Zozie 17:1-18
17 I sin’n, be tuli fɔtɔ+ be mannin Manase+ akpasua’n i lika liɛ, afin Manase ti Zozɛfu i wa klikli’n.+ Be fali Galaadi nin Basan+ be mannin Makii+ m’ɔ ti Manase i wa klikli’n, m’ɔ ti Galaadi i si’n. Afin ɔ ti alɛ kunfuɛ dan.
2 Kpɛkun be tuli fɔtɔ be mannin Manase i mma onga’m be lika liɛ, awlobo kun nin i liɛ: Abiezɛɛ+ i mma mun, Elɛki i mma mun, Asriɛli i mma mun, Sisɛmun i mma mun, Efɛɛ i mma mun, ɔ nin Semida i mma mun. Manase m’ɔ ti Zozɛfu i wa’n i mma mun yɛ be o lɛ-ɔ, yasua kun nin i awlobo.+
3 Sanngɛ Zelofeadi+ m’ɔ ti Efɛɛ i wa’n, mɔ i kusu ti Galaadi i wa’n, mɔ i kusu ti Makii i wa’n, mɔ i kusu ti Manase i wa’n, ɔ leman ba yasua. Ba bla ngunmin yɛ ɔ le i-ɔ. I mma bla’m be dunman mun yɛ: Mala, Nowa, Ɔgla, Milka, ɔ nin Tiiza.
4 Ɔ maan be ko wunnin Eleazaa+ m’ɔ ti Ɲanmiɛn ɲrun jranfuɛ’n, nin Nɛn i wa Zozie, ɔ nin kpɛnngbɛn’m be wun. Be seli kɛ: “Zoova yɛ ɔ seli Moizi kɛ ɔ man e aja like e niaan’m be afiɛn-ɔn.”+ Ɔ maan kɛ nga Zoova fa kannin’n sa’n, ɔ mannin be aja like be si’n i niaan bian’m be afiɛn.+
5 Kɛ be tuli fɔtɔ’n, be fali lika blu ekun mannin Manase, b’a kaman Galaadi mɛn’n nin Basan mɛn mɔ be o Zurdɛn’n i bue kun lɔ’n* b’a wlaman nun wie.+
6 Manase i mma bla’m be ɲannin aja like kɛ i mma yasua mun sa, yɛ Galaadi mɛn’n yoli Manase i mma onga’m be liɛ.
7 Manase i awɛ’n fɛ i Azɛɛ lele ju Mikimetati+ m’ɔ o Sisɛmun+ i ɲrun ndɛnman su’n, yɛ awɛ’n kɔ ja ngua lɔ lika’n nun lɔ,* lele fa ju Ɛnin-Tapiafuɛ’m be lɔ.
8 Tapia+ mɛn’n yoli Manase liɛ, sanngɛ Tapia klɔ m’ɔ o Manase i awɛ’n su’n, ɔ yoli Efraimun i mma’m be liɛ.
9 Awɛ’n jra Kana Kongo’n nun lɔ, kongo’n i ja ngua lɔ lika’n nun lɔ. Efraimun i klɔ dandan’m be wie o Manase i klɔ dandan’m+ be nun. Manase i awɛ’n wo kongo’n i nglo lɔ lika’n nun, yɛ ɔ wie jenvie’n su.+
10 Ngua lɔ lika’n ti Efraimun liɛ, yɛ nglo lɔ lika’n ti Manase liɛ, jenvie’n yɛ ɔ ti i awɛ’n niɔn.+ Nglo lɔ lika’n nun’n, Manase i lika’n* ju Azɛɛ i lika liɛ’n su lɔ, yɛ wia afiliɛ lɔ’n lika’n ju Isakaa i lika liɛ’n su lɔ.
11 Isakaa nin Azɛɛ be lika liɛ’n nun lɔ’n, lika nga be fa mannin Manase’n be yɛ: Bɛti-Sean nin i wun lɛ klɔ mun,* Ibleamun,+ ɔ nin i wun lɛ klɔ mun, Dɔɔfuɛ mun,+ ɔ nin be wun lɛ klɔ mun, An-Dɔɔfuɛ mun,+ ɔ nin be wun lɛ klɔ mun, Tanakifuɛ mun,+ ɔ nin be wun lɛ klɔ mun, Megidofuɛ mun, ɔ nin be wun lɛ klɔ mun. Lika nglonglo’m be nun nsan be ti i liɛ.
12 Sanngɛ Manase i mma’m b’a kwlá faman klɔ sɔ mun. Kanaanfuɛ’m be kali mɛn sɔ’n nun kekle nun.+
13 Kɛ Izraɛlifuɛ’m be ɲannin wunmiɛn’n, be miannin Kanaanfuɛ mun kɛ be di junman man be,+ sanngɛ b’a fuanman be* ngba mɛn’n nun.+
14 Zozɛfu i mma’m be seli Zozie kɛ: “?Ngue ti yɛ kɛ a tuli fɔtɔ’n+ a mannin e* lika kunngba kɛ ɔ yo e aja like-ɔ? E sɔnnin, afin lele mɔ w’a fa ju yɛ’n Zoova yrali e su.”+
15 Zozie tɛli be su kɛ: “Kɛ mɔ amun sɔnnin mɔ Efraimun lɔ okaoka lika’n+ su juman amun’n, amun wɔ bo’n nun lɔ, amun ko sɔn Perizifuɛ mun+ nin Refafuɛ’m+ be mɛn’n nun lɔ lika’n wie, naan amun fa.”
16 Yɛ Zozɛfu i mma’m be tɛli i su kɛ: “Okaoka lika’n juman e, yɛ kusu Kanaanfuɛ’m be kwlaa nga be tran kongo lika’n nun lɔ’n,* i be nga be tran Bɛti-Sean+ nin i wun lɛ klɔ’m* be su’n nin-o, ɔ nin be nga be tran Zizreɛli Kongo’n*+ nun lɔ’n nin-o, be kwlaa be le alɛ kunlɛ kakaklolo+ mɔ blalɛ o be ja’m be su’n.”*
17 Ɔ maan Zozie seli Zozɛfu i wa Efraimun nin Manase be kɛ: “Amun sɔnnin yɛ amun le wunmiɛn dan, ɔ maan amun su ɲanman lika kunngba cɛ.+
18 Sanngɛ okaoka lika’n ɔ́ yó amun liɛ wie.+ Kannzɛ ɔ ti bo’n, amún wá sɔ́n, kpɛkun ɔ́ yó amun asiɛ’n i tiwa. Kannzɛ Kanaanfuɛ’m be le wunmiɛn, yɛ be le alɛ kunlɛ kakaklolo mɔ blalɛ o be ja’m be su’n,* sanngɛ amún wá fúan be.”+
Ja ngua lɔ ndɛ mun
^ Yɛle kɛ, wia afiliɛ lɔ.
^ Ebr., “fama su.”
^ Annzɛ “Manasefuɛ mun.” Ebr., “be.”
^ Annzɛ “klɔ nga be bo sin yiɛ i’n.”
^ Annzɛ “b’a kwlá fɛnman be bo ninnge mun.”
^ Ebr., “a mannin min.”
^ Annzɛ “lika kpɛtɛkplɛɛ’n nun lɔ’n.”
^ Annzɛ “klɔ nga be bo sin yiɛ i’n.”
^ Annzɛ “lika kpɛtɛkplɛɛ’n.”
^ Ebr., “blalɛ kakaklolo mun.”
^ Ebr., “blalɛ kakaklolo mun.”
