Zozie 8:1-35
8 I sin’n, Zoova seli Zozie kɛ: “Nán srɛ kun wɔ, yɛ nán ɔ wun usu wɔ.+ Fa alɛ kunfuɛ’m be kwlaa naan amun nin Aifuɛ’m be ko kun. Nian, m’an fa Ai famiɛn’n nin i nvlefuɛ mun nin i klɔ’n, ɔ nin i mɛn’n m’an wla ɔ sa nun.+
2 Like kunngba nga amun fa yoli Zeriko klɔ’n nin i famiɛn’n,+ amun fa yo Ai klɔ’n nin i famiɛn’n wie. Sanngɛ lɔ liɛ’n amun kwla fa be bo ninnge mun, nin be nnɛn mun. Maan amun bu sa klɔ’n i sin lɛ.”
3 Ɔ maan Zozie nin alɛ kunfuɛ’m be kwlaa be ɔli kɛ be nin Aifuɛ mun bé kó kún. Ɔ fali alɛ kunfuɛ kpakpa akpiakpi ablasan (30.000), kpɛkun ɔ sunmannin be lɔ kɔnguɛ.
4 Ɔ seli be kɛ: “Amun bu sa klɔ’n i sin. Nán amun tran klɔ’n i wun mmua ngboko, yɛ amun kwlaa amun buabua amun wun be sie.
5 E nin nvlefuɛ’m be kwlaa é wúnnge klɔ’n i wun lɔ, yɛ kɛ bé bá e su kɛ laa’n sa’n,+ é wánndi be ɲrun.
6 Kɛ bé bá e su’n, é fá be é kɔ́ klɔ’n i wun mmua. Afin bé sé kɛ: ‘Be su wanndi e ɲrun kɛ laa’n sa.’+ Kpɛkun é wánndi be ɲrun.
7 I sin’n, maan amun fin amun fiawlɛ’n nun fite naan amun fa klɔ’n. Amun Ɲanmiɛn Zoova wá fá klɔ’n wlá amun sa nun.
8 Kɛ amun ko fa klɔ’n cɛ’n, maan amun wɔ nun.+ Amun yo i kɛ nga Zoova seli amun kɛ amun yo’n sa. Ndɛ nga ń kán klé amun’n yɛ ɔ o lɛ-ɔ.”
9 I sin’n, Zozie sunmannin be. Be nantili lele juli be fiawlɛ’n nun lɔ. Be ko trannin Betɛli nin Ai be afiɛn’n nun, Ai klɔ’n i wia atɔliɛ lɔ. Kɔnguɛ sɔ’n nun’n, Zozie lali nvlefuɛ’m be wun lɛ.
10 I sin’n, Zozie jasoli nglɛmun ndɛ kpa. Ɔ yiayiali sonja mun, kpɛkun ɔ nin Izraɛli kpɛnngbɛn’m be fali be ɔli Ai.
11 Alɛ kunfuɛ’m be kwlaa+ nga be nin i o lɛ’n, be ɔli klɔ’n i ɲrun ndɛnman su. Be boli nanmue Ai klɔ’n i nglo lɔ lika’n nun, kongo’n wo be nin Ai klɔ’n be afiɛn.
12 Kɛ ɔ́ yó sɔ’n nn w’a fa yasua akpi nnun (5.000) w’a fia+ Betɛli+ nin Ai be afiɛn’n nun, klɔ’n i wia atɔliɛ lɔ.
13 Sonja’m be boli be nanmue danfuɛ’n klɔ’n i nglo lɔ lika’n nun,+ kpɛkun sonja nga be o siɛn’n be ɔli klɔ’n i wia atɔliɛ lɔ.+ Kɔnguɛ sɔ’n nun’n, Zozie ɔli kongo’n i afiɛn lɔ.
14 Kɛ Ai famiɛn’n wunnin i sɔ cɛ’n, ɔ nin klɔ’n nun yasua’m be fiteli ndɛndɛ nglɛmun ndɛ kpa kɛ be nin Izraɛlifuɛ mun bé kó kún alɛ aawlɛ flɛnnɛn’n i wun lɔ. Sanngɛ ɔ siman kɛ sran wie’m b’a ko sa klɔ’n i sin lɔ naan be nin i su wa kun.
15 Kɛ Ai yasua’m be bali be su tɔlɛ’n, Zozie nin Izraɛlifuɛ’m be kwlaa be wanndili, be fali aawlɛ flɛnnɛn’n i atin’n.+
16 Ɔ maan be seli klɔ’n nunfuɛ’m be kwlaa kɛ be wanndi fuan be, be suli Zozie su lele be nin klɔ’n i afiɛn tili nun mmua.
17 Yasua ba kun sa w’a kaman Ai nin Betɛli lɛ. Be kwlaa be suli Izraɛlifuɛ’m be su. Be yacili klɔ’n lɛ be suli Izraɛlifuɛ’m be su.
18 Zoova seli Zozie kɛ: “Tinngɛ cua ng’ɔ o ɔ sa nun’n Ai klɔ’n su lɔ,+ afin ń má fá klɔ’n ń wlá ɔ sa nun.”+ Ɔ maan Zozie tinngɛli cua ng’ɔ o i sa nun’n klɔ’n su lɔ.
19 Kɛ ɔ tinngɛli i sa’n nun’n, be nga be bu sali’n, be jasoli be fiawlɛ’n nun ndɛndɛ, kpɛkun be wanndi wluli klɔ’n nun, be fali klɔ’n. Be ka lɛ wɔli klɔ’n nun.+
20 Ai yasua’m bé nían be sin-ɔn, wunsrɛn yɛ ɔ́ fín be klɔ’n nun fíte yɛ, ɔ maan b’a kwlá wunman lika kun nga bé kɔ́’n. I sin’n nvlefuɛ nga be wanndili be ɲrun mɔ be fali aawlɛ flɛnnɛn atin’n, be kpɛli be ɲin be nga be su be su’n be su.
