Delɛ Cɛn kasiɛn nga Zezi dili’n ɔ yoli i cinnjin kpa. Kɛ m’ɔ si kɛ ɔ cɛ kan’n bé kún i’n ti’n, ɔ fali ajalɛ naan ɔ nin i akoto’m b’a kwla di Delɛ Cɛn’n likawlɛ. Cɛn sɔ’n nun’n, ɔ kleli be like kun m’ɔ fata kɛ be yo i afuɛ nuan kwlakwla-ɔ. Like sɔ’n yɛle E Wla Kpɛnlɛ aɲia’n. Sanngɛ kwlaa naan b’a di cɛn sɔ’n, ɔ sunmannin Piɛli nin Zan kɛ be ko siesie lika nga bé wá yía bé dí cɛn sɔ’n. (Lik 22:7-13; An nian foto ng’ɔ o fluwa’n i bui’n su’n.) I sɔ mɔ be yoli’n kle e kɛ ɔ fata kɛ e siesie e wun naan y’a kwla tran E Wla Kpɛnlɛ aɲia’n nga é wá yó i Marsi i le 27 su’n i bo. Atrɛkpa’n, asɔnun kpɛnngbɛn’m b’a dun mmua b’a bu aniaan ng’ɔ́ wá ijɔ́ nzra nun’n nin kpanwun nin duvɛn’n ɔ nin ninnge uflɛ wie mun ekun be akunndan. ?Sanngɛ ngue yɛ e tinuntinun e kwla yo naan y’a ɲan E Wla Kpɛnlɛ aɲia’n i su ye-ɔ?

Maan e kle kɛ e si Zezi i wie’n su ye. Biblu’n i bue ng’ɔ fata kɛ e kanngan nun E Wla Kpɛnlɛ blɛ’n nun’n, maan e kanngan nun yɛ e bu su akunndan. Wafa nga be siesieli i sɔ liɛ’n, i wie o e fluwa Maan e nian Ɲanmiɛn Ndɛ’n nun cɛn kwlaa nun. Asa’n, i wie o La Bible. Traduction du monde nouveau ng’ɔ fiteli afuɛ 2018 nun’n i nun. Ɔ o kan be klɛli lɛ kɛ Appendice B12. (Nian afuɛ 2020 Avrili anglo’n nun Klisifuɛ mun nin be junman’n aɲia fluwa nun wie.) Sɛ awlobofuɛ’m bé sú Ɲanmiɛn awlo lɔ’n, be kwla kunndɛ sa nga ti yɛ e ti kpɔlɛ tɛ’n ti cinnjin man e’n i su like fluwa Index des publications Watch Tower annzɛ Zoova i Lalofuɛ’m be like kunndɛlɛ fluwa nun.

Maan e yia sran mun. Kɛ é wá bó sran’m be yialɛ bo’n, maan e tu e klun e yia sran’m be kpa. Maan e bu be nga e kwla yia be’n be akunndan. Ɔ kwla yo sran kun mɔ e ko niɛnnin i osu’n, annzɛ sran kun m’ɔ suannin Biblu’n nun like laa’n annzɛ sran kun mɔ e si i’n annzɛ kusu e osufuɛ wie. Ɔ fata kɛ asɔnun kpɛnngbɛn’m be yia be nga be yacili jasin fɛ’n i bolɛ w’a di anglo nsiɛn annzɛ anglo nsiɛn tra su’n. Sɛ a kunndɛ kɛ á yía sran kun m’ɔ tranman ɔ asa liɛ’n su lɔ’n, kɔ e ɛntɛnɛti adrɛsi jw.org su naan w’a wun kan bé yó aɲia’n nin dɔ’n. Tin E SU NDƐ nga be klɛli i nglo lɔ’n su, kpɛkun tin “E wla kpɛnlɛ cɛn’n” su.

?Ngue ekun yɛ e kwla yo-ɔ?