Zozie 6:1-27
6 Izraɛlifuɛ’m be ti’n, be ɲinnin Zeriko klɔ’n i anuan’m be cinnjinnjin kpa. Sran fi kwlá fiteman yɛ sran fi kwlá wluman lɔ.+
2 Zoova seli Zozie kɛ: “Nian, m’an fa Zeriko klɔ’n nin i famiɛn’n, ɔ nin i alɛ kunfuɛ kpakpa mun m’an wla ɔ sa nun.+
3 Maan amun kwlaa nga amun kun alɛ’n, amun nanti sin yia klɔ’n, amun sin yiɛ i kpɛ kunngba. Maan amun yo i sɔ cɛn ba nsiɛn.
4 Se Ɲanmiɛn ɲrun jranfuɛ nso naan be fa bua ɲin wɛ nso be dun mmua Alaka’n i ɲrun. Sanngɛ cɛn ba nso’n su’n, maan amun bo sin yia klɔ’n kpɛ nso, yɛ maan Ɲanmiɛn ɲrun jranfuɛ’m be bo awɛ mun.+
5 Kɛ bua ɲin wɛ’n ko tɛ’n, kɛ amun ko ti awɛ’n* i tɛlɛ cɛ’n, maan nvlefuɛ’m be kwlaa be kpan alɛ kpanlɛ kekle kpa. I sin’n, klɔ’n i wun talɛ’n bú gúa.+ Yɛ maan nvlefuɛ’m be wlu klɔ’n nun, maan sran kun wɔ i ɲrun ndɛnman su trele.”
6 Ɔ maan Zozie m’ɔ ti Nɛn i wa’n yiali Ɲanmiɛn ɲrun jranfuɛ mun, kpɛkun ɔ seli be kɛ: “Amun fa aenguɛ’n i alaka’n, yɛ maan Ɲanmiɛn ɲrun jranfuɛ nso be fa bua ɲin wɛ nso be dun mmua Zoova i Alaka’n i ɲrun.”+
7 I sin’n, ɔ seli nvlefuɛ’m be kɛ: “Amun wɔ naan amun nanti sin yia klɔ’n, maan sonja’m+ be dun mmua Zoova i Alaka’n i ɲrun.”
8 Ɔ maan kɛ nga Zozie kan kleli nvlefuɛ mun sa’n, Ɲanmiɛn ɲrun jranfuɛ nso mɔ be tra bua ɲin wɛ nso’m be nun Zoova ɲrun’n, be ɔli. Kɛ bé kɔ́’n be bo awɛ mun, yɛ Zoova i aenguɛ’n i alaka’n su be su.
9 Sonja’m be dun mmua Ɲanmiɛn ɲrun jranfuɛ nga be bo awɛ’n be ɲrun, yɛ sonja nga be o siɛn lɔ’n be su Alaka’n su. Kɛ bé kɔ́’n nn awɛ’m bé tɛ́.
10 Zozie seli nvlefuɛ’m be kɛ: “Nán amun kpan yɛ nán be ti amun nɛn. Nán ndɛ kun sa fin amun nuan fite, saan cɛn nga n se amun kɛ: ‘Amun kpan!’ Amun ko kpan!”
11 Ɔ yoli maan be fali Zoova i Alaka’n be bo sin yiali klɔ’n, be sin yiɛli i kpɛ kunngba. I sin’n, be sali be sin nanmue’n nun lɔ kpɛkun be lali lɔ kɔnguɛ.
12 Kɛ aliɛ cɛnnin’n, Zozie jasoli nglɛmun ndɛ kpa’n, kpɛkun Ɲanmiɛn ɲrun jranfuɛ’m be fali Zoova i Alaka’n,+
13 yɛ Ɲanmiɛn ɲrun jranfuɛ nso nga be fali bua ɲin wɛ nso mun’n, be dun mmua Zoova i Alaka’n i ɲrun. Kɛ bé kɔ́ nn bé bó awɛ mun. Sonja wie’m be dun be ɲrun yɛ sonja nga be o siɛn lɔ’n be su Zoova i Alaka’n su. Kɛ bé kɔ́ nn awɛ’m bé tɛ́.
14 I cɛn ba nɲɔn’n su’n, be nantili sin yiali klɔ’n kpɛ kunngba. I sin’n, be sali be sin nanmue’n nun lɔ. Be yoli i sɔ cɛn ba nsiɛn.+
15 Cɛn ba nso’n su’n, be jasoli nglɛmun ndɛ kpa’n, kpɛkun be nantili sin yiali klɔ’n kɛ nga be fa yo i titi’n sa sɔ kpɛ nso. Cɛn sɔ’n nun ngunmin yɛ be nantili sin yiali klɔ’n kpɛ nso-ɔ.+
16 I kpɛ nso su’n, Ɲanmiɛn ɲrun jranfuɛ’m be boli awɛ mun, kpɛkun Zozie seli nvlefuɛ’m be kɛ: “Amun kpan,+ afin Zoova w’a fa klɔ’n w’a man amun!
