Zozie 22:1-34
22 I sin’n, Zozie flɛli Ribɛninfuɛ mun, nin Gadifuɛ mun, ɔ nin Manase akpasua’n i bue kun nunfuɛ mun,
2 kpɛkun ɔ seli be kɛ: “Amun yoli like kwlaa nga Moizi m’ɔ ti Zoova i sufuɛ’n seli amun kɛ amun yo’n,+ yɛ ndɛ kwlaa nga n kan kleli amun’n, amun fali su.+
3 Kɛ ɔ fɛ i laa lele andɛ’n, amun a yaciman amun niaan mun.+ Amun fali amun Ɲanmiɛn Zoova i ndɛ’n su.+
4 Amun Ɲanmiɛn Zoova w’a yo maan amun niaan’m be wun w’a jɔ be fɔuun, kɛ ng’ɔ fa kannin’n sa.+ Siɛn’n, amun kwla sa amun sin amun tannin sua’m be nun, mɛn nga Moizi m’ɔ ti Zoova i sufuɛ’n fa mannin amun Zurdɛn’n i bue kun lɔ’n* nun.+
5 Sanngɛ amun nian amun wun kpa, amun fa ndɛ nin Mmla nga Moizi m’ɔ ti Zoova i sufuɛ’n fa mannin amun’n su,+ yɛle kɛ amun klo amun Ɲanmiɛn Zoova,+ amun fɛ i atin’m be su,+ amun nanti i ndɛ’m be su,+ amun fa amun wun mɛntɛn i,+ amun fa amun awlɛn’n kwlaa nin amun nguan’n kwlaa+ be su i.”+
6 I sin’n, Zozie boli muae mannin be, kpɛkun ɔ mannin be atin, yɛ be ɔli be tannin sua’m be nun-ɔn.
7 Moizi mannin Manase akpasua’n i bue kun nunfuɛ mun be aja like liɛ Basan+ lɔ, yɛ akpasua bue kun’n i nunfuɛ’m be liɛ’n, Zozie mannin be lika Zurdɛn’n i wia atɔliɛ lɔ+ naan be nin be niaan mun be tran lɔ. Kɛ Zozie seli be kɛ be wɔ be tannin sua’m be nun’n, ɔ boli muae mannin be.
8 Kpɛkun ɔ seli be kɛ: “Maan amun fa aɲanbeun ninnge kpanngban naan amun sa amun sin amun tannin sua’m be nun, amun fa nnɛn kpanngban, nin sika nin sika ɔkwlɛ, nin aaba nin blalɛ, ɔ nin tralɛ kpanngban kpa.+ Amun fa amun kpɔfuɛ’m be bo ninnge mun naan amun nin amun niaan mun amun cɛcɛ nun.”+
9 Kɛ ɔ yoli sɔ’n, Ribɛninfuɛ mun nin Gadifuɛ mun, ɔ nin Manase akpasua’n i bue kun nunfuɛ’m be jasoli Izraɛlifuɛ onga’m be wun lɛ be ɔli. Be jasoli Silo lɛ, Kanaan mɛn’n nun, kpɛkun be sali be sin Galaadi+ mɛn’n nun lɔ. Mɛn sɔ’n yɛ be fa mannin be kɛ be tran nun-ɔn, kɛ nga Zoova kan kleli Moizi’n sa.+
10 Kɛ Ribɛninfuɛ mun nin Gadifuɛ mun, nin Manase akpasua’n i bue kun nunfuɛ’m be juli Zurdɛn’n i wun lɔ Kanaan mɛn’n nun lɔ’n, be kplannin tɛ yiwlɛ kun Zurdɛn’n i wun lɛ. Tɛ yiwlɛ sɔ’n ti dan kpa.
11 I sin’n, Izraɛlifuɛ onga’m be tili i kɛ:+ “Amun nian! Ribɛninfuɛ mun nin Gadifuɛ mun, ɔ nin Manase akpasua’n i bue kun nunfuɛ’m b’a kplan tɛ yiwlɛ kun Kanaan mɛn’n i awɛ’n su lɔ, Zurdɛn’n i lika ng’ɔ ti Izraɛlifuɛ’m be liɛ’n nun.”
12 Kɛ Izraɛlifuɛ’m be tili ndɛ sɔ’n, be kwlaa be ti yiali Silo+ lɔ naan be nin be kó kún alɛ.
13 Ɔ maan Izraɛlifuɛ’m be sunmannin Fineasi+ m’ɔ ti Ɲanmiɛn ɲrun jranfuɛ Eleazaa i wa’n, naan ɔ wɔ Ribɛninfuɛ mun nin Gadifuɛ mun, ɔ nin Manase akpasua’n i bue kun nunfuɛ’m be sin Galaadi mɛn’n nun lɔ.
