Zozie 5:1-15
5 Kɛ Amɔɔfuɛ+ mɔ be o Zurdɛn’n i wia atɔliɛ lɔ’n* be famiɛn’m be kwlaa, be nin Kanaanfuɛ+ mɔ be o jenvie’n i wun lɔ’n be famiɛn’m be kwlaa, be tili i kɛ Zoova yoli maan Zurdɛn nzue’n wieli nun Izraɛlifuɛ’m be ɲrun naan be sinnin’n, be wawɛ’n tɔli blo,*+ yɛ be sa sin bubuli be Izraɛlifuɛ’m be ti.+
2 Blɛ sɔ’n nun’n, Zoova seli Zozie kɛ: “Fa yɔbuɛ m’ɔ la kpa’n fa yo laliɛ wie mun, kpɛkun wla Izraɛli yasua’m be klɛn+ i kpɛ nɲɔn su.”
3 Ɔ maan Zozie fali yɔbuɛ m’ɔ la kpa’n yoli laliɛ wie mun, kpɛkun ɔ wlali Izraɛli yasua’m be klɛn Gibeati-Aaralɔti* lɛ.+
4 Sa nga ti yɛ Zozie wlali be klɛn’n yɛ: Nvlefuɛ’m be nun yasua kwlaa nga be fin Ezipti lɔ fiteli’n, yɛle kɛ yasua kwlaa nga be kun alɛ’n,* kɛ be fin Ezipti lɔ fiteli’n, be wuli atin nun aawlɛ flɛnnɛn’n nun lɔ.+
5 Nvlefuɛ’m be kwlaa nga be fin Ezipti lɔ fiteli’n be wlali be klɛn, sanngɛ kɛ be fin Ezipti lɔ fiteli’n mɔ bé kɔ́’n, be kwlaa nga be wuli be atin nun aawlɛ flɛnnɛn’n nun lɔ’n, b’a wlaman be klɛn.
6 Izraɛlifuɛ’m be nantili aawlɛ flɛnnɛn’n nun afuɛ ablanan (40)+ lele nvlefuɛ’m be wunmuan’n be wuli, yɛle kɛ be nun yasua nga be kun alɛ mɔ be fin Ezipti lɔ fiteli’n mɔ b’a nantiman Zoova i ndɛ’n su’n,+ be wuli. Zoova tali be nda kɛ be su wunman mɛn+ nga Zoova tali be nannan’m be nda kɛ ɔ́ fá mán e’n+ i mlɔnmlɔn. Nɔnnɔn nin awɛma nzue sonji mɛn sɔ’n nun.+
7 Ɔ maan ɔ fali be mma mun kacili be.+ Be yɛ Zozie wlali be klɛn-ɔn. Afin blɛ mɔ be o atin’n su’n b’a wlaman be klɛn.
8 Kɛ be wieli nvle wunmuan’n i klɛn wla’n, be kali kan be o lɛ’n nanmue’n nun lɛ lele be yoli juejue.
9 I sin’n, Zoova seli Zozie kɛ: “Andɛ’n m’an yi ɲannzuɛn nga Eziptifuɛ’m be fa yili amun su’n.” Ɔ maan be flɛli lika sɔ’n kɛ Gilgali,*+ lele nin andɛ’n be te flɛ i sɔ.
10 Izraɛlifuɛ’m be kali Gilgali nanmue’n nun lɛ, yɛ anglo’n i le blu-nin-nnan (14) su’n,+ nnɔsua nun’n, be dili Delɛ Cɛn’n Zeriko aawlɛ flɛnnɛn’n nun lɔ.
11 Kɛ be dili Delɛ Cɛn’n, i cɛn ng’ɔ su i su’n nun’n be dili mɛn’n i nun ninnge mun. Be dili kpanwun mɔ levii nunman nun’n,+ ɔ nin like mma mɔ be kɛɛnnin be’n.
12 Cɛn nga be boli mɛn’n i nun ninnge’m be dilɛ bo’n, i cɛn ng’ɔ su i su’n, manin’n yacili fitelɛ. Izraɛlifuɛ’m b’a ɲanman manin kun.+ Afuɛ sɔ’n nun’n be boli Kanaan mɛn’n i nun ninnge’m be dilɛ bo.+
13 Cɛn kun mɔ Zozie o Zeriko i wun koko lɛ’n, ɔ́ nían-ɔn, sran kun+ yɛ ɔ jin i ɲrun ndɛnman su yɛ, tokofi o i sa nun.+ Zozie wunngeli i wun lɔ, yɛ ɔ usɛli i kɛ: “?A o e sin annzɛ a o be nga be nin e kun’n be sin?”
14 Ɔ tɛli i su kɛ: “N ti Zoova i sonja’m be su kpɛn.”+ Ɔ maan Zozie kotoli, ɔ utuli i ɲin ase, ɔ seli i kɛ: “?Ndɛ benin yɛ min min’n waan ɔ́ kán klé i sufuɛ’n niɔn?”
15 Zoova i sonja’m be su kpɛn’n seli Zozie kɛ: “Yi ɔ ja ngbabua’n, afin lika nga a o nun yɛ’n ɔ ti Ɲanmiɛn liɛ.” Zozie ka lɛ yoli sɔ.+
Ja ngua lɔ ndɛ mun
^ Ebr., “i bue ng’ɔ kpɛ jenvie’n su lɔ’n.”
^ Ebr., “be awlɛn’n kloli.”
^ I bo’n yɛ: “be yasua lika’n i ti kplo’n i kpɔlɛ.”
^ Annzɛ “yasua nga b’a ju alɛ kunlɛ’n.”
^ I bo’n yɛ: “Like Kondolɛ.”
