Yalɛ klelɛ’n kwla bubu e sa sin ndɛndɛ. I li kɛ ɔ cɛ’n yɛ ɔ kwla bubu e sa sin kpa’n niɔn. Davidi si kɛ yalɛ nga Famiɛn Saili kle i’n ɔ́ wíe cɛn kun, naan kɛ nga Zoova fa kannin sa’n ɔ́ yó famiɛn. (1Sa 16:13) Zoova su mɔ Davidi lafi’n ti’n ɔ trɛli i awlɛn yɛ ɔ minndɛli i.

Kɛ sa’m be o e su’n e kwla nian e wun su, e kwla fa ngwlɛlɛ e nanti annzɛ kusu e kwla bu like nga é yó naan y’a wun sa sɔ’m be trawlɛ’n i akunndan. (1Sa 21:13-15; Nya 1:4) Sanngɛ sa wie’m be o lɛ’n kannzɛ e nanti Biblu’n nun mmla’m be kwlaa be su’n nán kɛ bé wíe-ɔ. I lɛ nun’n ɔ fata kɛ e tra e awlɛn e minndɛ Zoova. Ɔ cɛ kan’n Ɲanmiɛn wá yó maan e su afɛ’m be kwlaa bé wíe yɛ ‘ɔ́ núnnún e ɲinmuɛn’n kwlaa.’ (Ngl 21:4) Sɛ Zoova ti yɛ e su sa’m bé wíe-o annzɛ kusu sɛ sa uflɛ ti yɛ bé wíe-o, sanngɛ nga e si i’n yɛle kɛ cɛn kun’n e su sa’m bé wíe. I sɔ’n yo maan e wla gua ase.

AN NIAN VIDEO NGA BE FLƐ I KƐ E BO TI KUN MƐN KUN MƆ I NUNFUƐ’M BE BUBU BE WUN NUN’N I NUN. I SIN’N, AN TƐ KOSAN NGA’M BE SU:

• ?Ngue yɛ ɔ kleli Klisifuɛ nga be o Etazinin i ngua lɔ lika’n nun’n be nun wie’m be yalɛ-ɔ?

• ?Wafa sɛ yɛ be trali be awlɛn yɛ be kleli kɛ be klo sran-ɔn?

• ?Blɛ sɔ nun’n ngue yɛ aniaan’m be yoli kleli kɛ be fa be ɲin sie i “ninnge nga be ti cinnjin kpa’n” su-ɔ?—Fp 1:10