaa be kunnin alɛ, yɛ be kwlali be.+
20 Zoova yɛ ɔ yacili be lɛ naan be yo ɲin kekle-ɔ.+ Ɔ yoli sɔ naan be nin Izraɛlifuɛ’m be kun alɛ, kɛ ɔ́ yó naan b’a nunnun be kwlaa naan b’a siman be aunnvɔɛ’n ti.+ Ɔ fata kɛ be nunnun be, kɛ nga Zoova seli Moizi kɛ be yo’n sa.+
21 Blɛ kunngba sɔ’n nun’n, Zozie nunnunnin Anakifuɛ+ nga be tran okaoka lika’m be nun lɔ’n, nin Ebrɔn nin Debii nin Anabu nin Zida mɛn’n i okaoka lika’m be nun’n, ɔ nin Izraɛli mɛn’n i okaoka lika’m be nun’n. Zozie nunnunnin be kwlaa, ɔ nin be klɔ mun.+
22 Anakifuɛ wie fi w’a kaman Izraɛlifuɛ’m be mɛn’n nun, Gaza+ nin Gati+ nin Asdɔdu+ lɔ ngunmin yɛ be kali-ɔ.+
23 Ɔ maan Zozie fali mɛn’n kwlaa, kɛ nga Zoova kan kleli Moizi’n sa,+ yɛ ɔ fa mannin Izraɛlifuɛ mun naan ɔ kaci be aja like naan be akpasuaakpasua’m be cɛcɛ nun.+ Ɔ maan b’a kunman alɛ mɛn’n nun kun.+