Zakɔbu wunnin i wlɛ kɛ Zoova kunngba cɛ yɛ ɔ fata kɛ be su i-ɔ, kusu nn Zoova nin-a manman mmla ng’ɔ tannin amuin sɔlɛ’n. (Tu 20:3-5) Ɔ maan kɛ Zoova seli Zakɔbu kɛ ɔ sɛ i sin Betɛli’n, Zakɔbu seli i awlo nunfuɛ’m be kɛ, be gua amuin nga be o be sa nun’n be ase. Amuin kwlaa ng’ɔ o be sa nun’n nin be asunmanndi mɔ be kwla fa yo be wun sasalɛ like’n, Zakɔbu guali be blo. (Bo 35:1-4) I sɔ mɔ Zakɔbu yoli’n, ɔ jɔli Zoova i klun.

?Wafa sɛ yɛ andɛ’n e kwla kle kɛ Zoova kunngba cɛ yɛ e su i-ɔ? Like cinnjin ng’ɔ fata kɛ e yo’n, yɛle kɛ e kpɔci ninnge kwlaa nga be kan bae dilɛ annzɛ amuin sɔlɛ ndɛ’n. Asa’n, ɔ fata kɛ e nian e wun su kpa naan y’a faman ninnge nga be kan bae dilɛ ndɛ’n y’a yiyiman e ɲin su. Ɔ maan e tinuntinun e kwla usa e wun kɛ: ‘?Fluwa nga n kanngan be nun’n annzɛ flimun nga n nian be’n, be kan amuin sɔlɛ nin bae dilɛ nin i wunsu ninnge wie’m be ndɛ?’ ‘?Ninnge nga n fa yiyi min ɲin su’n, be nun ninnge kanngan wie’m be o lɛ mɔ be kan amuin sɔlɛ nin bae dilɛ ndɛ mun-ɔn?’ Ɔ fata kɛ e kpalo ninnge kwlaa nga Zoova kpɔ be’n.​—Ju 97:10.

AN NIAN VIDEO NGA BE FLƐ I KƐ “AN JRAN SUƐN TƆNFUƐ’N I ƝRUN KEKLE.” I SIN’N, AN TƐ KOSAN NGA’M BE SU:

• ?Sa benin yɛ ɔ juli Palɛsa su-ɔ?

• ?Sɛ mmusu’m be kle e yalɛ, annzɛ be kle sran kun annzɛ kusu Biblu’n nun like suanfuɛ kun i yalɛ’n, ngue ti yɛ ɔ ti kpa kɛ e bo su e kle asɔnun kpɛnngbɛn mun-ɔn?

• ?Sɛ e klo kɛ Zoova sasa e’n ninnge benin mun yɛ ɔ fata kɛ e kpalo be-ɔ?

• ?Ajalɛ trele benin yɛ Palɛsa fɛli i yakpa su-ɔ?

• ?Amun asa’n su lɔ’n, ninnge benin mun yɛ amun kwla yo naan mmusu’m b’a ɲanman ta amun su-ɔ?