LIKE NGA KLISIFUƐ’M BE YO’N
Maan e bo jasin fɛ’n i kpa tra laa: Biblu’n nun like suanfuɛ nga be kɔman be ɲrun’n maan e yaci be like klelɛ
?NGUE TI YƐ Ɔ TI CINNJIN-ƆN?: Ɔ fata kɛ sran’m be bo Zoova i dunman’n, naan b’a fite nun. (Rɔm 10:13, 14) Sanngɛ nán be kwlaa nga be suan Biblu’n nun like’n, yɛ be nanti Zoova i mmla’m be su-ɔ. Jasin fɛ bolɛ nun’n e fa e blɛ’n, e uka be kwlaa nga be klo kɛ bé káci be nzuɛn’n naan Zoova i klun jɔ be wun. Sɛ e sie i nzɔliɛ kɛ e nin Biblu’n nun like suanfuɛ kun e suan like w’a cɛ sanngɛ ɔ kɔmɛn i ɲrun’n, maan e yaci i like klelɛ. I liɛ’n, é kwlá úka be nga Ɲanmiɛn yo maan be bɛ i sin’n be kpa. (Zn 6:44) I sin’n, sɛ sran sɔ’n kle kɛ ɔ nin “nguan m’ɔ leman awieliɛ’n fata’n” aklunjuɛ su e nin i é súan Biblu’n nun like ekun.—Yol 13:48.
?WAFA SƐ YƐ É YÓ I SƆ-Ɔ?:
-
Yo like suanfuɛ’n i mo afin ɔ kunndɛli kɛ ɔ́ sí ndɛ nanwlɛ’n.—1Ti 2:4
-
Se i kɛ ɔ ti cinnjin kɛ ɔ nanti ninnge kwlaa ng’ɔ suannin’n su.—Lik 6:46-49
-
Sran m’ɔ luali like’n i su ɲanndra nga Zezi buli’n, amun koko su yalɛ. Kpɛkun usɛ i like nga ti yɛ like ng’ɔ suan’n i su nantilɛ’n ti kekle mɛn i-ɔ. Yo i sɔ’n amanniɛn su.—Mt 13:18-23
-
Amanniɛn su’n yiyi like nga ti yɛ a nin i be su suanman Biblu’n nun like kun’n, i nun kle i.
-
Kan kle i kɛ ɔ ju wie’n, á flɛ́ i annzɛ á sín i awlo lɔ wlɛ i fanngan. Naan sɛ ɔ kaci i sa’n, á kɔ́ kó klé i Biblu’n nun like ekun.
AN NIAN VIDEO’N, I SIN’N AN TƐ KOSAN NGA’M BE SU:
-
?Yalɛ nga jasin bofuɛ’n nin like suanfuɛ’n be kokoli nun’n, ngue yɛ a sieli i nzɔliɛ m’ɔ kle kɛ like suanfuɛ’n ɔ kɔmɛn i ɲrun-ɔn?
-
?Wafa sɛ yɛ jasin bofuɛ’n ukali like suanfuɛ’n naan ɔ wun i wlɛ kɛ ɔ fata kɛ ɔ kaci i sa-ɔ?
-
?Wafa sɛ yɛ jasin bofuɛ’n kleli like suanfuɛ’n kɛ, sɛ ɔ kaci i sa’n ɔ nin i bé súan Biblu’n nun like ekun-ɔn?