Satan klo kɛ amun yi wunnzue. Sran kpanngban be yi tɛ be man be nannan’m be wunmiɛn mun annzɛ mmusu mun be fa sasa be wun, naan sa w’a ɲanman be. Be sro aolia nun sran’m be tinmin’n, i ti yɛ be yo sɔ-ɔ. Be wla be sa mma ti blenga annzɛ be sa kɔmin nun banzrɛ mun. Be nɔn “ayre mun” annzɛ be fa kpakpa be wunnɛn’n su. Afin be waan “ayre sɔ’m” be le ta kpa. Ninnge nga sran wie’m be bu i kɛ be kwla sasa be’n, be wla be ase be sua’m be nun annzɛ be awlo’m be nun, annzɛ be sende be nvialiɛ nun lika wie nun. Wie’m be ko tu “ayre” afin be bu i kɛ be kwla fa ɲan be wun, annzɛ be suklu junman’n kwla yo kpa, annzɛ be kwla fa kunndɛ bla annzɛ bian.

Sɛ amun waan amun sasa amun wun Satan i lika sakpa’n, ɔ fata kɛ amun tra Zoova i janvuɛ. Ɲanmiɛn Zoova nin i anzi’m be le tinmin tra Satan nin i mmusu mun lele. (Zak 2:19; Sa Nglo Yilɛ 12:9) Zoova w’a fua kpa kɛ i janvuɛ nga be fa be wla kwlaa guɛ i su’n be ukalɛ ti’n, ɔ́ yí i tinmin’n i nglo.—2 Nyoliɛ 16:9.

Ɲanmiɛn Ndɛ’n se kɛ: “Nán amun yi wunnzue.” Zoova bu wunnzue yilɛ nin bae dilɛ’n be fɔ. Afin ayeliɛ sɔ’m be kwla yo maan mmusu’m be si Satan sie e.—Saun Yolɛ 19:26.