Zozie 20:1-9
-
Fiawlɛ klɔ mun (1-9)
20 I sin’n, Zoova seli Zozie kɛ:
2 “Se Izraɛlifuɛ’m be kɛ: ‘An kpa fiawlɛ klɔ+ nga n seli Moizi kɛ ɔ kɛn i ndɛ kle amun’n.
3 I liɛ’n, sɛ sran wie kun sran mɔ nɛ́n i ɲinfu yɛ ɔ yoli sɔ’n, annzɛ kusu sɛ w’a sunnzunman kɛ ɔ́ kún i’n,* ɔ kwla wanndi kɔ lɔ. Klɔ sɔ’m bé yó amun fiawlɛ klɔ, sran nga be kunnin i’n i klunngbɔ tufuɛ’n*+ i dunman nun ti.
4 Ɔ fata kɛ sran ng’ɔ kunnin sran’n ɔ wanndi wɔ klɔ sɔ’m be nun kun su,+ maan ɔ jran klɔ’n i anuan’n nun lɛ,+ yɛ ɔ bo sa ng’ɔ yoli’n su kle klɔ sɔ’n i su kpɛnngbɛn mun. I sin’n, ɔ fata kɛ be kplin su naan ɔ wlu klɔ’n nun, kpɛkun be mɛn i lika kun naan ɔ nin be tran lɛ.
5 Sɛ klunngbɔ tufuɛ’n su i su’n, ɔ fataman kɛ be fa sran’n wlɛ i sa nun, afin w’a sunnzunman kɛ* ɔ́ kún i wiengu’n, yɛ kusu ɔ kpɔmɛn i laa.+
6 Ɔ fata kɛ ɔ ka klɔ sɔ’n su lele naan be di i jɔlɛ nzrafuɛ’m be ɲrun.+ Yɛ ɔ fata kɛ ɔ ka lɔ lele saan Ɲanmiɛn ɲrun jranfuɛ dan ng’ɔ o lɛ blɛ sɔ’n nun’n w’a wu.+ I sin’n, sran ng’ɔ kunnin sran’n ɔ kwla sɛ i sin klɔ m’ɔ wanndili su’n i su, yɛ ɔ kwla wlu i klɔ’n ɔ nin i awlo’n nun.’”+
7 Ɔ maan be kpali klɔ wie mun sieli be ngunmin: Kedɛsi+ m’ɔ o Galile’n, m’ɔ o Nɛftali okaoka lika’n nun lɔ’n, nin Sisɛmun+ m’ɔ o Efraimun okaoka lika’n nun lɔ’n, ɔ nin Kiriati-Aaba,+ yɛle kɛ Ebrɔn m’ɔ o Zida okaoka lika’n nun lɔ’n.
8 Zurdɛn’n i bue liɛ’n su lɔ’n, Zeriko i wia afiliɛ lɔ’n, be fali Bezɛɛ+ m’ɔ o Ribɛnin akpasua’n nun’n, ɔ o aawlɛ flɛnnɛn’n nun lɔ, lika kpɛtɛkplɛɛ’n nun lɔ. Gadi akpasua’n nun’n, be fali Ramɔtu+ m’ɔ o Galaadi lɔ’n. Yɛ Manase akpasua’n+ nun’n, be fali Golan+ m’ɔ o Basan lɔ’n.
9 Izraɛlifuɛ’m be kwlaa, nin aofuɛ nga be tran be afiɛn’n, be liɛ ti yɛ be kpali klɔ sɔ mun-ɔn. Sran kwlaa ng’ɔ kun sran mɔ nɛ́n i ɲinfu yɛ ɔ yoli sɔ’n, ɔ kwla wanndi kɔ lɔ+ naan klunngbɔ tufuɛ’n w’a kunmɛn i ka naan b’a di i jɔlɛ nzrafuɛ’m be ɲrun.+
Ja ngua lɔ ndɛ mun
^ Annzɛ “ɔ siman sɔ’n.”
^ Ebr., “sran ng’ɔ tu mmoja’n i klunngbɔ’n.”
^ Annzɛ “ɔ siman kɛ.”