14 Nvle’n nun kpɛn blu be nin i ɔli, be kwlaa be ti Izraɛli akpasua’m be nun awloboawlobo’m be su kpɛn, be tinuntinun be ti be si’m be awlobo’m be su kpɛn, be ti sran akpi* su kpɛn Izraɛli lɔ.+
15 Kɛ be juli Ribɛninfuɛ mun, nin Gadifuɛ mun, nin Manase akpasua’n i bue kun nunfuɛ’m be wun lɔ’n, be seli be kɛ:
16 “Ndɛ nga Zoova i nvle’n nunfuɛ’m be kwlaa be kan’n yɛ: ‘?Ngue ti yɛ amun nin Izraɛli Ɲanmiɛn’n b’a nantiman klanman mɔ amun yoli sa tɛ+ nga-ɔ? Amun a kaci amun sin b’a si Zoova andɛ, afin amun kplannin tɛ yiwlɛ kun, yɛ amun yoli ɲin kekle Zoova su.+
17 ?Peɔɔ lɔ sa tɛ liɛ’n w’a timan amun? Andɛ nin andɛ’n, e te wun sa sɔ’n i su afɛ, kusu nn sa sɔ’n ti’n ɲrɛnnɛn tɔli Zoova i nvle’n su.+
18 Kpɛkun andɛ’n, amun kunndɛ kɛ amún káci amun sin sí Zoova! Sɛ amun yo ɲin kekle Zoova su andɛ’n, ainman’n ɔ́ fá Izraɛlifuɛ’m be kwlaa+ be wun ya.
19 Sɛ lika nga amun tran nun’n yɛ ɔ ti fiɛn’n, amun bla mɛn ng’ɔ ti Zoova liɛ’n nun wa,+ kɛ nga Zoova i tannin sua’n wo wa’n,+ naan amun tran e afiɛn. Nán amun yo ɲin kekle Zoova su, yɛ nán amun kplan tɛ yiwlɛ uflɛ fa uka e Ɲanmiɛn Zoova i tɛ yiwlɛ liɛ’n su naan e yo ɲin keklefuɛ.+
20 ?Kɛ Akan+ m’ɔ ti Zera i wa’n yoli sa tɛ m’ɔ fali like ng’ɔ fata kɛ be nunnun i’n, Ɲanmiɛn w’a faman Izraɛlifuɛ’m be kwlaa be wun ya?+ Nán Akan i ngunmin yɛ ɔ wuli i sa tɛ’n i ti-ɔ.’”+
21 Ɔ maan Ribɛninfuɛ mun, nin Gadifuɛ mun, nin Manase akpasua’n i bue kun nunfuɛ mun be tɛli Izraɛli lɔ sran akpi* su kpɛn mun be su kɛ:+
22 “Zoova, ɲanmiɛn’m be Ɲanmiɛn’n! Zoova, ɲanmiɛn’m be Ɲanmiɛn’n!+ Ɔ si sa sɔ’n, yɛ Izraɛlifuɛ’m bé wá sí sa sɔ’n wie. Sɛ e yoli ɲin kekle naan e nin Zoova y’a nantiman klanman’n, nán maan ɔ yaci e lɛ andɛ.
23 Sɛ e kplannin tɛ yiwlɛ kun naan é káci e sin é sí Zoova’n, naan é yí tɛ nga kɛ bé yí’n be yra nnɛn’n i kɔlikɔli’n, annzɛ é fá ble annzɛ i wunsu like é síe su, annzɛ é yí bo kun yolɛ tɛ su’n, maan Zoova tu e fɔ.+
24 Like uflɛ ti yɛ e kplannin-ɔn, afin e seli e wun kɛ: ‘Cɛn wie lele’n, amun mma’m bé wá sé e mma liɛ’m be kɛ: “?Ngue like yɛ ɔ o amun nin Zoova m’ɔ ti Izraɛli Ɲanmiɛn’n amun afiɛn-ɔn?
25 Zoova fali Zurdɛn’n fa sieli e nin amun Ribɛninfuɛ mun, nin Gadifuɛ mun e afiɛn naan ɔ yo e awɛ. Amun liɛ nunman Zoova nun wie.” Ɔ maan amun mma’m be su kplinman su kɛ e mma liɛ’m be su* Zoova wie.’