21 Kɛ Zozie nin Izraɛlifuɛ’m be wunnin kɛ be nga be bu sali’n b’a fa klɔ’n, mɔ be wunnin klɔ’n i nun wunsrɛn m’ɔ fite’n, be kpɛli be ɲin yɛ be nin Ai yasua’m be kunnin.
22 Be nga be fali klɔ’n be fin klɔ’n nun fiteli naan be nin be yía. Ɔ maan Ai yasua’m be kali be afiɛn. Afin Izraɛlifuɛ wie’m be o be bue kun su, yɛ wie’m be o be bue uflɛ su. Be kunnin be lele be nun ba kun sa w’a kaman, be nun wie fi w’a kwlá wanndiman.+
23 Sanngɛ be trali Ai famiɛn’n,+ kpɛkun be fɛ i bali Zozie ɲrun.
24 Kɛ Izraɛlifuɛ’m be kunnin Aifuɛ nga be suli be su blo lɔ aawlɛ flɛnnɛn’n nun lɔ’n be kwlaa’n, mɔ be fali tokofi kunnin be kwlaa’n, i sin’n be sali be sin Ai lɔ, yɛ be fali tokofi kunnin be nga be kali lɔ’n.
25 Be kwlaa nga be wuli cɛn sɔ’n nun’n, i yasua-o, i bla-o, be ti sran akpi blu-nin-nɲɔn (12.000). Aifuɛ’m be kwlaa be wuli.
26 Zozie i sa nga cua’n o nun m’ɔ tinngɛli nun’n, w’a kɛnmɛn i ase,+ lele ɔ wieli Aifuɛ’m be kwlaa be nunnun.+
27 Sanngɛ Izraɛlifuɛ’m be fali klɔ’n nun nnɛn mun nin klɔ’n nun ninnge mun, kɛ nga Zoova seli Zozie kɛ be yo’n sa.+
28 Ɔ maan Zozie wɔli Ai klɔ’n nun, yɛ ɔ kacili klɔ nvuɛn mlɔnmlɔn.+ Lele nin andɛ’n kɛ ɔ ti sɔ-ɔ.
29 Ɔ sendeli Ai famiɛn’n waka kun su, ɔ kali lɛ lele nnɔsua. Kɛ ɔ ka kan wia’n tɔ́’n, Zozie seli kɛ maan be yi i fuɛn’n waka’n su.+ I sin’n be to yili i klɔ’n i anuan’n nun, yɛ be fali yɔbuɛ kpanngban kpa guɛli i su. Lele nin andɛ’n ɔ te o lɛ.
30 I sin’n, Zozie kplannin tɛ yiwlɛ kun Ebali Oka’n+ su mannin Zoova m’ɔ ti Izraɛli Ɲanmiɛn’n,
31 kɛ nga Moizi m’ɔ ti Zoova i sufuɛ’n seli Izraɛlifuɛ mun kɛ be yo m’ɔ ti klɛwa Moizi Mmla’n+ nun’n sa. Be klɛli i kɛ: “Fa yɔbuɛ mɔ b’a faman blalɛ b’a sɛsɛman’n yo tɛ yiwlɛ kun.”+ Be yili bo kun yolɛ tɛ, nin tɛ nga kɛ bé yí’n be yra nnɛn’n i kɔlikɔli’n tɛ yiwlɛ sɔ’n su be mannin Zoova.+
32 I sin’n, Mmla+ nga Moizi klɛli i Izraɛlifuɛ’m be ɲrun’n,+ ɔ klɛli i yɔbuɛ’m be su lɛ.
33 Izraɛlifuɛ’m be kwlaa, be kpɛnngbɛn mun, be ɲrun dinfuɛ mun, nin be jɔlɛ difuɛ’m be jrannin Alaka’n i bue nɲɔn’n su, Levifuɛ nga be ti Ɲanmiɛn ɲrun jranfuɛ mɔ be sua Zoova i aenguɛ’n i alaka’n be ɲrun lɛ. I aofuɛ-o, i Izraɛlifuɛ-o, be kwlaa be o lɛ.+ Be bue kun jrannin Garizimun Oka’n i ɲrun yɛ be bue kun jrannin Ebali Oka’n+ i ɲrun (kɛ nga Moizi m’ɔ ti Zoova i sufuɛ’n seli be laa kɛ be yo’n sa).+ Be yoli sɔ naan b’a bo muae b’a man Izraɛlifuɛ mun.
34 I sin’n, ɔ mɛnnin i nɛn’n su kanngannin Mmla’n+ i nun ndɛ’n i kwlaa nun, ɔ kanngannin muae bolɛ ndɛ mun,+ ɔ nin sannzan bolɛ ndɛ’m+ be nun, kɛ nga be fa klɛli i Mmla fluwa’n nun’n sa.
35 Ɔ leman ndɛ kun sa mɔ Moizi kannin mɔ Zozie w’a mɛnmɛn i nɛn’n su w’a kannganman nun Izraɛlifuɛ’m be kwlaa be ɲrun-ɔn.+ Kɛ ɔ́ yó sɔ’n, bla mun, nin ba kannganngan mun, ɔ nin aofuɛ+ nga be tran be afiɛn’n* be o lɛ wie.+
Ja ngua lɔ ndɛ mun
^ Ebr., “mɔ be nin be nanti’n.”
