Be nga be nzuɛn’n ti sanwun’n be ngunmin cɛ yɛ be nin Zoova be afiɛn kwla mantan-ɔn. (1Pi 1:14-16) Sɛ Biblu’n nun like suanfuɛ’m be mian be ɲin be wla be ayeliɛ tɛ’m be ase’n, be osufuɛ’m bé ɲán su ye. Asa’n tukpacɛ tɛtɛ wie’m bé tó fúan be, yɛ i sɔ’n úka be naan b’a yo be sika’n i cɛcɛ.

Maan e uka Biblu’n nun like suanfuɛ mun naan be wun Zoova i mmla’m be wlɛ. Asa’n sa nga ti yɛ ɔ fata kɛ be nanti su’n ɔ nin i su ye nga bé ɲɛ́n i’n, maan e yiyi nun e kle be wie. Like ng’ɔ fata kɛ ɔ yo e cinnjin’n yɛle kɛ maan e uka Biblu’n nun like suanfuɛ mun naan be kaci be akunndan bulɛ wafa’n. Sɛ e yo sɔ’n ɔ́ sɔ’n úka be naan b’a kaci be ayeliɛ’n. (Efɛ 4:22-24) Maan e uka be naan be wun i wlɛ kɛ kannzɛ ayeliɛ sɔ’m b’a tra ndin be awlɛn’n nun’n sanngɛ Zoova kwla uka be naan b’a wla be ase. (Fp 4:13) Maan e se be kɛ sɛ sa tɛ yolɛ akunndan ba be ti nun’n be srɛ Zoova tankaan kpa. Maan e uka be naan be sie ninnge nga be kwla fa be yi i sa tɛ’n nun’n be nzɔliɛ yɛ be kpalo be. E wla be fanngan naan be ɲin tran ninnge kpakpa’m be su. I liɛ’n bé yáci ayeliɛ tɛ’n. Kɛ é wá wún i kɛ Zoova fanngan nun’n Biblu’n nun like suanfuɛ’m be su kaci be sa’n é dí aklunjɔɛ.

AN NIAN VIDEO NGA BE FLƐ I KƐ MAAN E UKA BIBLU’N NUN LIKE SUANFUƐ MUN NAAN BE WLA AYELIƐ TƐTƐ’M BE ASE. I SIN’N, AN TƐ KOSAN NGA’M BE SU:

• ?Kɛ asɔnun kpɛnngbɛn mun nin Neta be sieli i nzɔliɛ kɛ Jadi w’a wlɛmɛn i ayeliɛ tɛtɛ’m be ngba be ase’n ngue yɛ be yoli-ɔ?

• ?Wafa sɛ yɛ Neta ukali Jadi kpa ekun-ɔn?

• ?Wafa sɛ yɛ Jadi kleli kɛ ɔ kunndɛ kɛ Zoova ukɛ i-ɔ?