Be yili fluwa ?Wan mun yɛ be yo Zoova i klun sa’n andɛ ɔ? kɛ blɛ kwlaa nga é klé sran’m be Biblu’n nun like’n, e nin be e koko i su yalɛ ka naan y’a suan like’n. Annzɛ kusu kɛ e ko wie like suan cɛ’n, e yo i sɔ. * Like suanlɛ 1 lele 4 uka like suanfuɛ mun naan b’a si sran wafa nga Zoova i Lalofuɛ’m be ti’n. Yɛ i 5 lele 14 kle be junman nga be di’n. Kpɛkun like suanlɛ 15 lele 28 kle be kɛ e anuannzɛ’n i sa o junman su kpa. Ɔ ti kpa kɛ e suan fluwa’n i nun like e lɔngɔ su, nán maan e tɔtɔ nun. Sanngɛ sɛ e sie i nzɔliɛ kɛ sa kun o like suanfuɛ’n i su naan like suanlɛ kun kɛn i ndɛ’n, e kwla fɛ i ɲin sie su trele. Fluwa’n i bue kun ti like suanlɛ kun. Ɔ maan, e kwla fa miniti nnun annzɛ blu e koko su yalɛ.

• Dun mmua fa like suanfuɛ’n i ɲin sie i like suanlɛ’n i flɛlɛ’n su.

• An kwla kanngan like suanlɛ’n i wunmuan’n nun, annzɛ kusu an kwla kpɛkpɛ nun.

• An koko i bue nga an kanngan nun’n i su yalɛ. Yɛ an fa kosan nga be o fluwa’n i ja ngua lɛ’n be flan like suanlɛ’n nun. Nán amun ɲin kpa foto’m be su. Sɛ an kanngan Biblu’n nun ndɛ mma wie nun’n, an koko su yalɛ. Yo maan ɔ si kɛ ndɛ ce nga be klɛli be ble tuun kpa’n, be yiyi like suanlɛ’n i flɛlɛ nun.

• Sɛ kuku nga be flɛ i kɛ “Like nga a kwla yo’n,” i wie o like suanlɛ’n nun’n, an kanngan nun. Kpɛkun an wla like suanfuɛ’n i fanngan naan ɔ nanti i nun afɔtuɛ’m be su.