26 “Ɔ maan e seli e wun kɛ: ‘Ɔ fata kɛ e kplan tɛ yiwlɛ kun. Nán kɛ e waan é yí tɛ nga kɛ bé yí’n be yra nnɛn’n i kɔlikɔli’n annzɛ tɛ uflɛ su ti-ɔ.
27 Sanngɛ e waan ɔ yo e nin amun, ɔ nin e mma nga bé bá e sin’n e afiɛn lalofuɛ+ kɛ e le atin e su Zoova, yɛ e le atin e yi tɛ nga kɛ bé yí’n be yra nnɛn’n i kɔlikɔli’n nin tɛ uflɛ, ɔ nin bo kun yolɛ tɛ e mɛn i.+ I liɛ’n, cɛn wie lele’n amun mma’m be su seman e mma liɛ’m be kɛ: “Amun liɛ nunman Zoova nun wie.”’
28 Ɔ maan e seli e wun kɛ: ‘Sɛ cɛn wie lele be se e nin e mma mun e sɔ’n, é sé be kɛ: “Amun nian, Zoova i tɛ yiwlɛ’n i wunsu yɛ e nannan’m be yoli i yɛ. Nán kɛ e waan é yí tɛ nga kɛ bé yí’n be yra nnɛn’n i kɔlikɔli’n annzɛ tɛ uflɛ su ti-ɔ, sanngɛ ɔ ti e nin amun e afiɛn lalofuɛ.”’
29 Ɔ su kpɛnman e klun le kɛ e yo ɲin kekle Zoova su, annzɛ e kaci e sin e si Zoova andɛ,+ naan e kplan tɛ yiwlɛ kun e uka Zoova i tɛ yiwlɛ ng’ɔ o tannin sua’n i ɲrun lɛ’n su, naan e yi tɛ nga kɛ bé yí’n be yra nnɛn’n i kɔlikɔli’n, annzɛ e fa ble annzɛ i wunsu like e sie su, annzɛ e yi tɛ uflɛ su!”+
30 Kɛ Fineasi m’ɔ ti Ɲanmiɛn ɲrun jranfuɛ’n, ɔ nin nvle’n nun kpɛn mun, ɔ nin Izraɛli lɔ sran akpi* su kpɛn nga be o i wun lɛ’n, be tili ndɛ nga Ribɛnin nin Gadi nin Manase be mma’m be kannin’n, be klun jɔli.+
31 Ɔ maan Fineasi m’ɔ ti Eleazaa i wa’n m’ɔ ti Ɲanmiɛn ɲrun jranfuɛ’n, ɔ seli Ribɛnin nin Gadi nin Manase be mma’m be kɛ: “Andɛ’n, e si kɛ Zoova o e afiɛn, afin amun a yoman sa tɛ sɔ’n Zoova wun. Amun deli Izraɛlifuɛ mun Zoova sa nun.”
32 I sin’n, Fineasi m’ɔ ti Ɲanmiɛn ɲrun jranfuɛ Eleazaa i wa’n, ɔ nin kpɛnngbɛn mun be jasoli Ribɛninfuɛ mun, nin Gadifuɛ’m be mɛn’n nun Galaadi lɛ be sali be sin Kanaan mɛn’n nun lɔ, be ko kannin ndɛ’n kleli Izraɛlifuɛ onga mun.
33 Izraɛlifuɛ’m be klun jɔli ndɛ’n su. Ɔ maan be manmannin Ɲanmiɛn, kpɛkun alɛ nga be waan bé fá wlá Ribɛninfuɛ mun nin Gadifuɛ’m be sin naan bé núnnún mɛn nga be tran nun’n, b’a kɛnmɛn i ndɛ kun.
34 I sɔ’n ti’n, Ribɛninfuɛ mun nin Gadifuɛ’m be tɔnnin tɛ yiwlɛ’n i dunman.* Afin be seli kɛ: “Ɔ ti e afiɛn lalofuɛ, ɔ kle kɛ Zoova ti Ɲanmiɛn Kpli.”
Ja ngua lɔ ndɛ mun
^ Yɛle kɛ, wia afiliɛ lɔ.
^ Annzɛ “awloboawlobo’m be.”
^ Annzɛ “awloboawlobo’m be.”
^ Ebr., “sro.”
^ Annzɛ “awloboawlobo’m be.”
^ Kɛ nga ndɛ mma’n fa kan’n sa’n, atrɛkpa’n tɛ yiwlɛ’n i dunman’n yɛle Lalofuɛ.
