Zezi kannin “Ɲanmiɛn i Famiɛn dilɛ’n i jasin fɛ’n” i ndɛ. (Lik 4:43) Asa’n, ɔ seli be kɛ be srɛ naan Famiɛn dilɛ sɔ’n i blɛ’n ju. (Mt 6:9, 10) Novanblu anglo nun’n, é dí junman ngunmin kun. Yɛle kɛ é kán Ɲanmiɛn i Famiɛn dilɛ’n i ndɛ é klé sran mun. (Mt 24:14) Ɔ fata kɛ e siesie e blɛ’n naan y’a kwla di junman ngunmin kun sɔ’n kpa. Anglo sɔ’n nun’n, be kwlaa nga bé yó cɛn kunngun atin bofuɛ’n, be kwla man dɔ 30 annzɛ dɔ 50.

Blɛ sɔ nun’n, maan e mian e ɲin naan e kanngan ndɛ mma kun m’ɔ kan Ɲanmiɛn i Famiɛn dilɛ’n ndɛ’n i nun e kle sran kaka e jasin bowlɛ’n nun. Ka naan y’a kanngan ndɛ mma kun nun y’a kle sran kun’n, maan e bu i Ɲanmiɛn sulɛ wafa’n i akunndan. Sɛ kpɛ klikli nga e toli sran’n, sran’n kleli kɛ ndɛ’n lo i’n, maan e fa afuɛ 2020 Sasafuɛ Tranwlɛ’n No. 2 nga e fa bo jasin fɛ’n kun e mɛn i. Maan e ko niɛn i osu. I liɛ’n sɛ ɔ kle kɛ ndɛ’n te lo i’n, e kwla fa fluwa kun e Like klelɛ ninnge’m be siewlɛ nun mɛn i naan i sin’n y’a bo i Biblu’n nun like klelɛ bo. Ɔ ka kan’n, Ɲanmiɛn i Famiɛn dilɛ’n wá núnnún awa kwlaa nga be o asiɛ’n su’n. (Da 2:44; 1Ko 15:24, 25) I sɔ’n ti’n, maan blɛ ngunmin sɔ nun’n, e kle kɛ e suan Zoova nin i Famiɛn dilɛ’n be bo.