17 Ɔ fata kɛ amun nunnun klɔ’n ɔ nin i nun ninnge’m be kwlaa.+ Be kwlaa be ti Zoova liɛ. Saan Raabu+ m’ɔ ti tekle bla’n, ɔ nin be kwlaa nga be nin i be o i sua’n nun lɔ’n yɛ amun yaci be nguan nun-ɔn. Afin ɔ fali be nga e sunmannin be’n fiali.+
18 Nán amun kan ninnge ng’ɔ fata kɛ be nunnun be’n,+ kɛ ɔ ko yo naan amun konvi w’a sɔman like wie m’ɔ fata kɛ be nunnun i’n, naan amun a faman’n ti.+ Sɛ amun yo sɔ’n, amún fá ɲrɛnnɛn* yí i Izraɛli nanmue’n su, yɛ ɔ́ núnnún mlɔnmlɔn.+
19 Sanngɛ sika nin sika ɔkwlɛ, ɔ nin ninnge nga be fali aaba annzɛ blalɛ be yoli’n, be kwlaa be ti Zoova liɛ klonglo.+ Ɔ fata kɛ be fa be sie Zoova i ninnge kpakpa’m be nun.”+
20 I sin’n, kɛ awɛ’n tɛ́’n, nvlefuɛ’m be kpannin.+ Kɛ nvlefuɛ’m be tili awɛ’n i tɛlɛ mɔ be kpannin alɛ kpanlɛ kekle kpa’n, talɛ’n ka lɛ bu guali.+ Kɛ ɔ yoli sɔ’n, nvlefuɛ’m be wluli klɔ’n nun, sran kun kɔ i ɲrun ndɛnman su trele, kpɛkun be fali klɔ’n.
21 Be fali tokofi be kunnin klɔ’n nun ninnge’m be kwlaa, i yasua-o, i bla-o, i bakan-o, i kpɛnngbɛn-o, i nannin tola-o, i bua-o, i aflunmun-o.+
22 Zozie seli yasua nɲɔn nga be ko kplali mɛn’n niannin’n be kɛ: “Amun wɔ tekle bla’n i awlo lɔ, yɛ amun fa bla’n nin be kwlaa nga be o i sua’n nun lɔ’n be fite, kɛ nga amun fa tɛli i nda’n sa.”+
23 Ɔ maan gbanflɛn nga be ko kplali mɛn’n niannin’n be ɔli be ko fali Raabu nin i si nin i nin, ɔ nin i niaan mun nin be kwlaa nga be o sua’n nun lɔ’n be fiteli. Be fali bla’n nin i awlofuɛ’m be kwlaa fiteli.+ Kpɛkun be fa be ɔli Izraɛli nanmue’n i sin lɔ lika kun nun, like fi w’a yoman be.
24 I sin’n, be fali sin be wɔli klɔ’n nin i nun ninnge’m be kwlaa be nun. Sanngɛ sika, nin sika ɔkwlɛ, nin ninnge nga be fali aaba annzɛ blalɛ be yoli’n be liɛ’n, be fa be ko sieli i Zoova i sua’n nun lɔ ninnge kpakpa’m be nun.+
25 Saan Raabu m’ɔ ti tekle bla’n, ɔ nin i si i awlofuɛ mun, ɔ nin be kwlaa nga be ti i liɛ’n yɛ Zozie yacili be lɛ-ɔ.+ Yɛ lele nin andɛ’n ɔ tran Izraɛli lɔ.+ Afin be nga Zozie sunmannin be kɛ be ko kpla Zeriko klɔ’n be nian’n, ɔ fa be fiali.+
26 Blɛ sɔ’n nun’n, Zozie tali nda* seli kɛ: “Sran kwlaa ng’ɔ jaso kɛ ɔ́ kplán Zeriko klɔ’n, maan be bo i sannzan Zoova ɲrun. Sran sɔ’n kɛ ɔ́ wlá klɔ’n i bo ase’n i wa klikli’n ɔ́ wú, yɛ kɛ ɔ́ wlɛ́ i anuan mun’n i wa kasiɛn’n ɔ́ wú.”+
27 Zoova jrannin Zozie sin,+ ɔ maan i dunman’n fuli asiɛ wunmuan’n su.+
Ja ngua lɔ ndɛ mun
^ Annzɛ “mɔ be fita nun be cuɛn i bo’n.”
^ Annzɛ “sa yaya”, “sannzan.”
^ Be kwla se ekun kɛ “ɔ yoli maan nvlefuɛ’m be tali nda.”
