Davidi nin Goliati be kunnin afin ɔ lafi Zoova su. (1Sa 17:45) Zoova kunndɛ kɛ ɔ́ suɛ́n i sufuɛ’m be kwlaa be bo. (2Nyo 16:9) ?Wafa sɛ yɛ e kwla kle kɛ e lafiman ninnge nga e si be yo’n su naan Zoova su yɛ e lafi-ɔ? Ninnge nsan nga’m be kwla uka e:

• Maan e srɛ Zoova titi. Nán sa tɛ nga e yo be’n be ngunmin be ti yɛ ɔ fata kɛ e srɛ-ɔ. Sanngɛ kɛ e konvi sɔ sa tɛ yolɛ’n ɔ fata kɛ e srɛ Zoova naan y’a tɔman sa tɛ’n nun. (Mt 6:12, 13) Nán ajalɛ nga y’a dun mmua y’a fa be’n, be ngunmin ti yɛ ɔ fata kɛ e srɛ Zoova naan ɔ yra be su-ɔ. Sanngɛ kwlaa naan y’a fa ajalɛ’n maan e srɛ Zoova naan ɔ kle e atin naan kusu ɔ man e ngwlɛlɛ.—Zak 1:5

• Maan e kanngan Biblu’n nun yɛ e suan nun like titi. Maan e kanngan Biblu’n nun cɛn kwlaa. (Ju 1:2) Maan e fa blɛ e bu be nga Biblu’n kan be ndɛ’n be su ndɛ’n i akunndan. Kpɛkun like nga be su ndɛ’n kle e’n maan e nian su e nanti. (Zak 1:23-25) Kannzɛ e sa w’a tɔ jasin fɛ’n i bolɛ’n nun’n, sanngɛ maan e siesie e wun naan y’a ɔ jasin fɛ’n i bolɛ. Maan e siesie e wun kpa kwlaa naan y’a tran aɲia’m be bo, i liɛ’n é ɲán su ye.

• Maan e suan Zoova i anuannzɛ’n i bo. Maan e mian e ɲin e si ajalɛ uflɛ nga anuannzɛ’n fa be’n, yɛ ndɛndɛ kpa e nian be su e nanti. (Ka 9:17) Kɛ asɔnun kpɛnngbɛn’m be man e afɔtuɛ mɔ kusu be kle e like’n maan e sie e su be nuan bo.—Ebr 13:17

AN NIAN VIDEO NGA BE FLƐ I KƐ NÁN MAAN YALƐ KLELƐ’N TI’N SRƐ KUN E. I SIN’N, AN TƐ KOSAN NGA’M BE SU:

• ?Ngue ti yɛ srɛ kunnin aniaan mun-ɔn?

• ?Ngue yɛ ɔ ukali be naan srɛ w’a kunman be kun-ɔn?