Kɛ mɔ ɲrɛnnɛn dan’n su mantan koko ti’n, ɔ fataman kɛ e cuɛncuɛn e ja ase jasin fɛ’n i bolɛ nun. (Nya 24:11, 12, 20) Kɛ ɔ ko yo naan y’a uka sran mun’n, e kwla fa fluwa kpe kan ng’ɔ kan ɛntɛnɛti adrɛsi JW.ORG i ndɛ’n, e man be naan be ɲin w’a tran Ɲanmiɛn Ndɛ’n nin e ɛntɛnɛti adrɛsi’n su. Nzɔliɛ like kun o fluwa sɔ’n su. Ɔ fa sran mun kɔ video ?Ngue ti yɛ Biblu’n nun like suanlɛ’n ti cinnjin ɔn? i su trele. Kpɛkun fluwa sɔ’n wla be fanngan naan be kunndɛ kɛ bé sí ndɛ wie mun ekun, annzɛ bé súan Biblu’n nun like. Sran wie’m be sɔman e fluwa’m be nun sanngɛ be klo kɛ bé kɔ́ e ɛntɛnɛti adrɛsi’n su. Nán sisi ɔ bo naan w’a fa fluwa kaan ng’ɔ kan e ɛntɛnɛti adrɛsi’n, i ndɛ’n w’a man be. Sanngɛ, nán fa fluwa’n man be nga Ɲanmiɛn ndɛ’n loman be’n.

Kɛ á yó ɔ ninnge mun’n, a kwla kan ndɛ ng’ɔ o yɛ’n kle sran kun naan Ɲanmiɛn ndɛ’n w’a lo i. A kwla se i kɛ: “N kunndɛ kɛ ḿ mán wɔ like kun. Fluwa kaan nga kan ɛntɛnɛti adrɛsi kun ndɛ. Adrɛsi sɔ’n su’n, a kwla si ndɛ kaka kpa, kpɛkun a kwla nian video wie mun mɔ be kan ndɛ fanunfanun’n. Be tuɛmɛn i ti sika.” (Zn 4:7) Kɛ mɔ fluwa’n ti kaan ti’n, wie kwla tran e sa nun naan blɛ nga e ɲɛn i wun atin’n, y’a fa man sran mun.