Zozie 4:1-24
-
Yɔbuɛ mɔ be ti be wla kpɛnlɛ like’n (1-24)
4 Kɛ Izraɛlifuɛ’m be kwlaa be wieli Zurdɛn’n i kpɛ cɛ’n, Zoova seli Zozie kɛ:
2 “Fa nvlefuɛ’m be nun yasua blu-nin-nɲɔn (12), fa akpasua kun nun yasua kun.+
3 Kpɛkun kan ndɛ yɛ’n kle be, se be kɛ: ‘Amun fa yɔbuɛ blu-nin-nɲɔn (12) Zurdɛn’n i afiɛn, lika nga Ɲanmiɛn ɲrun jranfuɛ’m be takatakali be ja mun lɛ’n,+ amun fa be naan amun siesie be lika nga amún lá lɛ kɔnguɛ’n.’”+
4 Ɔ maan Zozie flɛli yasua blu-nin-nɲɔn (12) ng’ɔ fali be Izraɛlifuɛ’m be nun’n, ɔ fali akpasua kun nun yasua kun.
5 Kpɛkun Zozie seli be kɛ: “Amun sin amun Ɲanmiɛn Zoova i Alaka’n i ɲrun, Zurdɛn’n i afiɛn lɔ, yɛ maan amun tinuntinun amun fa yɔbuɛ kun fa bo amun wati. Maan Izraɛli akpasua kun fa yɔbuɛ kun.
6 Bé yó amun nzɔliɛ like. Sɛ amun mma’m* be usa amun kɛ: ‘?Ngue ti yɛ amun siesieli yɔbuɛ nga mun wa-ɔ?’+
7 Ɔ fata kɛ amun se be kɛ: ‘Afin Zurdɛn nzue’n yacili sonjilɛ Zoova i aenguɛ’n i alaka’n+ i ɲrun. Kɛ ɔ́ kpɛ́ Zurdɛn’n, Zurdɛn nzue’n yacili sonjilɛ. Yɔbuɛ nga’m bé yó Izraɛlifuɛ’m be wla kpɛnlɛ like titi.’”+
8 Ɔ maan Izraɛlifuɛ’m be yoli i kɛ nga Zozie seli be kɛ be yo’n sa sɛsɛsɛ. Be fali yɔbuɛ blu-nin-nɲɔn (12) Zurdɛn’n i afiɛn kɛ nga Zoova kan kleli Zozie’n sa, naan yɔbuɛ’m be nuan nin Izraɛli akpasua’m be nuan yo kun. Be fa be ɔli lika nga bé lá lɛ kɔnguɛ’n, kpɛkun be siesieli be lɛ.
9 Zozie fali yɔbuɛ blu-nin-nɲɔn (12) ekun siesieli be wiengu su Zurdɛn’n i afiɛn, lika nga Ɲanmiɛn ɲrun jranfuɛ nga be suali aenguɛ’n i alaka’n be takatakali be ja mun lɛ’n.+ Yɔbuɛ sɔ’m be te o lɛ andɛ.
10 Ɲanmiɛn ɲrun jranfuɛ nga be sua Alaka’n, be jrannin Zurdɛn’n i afiɛn lele Izraɛlifuɛ’m be wieli like nga Zoova seli Zozie kɛ be yo’n i kwlaa yo. Be niannin ndɛ nga Moizi kan kleli Zozie’n i kwlaa su yoli. Kɛ ɔ́ yó sɔ’n, nn nvlefuɛ’m bé kán be wun kpɛ́ nzue’n.
11 Kɛ nvlefuɛ’m be kwlaa be wieli sin cɛ’n, Zoova i Alaka’n nin Ɲanmiɛn ɲrun jranfuɛ’m be sinnin nvlefuɛ’m be ɲrun lɛ.+
12 Ribɛninfuɛ mun nin Gadifuɛ mun, ɔ nin Manase akpasua’n i bue kun nunfuɛ’m be kpɛli Zurdɛn’n kɛ be su kɔ alɛ kunlɛ sa,+ be dunnin mmua Izraɛlifuɛ onga’m be ɲrun, kɛ nga Moizi seli be kɛ be yo’n sa.+
13 Sonja kɔe akpiakpi ablanan (40.000) mɔ alɛ kunlɛ ninnge o be sa nun’n, be kpɛli Zurdɛn’n Zoova i ɲrun, kpɛkun be ɔli Zeriko aawlɛ flɛnnɛn’n nun lɔ.
14 Cɛn sɔ’n nun’n, Zoova yoli maan Zozie ɲannin ɲrun Izraɛlifuɛ’m be kwlaa be ɲrun,+ yɛ i nguan blɛ’n i kwlaa nun’n, be ɲin yili i kpa* kɛ nga be ɲin fa yili Moizi’n sa.+
15 I sin’n, Zoova seli Zozie kɛ:
16 “Se Ɲanmiɛn ɲrun jranfuɛ nga be sua Mmla’n* i alaka’n+ be kɛ be fin Zurdɛn’n nun be fite.”
17 Ɔ maan Zozie seli Ɲanmiɛn ɲrun jranfuɛ’m be kɛ: “Amun fin Zurdɛn’n nun fite.”
18 Kɛ Ɲanmiɛn ɲrun jranfuɛ nga be sua Zoova i aenguɛ’n i alaka’n+ be fin Zurdɛn’n i afiɛn fiteli mɔ be ja kannin asiɛ kee’n, Zurdɛn nzue’n boli sonjilɛ bo ekun, kpɛkun ɔ yili lele ɔ katali ce’n su+ kɛ laa’n sa.
19 Anglo klikli’n i cɛn ba blu’n su yɛ nvlefuɛ’m be kpɛli Zurdɛn’n niɔn, kpɛkun be boli nanmue Gilgali+ lɛ, Zeriko klɔ’n i wia afiliɛ lɔ.
20 Yɔbuɛ blu-nin-nɲɔn (12) nga be fali be Zurdɛn’n nun fiteli’n be liɛ’n, Zozie fa be siesieli be wiengu su Gilgali+ lɛ.
21 I sin’n, ɔ seli Izraɛlifuɛ’m be kɛ: “Cɛn wie lele’n, kɛ amun mma’m bé wá úsa be si’m be kɛ: ‘?Yɔbuɛ nga’m be bo’n kle sɛ?’+
22 Ɔ fata kɛ amun yiyi nun kle amun mma’m be kɛ: ‘Izraɛli sinnin asiɛ kee’n+ su kpɛli Zurdɛn’n.
23 Blɛ sɔ’n nun’n, amun Ɲanmiɛn Zoova yoli maan Zurdɛn nzue’n wieli nun be ɲrun lɛ lele be sinnin, kɛ nga amun Ɲanmiɛn Zoova yoli mɔ Jenvie Ɔkwlɛ’n wieli nun e ɲrun lɛ mɔ e sinnin’n sa.+
24 Ɔ yoli sɔ naan asiɛ’n sufuɛ’m be kwlaa be si kɛ wunmiɛn o Zoova i sa’n nun,+ kɛ ɔ ko yo naan amun a sro amun Ɲanmiɛn Zoova titi’n ti.’”
