ƝANMIƐN NDƐ’N NUN NINNGE KPAKPA WIE MUN | MATIE 25
“An tran minndɛ”
Kannzɛ talua blu’n be wun ɲanndra nga Zezi buli’n ti i sɔnnzɔnfuɛ nga Ɲanmiɛn kpali be sieli be ngunmin’n be liɛ’n, sanngɛ ɲanndra sɔ’n i nun afɔtuɛ’n ɔ ti Klistfuɛ’m be kwlaa be liɛ. (w15 1/3 16-17) Zezi seli be kɛ: “An tran minndɛ, afin an siman cɛn’n nin dɔ’n.” (Mt 25:13) ?Amun kwla yiyi Zezi i ɲanndra sɔ’n nun?
-
Yasua ng’ɔ su fa atɔnvlɛ’n (ndɛ mma 1): Yɛle Zezi.
-
Talua ngwlɛlɛfuɛ mɔ be buabuali be wun’n (ndɛ mma. 2): Yɛle Klistfuɛ nga Ɲanmiɛn kpali be sieli be ngunmin’n mɔ be buabua be wun be di be junman’n i kpa titi’n, kpɛkun bé kpája kɛ kannin sa lele mɛn’n fá wíe. (Fil 2:15)
-
Sran wie kpan seli kɛ: “An nian, bian’n su ba.” (ndɛ mma 6): Yɛle sa nga be kle kɛ Zezi o lɛ’n.
-
Talua sinnglinfuɛ mun (ndɛ mma 8): Yɛle Klistfuɛ nga Ɲanmiɛn kpali be sieli be ngunmin’n mɔ be kɔ yasua ng’ɔ su fa atɔnvlɛ’n i atin kpalɛ sanngɛ be tran minndɛman’n yɛ be nantiman seiin guɛmɛn i ti nin i bo’n.
-
Talua ngwlɛlɛfuɛ’m b’a kplinman su kɛ bé fá be kannin nzue’n wie mán (ndɛ mma 9): Yɛle kɛ, kɛ be ko wie Klistfuɛ nga Ɲanmiɛn kpali be sieli be ngunmin mɔ be yoli nanwlɛfuɛ’n be nzɔliɛ sie’n, be su kwlá ukaman be wiengu nga b’a yoman nanwlɛfuɛ’n.
-
“Bian’n juli lɛ” (ndɛ mma 10): Yɛle kɛ, kɛ ɔ ka kan’n ɲrɛnnɛn dan’n wíe’n, Zezi bá, ɔ́ wá dí sran’m be jɔlɛ.
-
Talua ngwlɛlɛfuɛ nga be buabuali be wun’n, be nin bian’n be wluli kan be fa atɔnvlɛ’n lɔ’n naan b’a to anuan’n nun (ndɛ mma 10): Yɛle kɛ Zezi fá be nga Ɲanmiɛn kpali be sieli be ngunmin’n mɔ be yoli nanwlɛfuɛ’n kɔ́ ɲanmiɛn su. Sanngɛ be nga b’a yoman nanwlɛfuɛ’n, be su kɔman wie.
