E wun mɔ e kwla fa mantan Zoova’n, ɔ ti e cenjele like. Kɛ mɔ e fali e wun mɛnnin i ti’n, e kwla mian e ɲin naan e nin i e afiɛn mantan kpa titi. Zoova sinnin i Wa’n i lika yoli maan e bɛli i sin. (Zn 6:44) Asa ekun’n, ɔ tie e srɛlɛ mun.—Ju 34:16.

?Ngue yɛ e kwla yo naan e nin Zoova e afiɛn w’a saciman-ɔn? Sɛ e waan nán e nin Zoova e afiɛn saci’n, ɔ fataman kɛ e yo ninnge tɛtɛ nga Izraɛlifuɛ’m be yoli’n wie. Kɛ be nin Zoova be trali aenguɛ’n w’a cɛman be yoli sika ɔkwlɛ nannin ba kun yɛ be kotoli i bo. (Tu 32:7, 8; 1Ko 10:7, 11, 14) Maan e usa e wun kɛ: ?Kɛ sa tɛ yolɛ ba min akunndan nun’n, ngue yɛ n yo-ɔ? ?Ninnge nga n yo be’n, be kle kɛ n mian min ɲin naan e nin Zoova e afiɛn w’a saciman? Sɛ e klo e Si Ɲanmiɛn m’ɔ o nglo lɔ tankaan kpa’n, i sɔ’n úka e naan y’a kpɔ ninnge ng’ɔ kpɔ be’n wie.—Ju 97:10.

AN NIAN VIDEO NGA BE FLƐ I KƐ MAAN E MIAN E ƝIN NAAN LIKE FI W’A SACIMAN E NIN ZOOVA E AFIƐN. (KOL 3:5) I SIN’N, AN TƐ KOSAN NGA’M BE SU:

• ?Ngue yɛle aɲinblɔɛ’n?

• ?Ngue ti yɛ ɔ fata kɛ e kpalo konvi kpli’n nin amuin sɔlɛ’n niɔn?

• ?Ngue ti yɛ e kwla se kɛ sran ng’ɔ kunndɛ bla i yi bo annzɛ bian i wun bo’n, ɔ nin sran ng’ɔ sɔ amuin’n be ti kun-ɔn?

• ?Kannzɛ bɔbɔ e di junman wie mun asɔnun nun annzɛ anuannzɛ’n nun’n, ngue ti yɛ ɔ fataman kɛ e ɲin kpa e yi’n annzɛ e wun’n su-ɔ?