Zozie 18:1-28
18 I sin’n, Izraɛlifuɛ’m be kwlaa be yiali Silo+ lɔ, kpɛkun be kplannin tannin sua mɔ Ɲanmiɛn yi i wun nglo nun’n lika sɔ’n nun lɛ,+ afin mɛn’n w’a yo be liɛ siɛn’n.+
2 Sanngɛ Izraɛli akpasua nso be te o lɛ mɔ be nin-a manman be aja like’n wie-ɔ.
3 Ɔ maan Zozie seli Izraɛlifuɛ’m be kɛ: “?Amún mínndɛ lele cɛn benin naan amun a ko fa mɛn nga amun nannan’m be Ɲanmiɛn Zoova fa mannin amun’n?+
4 Amun man min sran nsan akpasua kwlaa nun naan n sunman be. Bé kó wlánwlán mɛn’n nun kpɛkun bé jájá be aja like liɛ’n i awɛ mun. I sin’n, bé sá be sin min wun wa.
5 Maan be kpɛkpɛ nun nso naan be cɛcɛ nun.+ Maan Zida kɛ i lika liɛ’n nun ngua lɔ lika’n nun,+ yɛ maan Zozɛfu kɛ i lika liɛ’n nun nglo lɔ lika’n nun.+
6 Maan amun jaja mɛn’n i awɛ mun, amun kpɛkpɛ nun nso, yɛ amun fa blɛ min. Kpɛkun ń má tú fɔtɔ+ lika nga nun wa ń mán amun e Ɲanmiɛn Zoova ɲrun.
7 Sanngɛ be su manman Levifuɛ’m be lika amun afiɛn,+ afin Ɲanmiɛn ɲrun jranlɛ junman nga be di man Zoova’n yɛ ɔ ti be aja like liɛ’n niɔn.+ Gadi nin Ribɛnin, ɔ nin Manase akpasua’n i bue kun nunfuɛ’m+ b’a dun mmua b’a ɲan be aja like liɛ Zurdɛn’n i wia afiliɛ lɔ. Moizi m’ɔ ti Zoova i sufuɛ’n yɛ ɔ fa mannin be-ɔ.”
8 Kɛ be nga Zozie seli be kɛ be ko jaja mɛn’n i awɛ’n be siesieli be wun naan bé kɔ́’n, ɔ seli be kɛ: “Amun wɔ ko wlanwlan mɛn’n nun naan amun jɛjɛ i awɛ mun, yɛ amun sa amun sin min wun wa. Kpɛkun ń tú fɔtɔ ń mán amun Zoova ɲrun, Silo+ wa.”
9 Ɔ maan yasua’m be ɔli be ko wlanwlannin mɛn’n nun, yɛ be jɛjɛli i awɛ mun, be cɛcɛli klɔ’m be nun nso, kpɛkun be klɛklɛli i fluwa kun nun. I sin’n, be sali be sin Zozie wun lɔ Silo nanmue’n nun lɔ.
10 Ɔ maan Zozie tuli fɔtɔ mannin be Silo lɔ, Zoova ɲrun.+ Zozie cɛcɛli lika’n nun mannin Izraɛlifuɛ mun, akpasua kun nin i liɛ.+
11 Lika nga be tuli i wun fɔtɔ’n, ɔ yoli Bɛnzamɛn akpasua’n nun awlobo’m be liɛ. Be lika’n wo Zida i mma mun+ nin Zozɛfu i mma’m+ be afiɛn’n nun.
12 Nglo lɔ lika’n nun’n, be awɛ’n bo i bo Zurdɛn’n su, yɛ awɛ’n fɛ i Zeriko+ oka ng’ɔ o nglo lɔ lika’n nun’n i bo lɛ kɔ oka ng’ɔ o wia atɔliɛ lɔ’n su, kpɛkun ɔ ju Bɛti-Avɛnin+ aawlɛ flɛnnɛn’n su lɔ.
13 Awɛ’n fɛ i lɛ kɔ Lizi, ɔ kɔ Lizi mɔ yɛle Betɛli’n+ i oka ng’ɔ o ngua lɔ lika’n nun’n i bo lɔ. Awɛ’n jra kɔ Atarɔti-Adaa,+ ɔ ju oka ng’ɔ o Bɛti-Orɔn ng’ɔ o Ngua Lɔ’n+ i ngua lɔ lika’n nun’n su.
