Kɛ be tu sran kun fɔ’n ɔ ti i like klelɛ. Asa’n be yo sɔ naan ɔ si ngwlɛlɛ. Kɛ ɔ ko yo naan y’a su Zoova kɛ ɔ nin i fata’n sa ti yɛ ɔ tu e fɔ-ɔ. (Rɔm 12:1; Ebr 12:10, 11) Ɔ ju wie’n fɔ nga be tu e’n kwla yo e ya, sanngɛ sɛ e nanti afɔtuɛ nga be man e’n su’n i agualiɛ su’n e yo sran kpa Ɲanmiɛn ɲrun yɛ ɔ yra e su. (Nya 10:7) ?Be nga be tu sran fɔ’n ɔ nin be nga be tu be fɔ’n ngue yɛ ɔ fataman kɛ be wla fi su-ɔ?

Fɔ tufuɛ’n. Maan Asɔnun kpɛnngbɛn mun, siɛ nin niɛn mun ɔ nin be nga be kunndɛ kɛ bé tú sran fɔ’n be mian be ɲin naan be nian Zoova i ajalɛ’n su. Yɛle kɛ be yo i amanniɛn su nin klolɛ su. (Ze 46:28) I kpa bɔbɔ’n sɛ ɔ fata kɛ be tu sran kun fɔ kekle kpa’n, ɔ fata kɛ be nian wafa nga sa’n fa ti’n yɛ be yo i sɔ liɛ’n klolɛ su.​—Tit 1:13.

Sran nga be tu i fɔ’n. Kannzɛ fɔ nga be tu e’n ti sɛ ti sɛ’n, sanngɛ maan e sɔ nun klanman yɛ ndɛndɛ kpa e nanti afɔtuɛ nga be man e’n su. (Nya 3:11, 12) Fɔ m’ɔ o e nun’n ti’n e kwlaa e mian fɔ tulɛ wun. Fɔ tulɛ sɔ’n kusu kwla yo wafawafa. Ɔ kwla yo ndɛ wie mɔ e kɛnngɛnnin i Biblu’n nun annzɛ ndɛ wie mɔ e tili i aɲia’m be bo’n. Wie liɛ kusu’n asɔnun kpɛnngbɛn mun yɛ ɔ fata kɛ be tu e fɔ-ɔ. Sɛ e sɔ fɔ nga be tu e’n nun naan kusu e nanti afɔtuɛ nga be man e’n su’n é dí aklunjɔɛ kpɛkun é ɲán nguan m’ɔ leman awieliɛ’n.​—Nya 10:17.

AN NIAN VIDEO NGA BE FLƐ I KƐ “SRAN NGA ZOOVA KLO I’N, Ɔ TU I FƆ” I SIN’N, AN TƐ KOSAN NGA’M BE SU:

• ?I bo bolɛ nun’n wafa sɛ yɛ Kanɔn suli Zoova-ɔ? ?Yɛ kɛ ɔ́ kɔ́ i ɲrun’n sa benin yɛ ɔ juli-ɔ?

• ?Wafa sɛ yɛ Zoova tuli i fɔ-ɔ?

• ?Ngue yɛ aniaan bian sɔ’n i su ndɛ’n kle e-ɔ?