?Amun sɔli Ɲanmiɛn i Sielɛ’n i minndɛlɛ i afuɛ nɲɛ yɛ? ?Kannzɛ bɔbɔ sa’m be o amun su sɛ’n sanngɛ amun tra amun awlɛn be minndɛ? (Rɔm 8:25) Klisifuɛ wie’m be wun be ɲrun kpa. Yɛle kɛ be kpɔ be, be yo be finfin, be wla be bisua yɛ wie liɛ bɔbɔ’n be kunndɛ kɛ bé kún be. Be nun sunman tukpacɛ ng’ɔ o be su’n ɔ wieman annzɛ kusu b’a yo oke dan.

?Ngue yɛ ɔ kwla uka e naan kannzɛ bɔbɔ sa’m be o e su sɛ’n y’a kwla tra e awlɛn kpa y’a minndɛ titi-ɔ? Kɛ ɔ ko yo naan e Ɲanmiɛn sulafilɛ’n i bo w’a wla ase kpa’n, ɔ fata kɛ e kanngan Biblu’n nun naan e bu su akunndan cɛn kwlakwla. Ɔ fata kɛ e ɲin tran like nga e wla o su’n i sin titi. (2Ko 4:16-18; Ebr 12:2) Maan e srɛ Zoova kɛ ɔ fɛ i wawɛ’n man e. (Lik 11:10, 13; Ebr 5:7) E Si Ɲanmiɛn m’ɔ klo e’n, ɔ kwla uka e naan y’a ‘tra e awlɛn, naan e klun w’a jɔ.’—Kol 1:11.

AN NIAN VIDEO NGA BE FLƐ I KƐ “MAAN E MIAN E ƝIN SIN LIKA NGA BE KLE YE’N NUN”: E LAFI SU KPA KƐ É ƝÁN AKATUA’N. YƐ AN TƐ KOSAN NGA’M BE SU:

• ?Sa benin mun yɛ be kwla tɔ e su-ɔ? (Ak 9:11)

• ?Kɛ sa’m be tɔ e su’n wafa sɛ yɛ Ɲanmiɛn srɛlɛ’n uka e-ɔ?

• ?Zoova i sulɛ nun’n, sɛ e kwlá yoman ninnge mun kɛ laa’n sa kun, ngue ti yɛ ɔ ti cinnjin kɛ e fa e ɲin e sie i nga e kwlɛ i yo andɛ’n su-ɔ?

• ?Ngue ti yɛ a lafi su kpa kɛ á ɲán akatua’n niɔn?