14 Awɛ’n fɛ i wia atɔliɛ lɔ lika’n nun, ɔ kɔ oka ng’ɔ o Bɛti-Orɔn i ɲrun ndɛnman su ngua lɔ lika’n nun’n su, ɔ bli kɔ ngua lɔ, kpɛkun ɔ wie Kiriati-Baali, yɛle kɛ Kiriati-Zearimun+ m’ɔ ti Zida klɔ kun’n su. Wia atɔliɛ lɔ awɛ’n yɛ ɔ o lɛ-ɔ.
15 Ja ngua lɔ awɛ’n fɛ i Kiriati-Zearimun i tiwa lɛ, kpɛkun awɛ’n kɔ wia atɔliɛ lɔ lika’n nun, ɔ kɔ Nɛfutoa nzue ti’m+ be su lɔ.
16 Awɛ’n jra kɔ oka ng’ɔ o Inɔmun i Wa’n i Kongo’n+ i ɲrun ndɛnman su’n i bo lɔ, Refafuɛ’m+ be Kongo’n* nun lɔ, nglo lɔ lika’n nun, kpɛkun ɔ jra kɔ Inɔmun Kongo’n nun lɔ, ɔ ju Zebisifuɛ’n+ i oka’n i bo lɔ ja ngua lɔ lika’n nun, yɛ ɔ jra kɔ An-Rogɛli.+
17 Ɔ fɛ i nglo lɔ lika’n nun kɔ An-Semɛsi, kpɛkun ɔ kɔ Gelilɔti m’ɔ o Adumimun kpɔlɛ’n+ i ɲrun ndɛnman su lɛ’n i wun lɔ, yɛ ɔ jra kɔ Ribɛnin i wa Boan+ i yɔbuɛ’n+ su lɔ.
18 Kpɛkun ɔ kɔ nglo lɔ lika’n nun, oka ng’ɔ o Araba i ɲrun ndɛnman su’n i bo lɔ, yɛ ɔ jra kɔ Araba.
19 Awɛ’n kɔ lele ju Bɛti-Ogla+ oka’n i bo lɔ, nglo lɔ lika’n nun. Kpɛkun awɛ’n wie kɛ nga Jenvie ng’ɔ ti Njin Nzue Klakla’n ɔ bli kolongo lɛ’n,+ Zurdɛn’n i tiwa m’ɔ o ngua lɔ lika’n nun’n su. Ja ngua lɔ lika’n nun awɛ’n yɛ ɔ o lɛ-ɔ.
20 Zurdɛn’n yɛ ɔ ti wia afiliɛ lɔ lika’n i awɛ’n niɔn. Bɛnzamɛn i mma’m be aja like’n i bue kwlaa su awɛ mun yɛ be o lɛ-ɔ, awlobo kun nin i liɛ.
21 Klɔ nga be cɛcɛli be nun mannin Bɛnzamɛn akpasua’n nun awlobo mun’n be yɛ: Zeriko, Bɛti-Ogla, Emɛki-Kezizi,
22 Bɛti-Araba,+ Zemaraimun, Betɛli,+
23 Avimun, Para, Ofra,
24 Kefaa-Amonin, Ɔfinin, ɔ nin Geba.+ Klɔ dandan’m be ti blu-nin-nɲɔn (12), yɛ klɔ kanngan wie’m be mantan be.
25 Gabaɔn,+ Rama, Beerɔti,
26 Mizpe, Kefira, Moza,
27 Rekɛmun, Lipeɛli, Tarala,
28 Zela,+ A-Elɛfu, Zebisi, yɛle kɛ Zerizalɛmun,+ Gibea,+ ɔ nin Kiriati. Klɔ dandan’m be ti blu-nin-nnan (14), yɛ klɔ kanngan wie’m be mantan be.
Bɛnzamɛn i mma’m be aja like liɛ’n yɛ ɔ o lɛ-ɔ, awlobo kun nin i liɛ.
Ja ngua lɔ ndɛ mun
^ Annzɛ “lika kpɛtɛkplɛɛ’n.”